Klei Aê Diê Blŭ: Klei Kbiă 37:1-9
Êlan kliăng: “Phung ƀuôn sang Israel ngă jih jang bruă anăn tui si Yêhôwa mtă leh kơ Y-Môis” (Klei Kbiă 39:42)
Klei êmuh ksiêm mĭn: Hip klei bi mguôp leh anăn kđhăp klei pap brei hlei pô ngă leh anăn si arăng ngă? Anôk dưm dua mta mnơ̆ng doh jăk anei hlăm Sang čhiăm brei thâo si klei khăp Aê Diê? Si drei wĭt ngă hŏng klei bhiăn leh anăn klei pap Aê Diê?
Y-Bêsalel jing mnuih Aê Diê ruah ngă khua êpul rŭ mdơ̆ng ăt jing mnuih Aê Diê ruah ngă Hip klei bi mguôp leh anăn kđhăp klei pap brei jing dua kdrăp anôk doh jăk hĭn, brei ƀuh klei mpŭ leh anăn hnơ̆ng yuôm bhăn mơ̆ng dua kdrăp anei.
Y-Bêsalel ngă leh hlue si klei Aê Diê ktrâo hlăm Klei Kbiă 25:10-22, mơ̆ng mnơ̆ng dhơ̆ng leh anăn boh prŏng Hip klei bi mguôp, pă boh kwang mah dưm ti pă bĭt kiêng, giê kkung hŏng kyâo akasi, leh anăn luôm digơ̆ hŏng mah hlue si klei Aê Diê mtă. Hlăm lam Hip klei bi mguôp pioh Pluh Mta Klei Bhiăn mơ̆ng kngan Aê Diê čih ti dlông dua boh tâo (Klei Kbiă 25:16). Kđhăp klei pap brei hŏng mah doh mâo boh prŏng msĕ si Klei Aê Diê Blŭ mtô leh. Dua rup čêrubim hŏng mah arăng tia ti dua bĭt knhal kđhăp klei pap brei mblang siap diñu phă dlông, guôm hŏng siap diñu kđhăp klei pap brei, leh anăn ƀô̆ diñu bi anăp mbĭt. Ƀô̆ čêrubim dlăng kơ kđhăp klei pap brei.
Tơdah bi msĕ hŏng ya klei Aê Diê mtô leh kơ rup Sang čhiăm leh anăn rup kdrăp mnơ̆ng hlăm lam anôk doh jăk hĭn, drei ƀuh Y-Bêsalel ngă leh djăp mta klei Aê Diê mtă hŏng klei răng leh anăn djŏ kluôm ênŭm kơ mnơ̆ng dhơ̆ng, boh kroh leh anăn siam hlăm djăp kdrêč. Čiăng dưi ngă snăn, ñu mâo ai tiê huĭ mpŭ kơ Aê Diê, jih ai tiê hlue ngă klei Aê Diê mtô. Ñu ăt thâo săng kơ djăp kdrêč leh anăn hlue ngă djŏ klă hlăm bruă jao leh kơ pô. Gưt asăp Aê Diê kluôm ênŭm leh anăn thâo răng hlăm bruă Aê Diê jing knuih brei mâo mơ̆ng grăp čô drei hruê anei čiăng drei mă bruă kơ Aê Diê ba klei tŭ dưn kơ Aê Diê leh anăn Sang Aê Diê.
Trăn Klei Aê Diê Blŭ anei lŏ brei drei ƀuh hlăm anôk doh jăk hĭn mâo klei bhiăn leh anăn klei pap. Wăt tơdah klei bi mguôp ti krah Aê Diê hŏng phung ƀuôn sang Israel mơ̆ng klei bhiăn (Pluh Mta Klei Bhiăn) ƀiădah kđhăp klei pap brei guôm ti dlông. Klei Bhiăn Aê Diê brei jing klei jăk kluôm ênŭm, hnơ̆ng čuăn čiăng kơ phung ƀuôn sang Aê Diê hdĭp kpă ênô, êđăp ênang leh anăn jăk mơak. Ƀiădah leh lĕ hlăm klei soh, anak mnuih luč leh klei guh kơang Aê Diê, amâo mâo ôh hlei pô dưi ngă kluôm ênŭm klei bhiăn leh anăn dôk kjăp ti anăp Pô doh jăk. Aê Diê ruah dôk ti dlông kđhăp klei pap brei čiăng bi tuôm hŏng Y-Môis leh anăn phat kđi phung ƀuôn sang Ñu. Phung ƀuôn sang Aê Diê hlăm ênuk Klei Bi Mguôp Hđăp leh anăn phung đăo kơ Krist hruê anei thâo sơăi klei khăp leh anăn klei pap Aê Diê êlâo kơ dưi hlue ngă klei bhiăn Ñu. Klei pap Aê Diê êbeh dlai, lŏ dơ̆ng gĭr leh anăn đru kơ drei jing doh jăk hĭn grăp hruê.
Drei thâo mơ̆ klei khăp leh anăn klei pap Aê Diê êbeh dlai hlăm klei hdĭp pô?
Wah lač: Ơ Aê Diê, kâo bi mni kơ Ih kyua Ih jing Pô doh jăk leh anăn bŏ hŏng klei pap. Akâo kơ klei khăp leh anăn klei pap Aê Diê guôm kâo čiăng kâo dưi gưt Klei Aê Diê Blŭ, hdĭp doh jăk, thâo khăp leh anăn bi mơak kơ Ih.
Dlăng Klei Aê Diê Blŭ hlăm tlâo thŭn: Y-Luk 10:38-11:28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
