Klei Aê Diê Blŭ: Y‑Yakơ 2:14-17
Êlan kliăng: “…tơdah mâo knŏng klei đăo amâo mâo ôh bruă bi êdah, klei đăo anăn djiê leh.” (Y‑Yakơ 2:17)
Klei êmuh ksiêm mĭn: Si jing klei đăo djiê? Ya klei Y‑Yakơ yua leh čiăng lač kơ klei đăo anei? Si ngă čiăng drei thâo klei đăo pô jing klei đăo hdĭp amâodah klei đăo djiê?
Klei Aê Diê Blŭ rơ̆ng hlei phung đăo kơ Khua Yang Yêsu amâo srăng tŭ klei bi kmhal ôh, srăng dưi hŏng klei djiê leh anăn truh kơ klei hdĭp (Y‑Yôhan 3:18; 5:24). Khădah snăn, hlăm trăn Klei Aê Diê Blŭ hruê anei, Y‑Yakơ lač kơ sa klei sĭt bi kngăr snăk, anăn jing :“…tơdah mâo knŏng klei đăo amâo mâo ôh bruă bi êdah, klei đăo anăn djiê leh” (êlan 17). Boh blŭ “djiê” tinei lŏ mblang jing “amâo dưi ba yua ôh, hơăi mang”, klei čiăng blŭ anăn jing amâo djŏ klei đăo sĭt ôh, amâo ba kơ klei bi mtlaih ôh. Y‑Yakơ dôk čih hră kơ phung “diih tui hlue klei đăo kơ Khua Yang drei Yêsu Krist” (êlan 1), jing phung thâo leh, leh anăn đăo kơ Khua Yang Yêsu. Wăt tơdah amâo lač klă ôh bruă klei đăo “mâo” klă klơ̆ng jing ya bruă, ƀiădah mơ̆ng klei Y‑Yakơ lač leh hlăm hră anei, drei thâo săng anăn jing sa klei hdĭp gưt asăp Khua Yang, huĭ mpŭ kơ Khua Yang, leh anăn khăp kơ phung mkăn. Mơ̆ng bruă ngă gưt hlue si Klei Aê Diê Blŭ bi mklă klei đăo anăn jing klei đăo hdĭp. Bi tơdah klei hdĭp amâo mâo ôh klei bi mlih snăn kăp răng bĕ anăn jing sa klei đăo djiê, kyua phung đăo kơ Khua Yang sĭt jing “mnuih hrih mrâo” (II Kôrantô 5:17), jing mâo klei mdê klă mngač plah wah klei hdĭp êlâo leh anăn êdei kơ đăo kơ Khua Yang.
Y‑Yakơ lač kơ sa klei bi hmô klă mngač kơ klei đăo djiê bi êdah hlăm klei dôk dơ̆ng ƀơ̆ng huă, blŭ tlao nao hriê hŏng pô mkăn hlăm klei hdĭp grăp hruê. Tơdah bi tuôm hŏng sa čô mnuih mâo klei hdĭp dleh dlan, phung mâo klei đăo anei knŏng mâo klei bi juh msĕ si bŏ hŏng klei mđing uêñ pap mñai ƀiădah boh sĭt amâo mâo ya mta bruă ngă čiăng đru ôh (êlan 15-16). Klei đăo pô anăn mâo knŏng jing klei thâo, klei hriăm hlăm kŏ dlô, ƀiădah amâo mâo ôh ya klei hmăi kơ knuih hdĭp, amâo mâo ôh bruă ngă gưt asăp. Klei đăo snăn jing klei đăo djiê leh anăn huĭ hyưt snăk, kyua ñu ngă kơ phung mâo klei đăo djiê čhuai pô đăo leh, êđăp ênang leh, ƀiădah sĭt nik jing hơăi mang (Y‑Mathiơ 7:21-23).
Wăt tơdah amâo mâo ôh hlei pô hlăm phung drei mâo klei dưi phat kđi klei đăo pô mkăn jing sĭt amâodah mgưt, jing hdĭp amâodah djiê, khădah snăn, msĕ si klei Y‑Yakơ lač leh, ăt msĕ si klei bhiăn Khua Yang Yêsu ktrâo lač leh jing “dlăng boh thâo ana” (Y‑Mathiơ 12:33), phung ƀuôn sang Aê Diê amâo dưi mâo ôh klei hdĭp msĕ si mnuih ti lăn ala, amâodah msĕ si anak yang jhat. Boh mơ̆ng Yang Mngăt Jăk, jing klei hlue gưt asăp Khua Yang hlăm klei hdĭp sa čô mnuih jing klei bi mklă mngač hĭn brei ƀuh pô anăn jing pô mâo klei đăo hdĭp amâo djŏ jing klei đăo djiê ôh.
Knuih hdĭp drei grăp hruê bi êdah ya mta klei đăo drei dôk mâo?
Wah lač: Ơ Yang Mngăt Jăk, akâo kơ Ih ksiêm dlăng ai tiê kâo leh anăn brei kâo ƀuh klei đăo pô. Akâo kơ Ih đru klei đăo kâo srăng bi êdah hlăm klei khăp leh anăn bruă ngă đru phung riêng gah. Akâo kơ Ih đru klei đăo kâo jing klei đăo hdĭp leh anăn bi lar klei guh kơang Ih, đru lu mnuih thâo kral klei myang Klei Mrâo Mrang Jăk bi mtlaih. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 18
Kênh Youtube BHKTHN: