Yakaunpaus 2:14-17
Nqe cim:
“…Yog nej hais tias nej ntseeg, tiamsis nej tsis ua ib yam haujlwm tshwm, ces nej txojkev ntseeg twb tuag lawm” (Yakaunpaus 2:17)
Lus nug rau sawvdaws xav:
– Li cas ces yog kev ntseeg tuag?
– Yakaunpaus siv qhov pivtxwv twg los piav qhia txog hom kev ntseeg no?
– Yuav ua li cas kom peb paub tias yus txojkev ntseeg yog kev ntseeg ciaj lossis kev ntseeg tuag?
Vajluskub ua tabpov qhia meej tias leejtwg ntseeg Tswv Yexus ces yuav tsis raug txiav txim, yuav hla dhau kev tuag los txais txojsia (Yauhas 3:18; 5:24). Tiamsis, nyob hauv ntu Vajluskub hnub no, Yakaunpaus hais tawm ib qhov tseeb uas ua rau muaj kev xav tsis thoob, ntawd yog: “Yog nej hais tias nej ntseeg, tiamsis nej tsis ua ib yam haujlwm tshwm, ces nej txojkev ntseeg twb tuag lawm” (nqe 17). Lolus “tuag” hauv no tseem muaj dua ib lub ntsiab tias “tsis muaj kuab, tsis muaj nqis dabtsi”, yog xav hais tias ntawd tsis yog kev ntseeg tseeb, tsis coj mus rau txojkev cawm dim. Yakaunpaus tabtom sau ntawv xa mus rau cov “kwvtij uas ntseeg peb tus Tswv Yexus Khetos tus uas muaj tshwjchim loj” (nqe 1), yog cov neeg uas twb paub thiab txais yuav Tswv Yexus. Txawm tsis hais qhia meej tes haujlwm uas “ua los” ntawm kev ntseeg yog tej haujlwm twg, tiamsis dhau tej uas Yakaunpaus sau qhia hauv tsab ntawv no, peb muaj peevxwm totaub ntawm yog ib lub neej uas mloog tus Tswv lus, hwm tus Tswv, thiab hlub lwm tus. Twb yog vim tes haujlwm uas mloog ua raws li tus Tswv tej lus ua timkhawv qhia tias txojkev ntseeg ntawd yog kev ntseeg ciaj sia. Dua li ntawd, yog lub neej tsis muaj dabtsi hloov pauv ces yuav tau ceevfaj ntawd yog ib txojkev ntseeg tuag, vim tus ntseeg Yexus tseeb yog “ib tug neeg uas tau tsim dua tshiab” (2 Kauleethaus 5:17), txhais tau hais tias muaj kev txawv meej pem nruab nrab ntawm lub neej yav dhau los thiab tom qab ntseeg tus Tswv.
Yakaunpaus hais tawm ib qhov pivtxwv meej pem txog hom kev ntseeg tuag uas tau qhia tshwm dhau los kev noj nyob, kev ua rau lwm tus hauv lub neej txhua hnub. Thaum ntsib ib tug neeg muaj lub neej txomnyem, cov neeg uas muaj txojkev ntseeg tuag, tsuas paub hais tawm tej lus txhawb zog zoo li muaj lub siab hlub tshua heev, tiamsis qhov tseeb ho tsis cev tes pab ib yam dabtsi meej pem (nqe 15-16). Txojkev ntseeg uas tus neeg ntawd muaj tsuas yog ib plab kev paub, tej kevcai ntseeg nyob hauv hlwb, tiamsis tej ntawd yeej ua tsis tau haujlwm dabtsi nyob rau hauv nws txojkev ua neej, tsis muaj kev mloog lus. Txojkev ntseeg zoo li ntawd yog kev ntseeg tuag thiab txaus ntshai tshajplaws, vim nws ua rau tus neeg uas muaj txojkev ntseeg zoo li ntawd xav yuam kev hais tias yus twb ntseeg, twb tau qab siab heev lawm, tiamsis qhov tseeb tsis yog li ntawd (Mathais 7:21-23).
Txawm tias hauv peb cov tsis muaj leejtwg muaj cai los mus txiav txim rau lwm tus txojkev ntseeg tias yog tseeb lossis cuav, yog kev ntseeg ciaj lossis kev ntseeg tuag, tiamsis raws li tej uas Yakaunpaus qhia, kuj ib yam li txoj cai uas Tswv Yexus tau hais tawm tias “saib txiv ces paub ntoo” (Mathais 12:33), Vajtswv cov menyuam tsis tsimnyog muaj lub neej zoo li neeg ntiajteb, lossis zoo li dab Ntxwgnyoog cov menyuam. Los ntawm Vaj Ntsujplig tej dej txiv, los ntawm kev mloog tus Tswv lus nyob hauv ib tug neeg lub neej thiaj yog qhov timkhawv meej pem tshaj qhia rau peb pom tias tus neeg ntawd tabtom muaj txojkev ntseeg ciaj sia tsis yog kev ntseeg tuag.
Thov Vajtswv,
Vaj Ntsujplig, thov koj tshuaj saib nyuam yaus lub siab thiab taw qhia rau nyuam yaus pom nyuam yaus txojkev ntseeg. Thov kom nyuam yaus txojkev ntseeg yuav qhia tshwm dhau los ntawm kev ua neej muaj lub siab hlub thiab nqis tes pab tej neeg nyob ib ncig. Thov kom nyuam yaus txojkev ntseeg yog txojkev ntseeg uas ciaj sia thiab qhia tshwm Koj lub tshwjchim, pab ntau tug zeem paub Txojmoo Zoo lub hwjchim. Nyuam yaus tuav Yexus Khetos lub npe thov, A-mees.
Peb lub neej txhua hnub puas qhia tshwm koj tabtom muaj hom kev ntseeg twg?
Nyeem Vajluskub hauv peb lub xyoo: 2 Xamuyees 18
Kênh Youtube BHKTHN:
