Klei Aê Diê Blŭ: II Kôrantô 6:16b – 7:1.
Êlan kliăng: “Ơ phung kâo khăp ơi, kyuadah drei mâo klei ƀuăn anăn, brei drei bi doh hĕ drei pô mơ̆ng jih klei čhŏ mrŏ hlăm kđeh leh anăn mngăt, leh anăn bi klă klei doh jăk drei hlăm klei huĭ mpŭ kơ Aê Diê” (II Kôrantô 7:1)
Klei êmuh ksiêm mĭn: Ya klei Aê Diê Pô Myang ƀuăn kơ phung ƀuôn sang Ñu? Si klei ƀuăn anei mtrŭt phung ƀuôn sang tui duah knuih hdĭp doh jăk? Si drei hlue ngă leh klei Aê Diê iêô mthưr?
“Kbiă bĕ”, “bi ktlah bĕ”, “đăm ruêh ôh mnơ̆ng čhŏ” jing klei Yêhôwa mtă kơ phung ƀuôn sang Ñu hlăm ênuk Klei Bi Mguôp Hđăp. Aê Diê čiăng kơ phung ƀuôn sang Aê Diê đăm lŏ dơ̆ng bi mguôp ôh hlăm bruă kkuh mpŭ kơ rup yang hlăk êjai Aê Diê brei leh kơ diñu dưi jing “phung anak êkei leh anăn phung anak mniê” mơ̆ng Pô Mâo Jih Klei Myang (êlan 17-18). Mă hlăm klei Khua pô hưn êlâo Y‑Êsai 52:11, Khua ƀĭng kna Y‑Pôl lŏ mñă thiăm klei iêô mthưr phung đăo brei “…bi doh hĕ drei pô mơ̆ng jih klei čhŏ mrŏ hlăm kđeh leh anăn mngăt” (II Kôrantô 7:1). Klei mđĭ ai ngă kơ diñu brei krơ̆ng knuih hdĭp doh jăk jing klei Aê Diê ƀuăn kơ diñu jing hlei pô thâo “kbiă bĕ”, “bi ktlah bĕ” leh anăn “đăm ruêh ôh mnơ̆ng čhŏ” snăn Ñu srăng jum digơ̆. Ñu srăng jing Ama leh anăn digơ̆ jing anak êkei leh anăn anak mniê ñu. Anei klă sĭt jing klei yuôm bhăn snăk, yuôm bhăn ngă kơ phung đăo kơ Krist gĭr jih ai tiê, bi doh pô mơ̆ng klei soh hlăm kđeh leh anăn mngăt, amâo bi mđua knông mbĭt ôh hŏng phung amâo đăo čiăng dưi doh jăk kluôm ênŭm.
Aê Diê čiăng hmăng dưi ƀuh klei khăp kluôm ênŭm phung ƀuôn sang brei kơ Ñu, kyua anăn hlăm jih hƀuê ênuk, Ñu iêô mthưr leh anăn mñă kơ digơ̆ tui duah knuih hdĭp doh jăk. Êngao anăn, jih ai tiê huĭ mpŭ kơ Aê Diê ăt jing klei amâo dưi kƀah ôh hlăm bruă tui duah klei hdĭp doh jăk. Tơdah amâo huĭ mpŭ kơ Aê Diê klă sĭt drei amâo dưi ñĕ ôh kơ klei hdĭp čhŏ mrŏ mơ̆ng lăn ala, ăt kăn dưi mjưh mdei klei bi mguôp hŏng klei soh. Klei mđĭ ai mtrŭt phung ƀuôn sang Aê Diê jing doh jăk jing hdơr nanao leh anăn đăo kjăp kơ klei Aê Diê ƀuăn.
Sa boh sĭt năng ênguôt jing mâo lu mnuih hlăm phung drei ăt kăn mđing mơh kơ klei yuôm bhăn hŏng klei Aê Diê ƀuăn leh kơ pô, anăn amâo hngah ôh kơ klei soh, ăt bi mguôp amâodah bi mđua knông mbĭt hŏng phung amâo đăo. Sĭt ka “kbiă” mơ̆ng anôk čhŏ mrŏ snăn drei ka thâo săng ôh klei yuôm bhăn Aê Diê brei kơ pô leh anăn ka klă sĭt khăp kơ Aê Diê msĕ si năng brei mâo ôh. Brei drei kmhal leh anăn lŏ wĭt kơ Ñu hlăm hruê anei mtam.
Khua Yang dôk mñă kơ drei brei “bi kbiă” mơ̆ng ya klei soh, “bi ktlah” hŏng hlei pô, leh anăn “đăm ruêh ôh” hlăm ya bruă čhŏ mrŏ?
Wah lač: Ơ Aê Diê Doh Jăk leh anăn bŏ hŏng klei khăp! Kâo mơak bi mni kơ Ih sĭt bi mĭn kơ klei Ih khăp leh kơ kâo. Akâo kơ Ih đru kâo thâo nanao“bi kbiă”, bi ktlah”, “đăm ruê ôh” klei čhŏ mrŏ leh anăn jih ai tiê khăp Ih čiăng dưi mâo klei doh jăk kluôm ênŭm, thâo klei jăk mơak Ih brei kơ phung anak êkei, anak mniê Ih.
Dlăng Klei Aê Diê Blŭ hlăm tlâo thŭn: Y‑Yêrêmi 6:13-30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
