Pajlug 23:6-8
Nqe cim.
“Tsis txhob nrog tus neeg qia dub noj mov saum nws lub rooj lossis zoo siab rau tej zaub mov qab qab uas nws rau los.” (Pajlug 23:6)
Lus nug rau sawvdaws xav.
– Vajntxwv Xalumoos qhia menyuam kawm noj licas?
– Teebmeem thaum noj tus neeg qia dub tej mov yog dabtsi?
– Pebyuav tsum xav li cas ua ntej mus koom lwm tus rooj noj rooj haus?
Vajntxwv Xalumoos qhia menyuam kawm noj ntawm no tsis yog qhia noj licas, tiamsis qhia txog qhov uas puas tsimnyog teb lus mus koom rooj noj rooj haus lossis tsis mus. Raws li ibtxwm, caw koom noj koom haus yog lubcim ntawm kev siab dav thiab kev phoojywg, yog li qhov uas mus nrog tus tswv tsev noj haus yog yam tsimnyog ua los txhawb txojkev sib hlub thiab kev phoojywg. Txawm li ntawd, los thaum “tus neeg qia dub”, lossis neeg cuaj khaum, yog tus neeg siab phem, tuav tswvyim phem caw mus noj mus haus, ces tsis txhob vim nqhis tej zaub mov qab uas nws rau los ho teb lus mus koom. Lo lus “tus neeg qia dub”, yog tus neeg muaj lub qhov muag phem tsis zoo, hais txog tus neeg nplaum lossis qia dub lub qhov muag, tsis zoo li tus neeg siab dawb siab zoo lub qhov muag (Pajlug 22:9). Tus tswv tsev zoo li no yog tus neeg ntsejmuag ncaj siab nkhaus, sab nraud ua txuj ua li tus neeg siab dawb siab zoo tiamsis sab hauv qia dub kawg li. Nws lub ncauj hu hais tias, “Cia li los noj” tiamsis nws lub siab tsis yog li ntawd (nqe 7). Nws tsuas “lam hu”, hais lus dag xwb. Lub ncauj caw tiamsis lub siab tsis xav kom koj chwv txog nws tej zaub mov.
Vajntxwv Xalumoos qhia ntxiv rau menyuam pom qhov teebmeem thaum tseem txhob txwm mus noj tus neeg qia dub, siab phem tej zaub mov hais tias: “Koj yuav ntuav tej uas koj noj lawm tawm, thiab tej lus zoo uas koj hais los yuav tsis muaj qabhau.” Lub ntsiab ntawm lo lus “ntuav…tawm” no qhia txog tej zaub mov xam tsis taus hauv plab, ib nyuag qhov xwb los nyob tsis tau, twb tsis muaj nqis rau lub cev los tseem ua rau tus neeg noj raug sab nkees. Koj yuav nkim sijhawm thiab dag zog thaum mus koom noj haus nrog cov neeg tsis hlub thiab saib tsis taus koj. Koj yuav hnov khuvxim vim noj tej uas tsis muaj nqis tiamsis tseem ua rau koj poob ntsejmuag thiab.
Niaj hnub nimno, sib caw noj haus yog yam uas sawvdaws pheej ua. Muaj tej lo lus caw koom rooj noj rooj haus kawg siab kawg ntsws tiamsis kuj muaj ntau rooj noj haus tsis yog vim kev sib raug zoo tiamsis muaj ntau lub ntsiab nyob hauv. Vim li ntawd, vajntxwv Xalumoos tej lus qhia txog kev kawm noj kuj tseemceeb heev rau peb tiam no. Cov ntseeg yuav tsum xyuamxim, ua tib zoo xav txog tus uas caw mus noj haus nplooj siab thiab kev xav, yog ua li ntawd tsis yog tsuas txuag tau tus kheej lub meejmom xwb tiamsis tseem ua muaj nqis rau lwm tus ntseeg thiab cov tsis tau ntseeg huv tibsi. Timthawj Paulus qhia hais tias: “Yog li ntawd, nej yuav noj yuav haus lossis yuav ua ib yam dabtsi, nej yuav tsum ua kom Vajtswv tau ntsejmuag” (I Kauleethaus 10:31). Txawm kev noj haus yog yam me me xwb, los yog tsis ceevfaj ces yuav ua rau ntsib tej teebmeem tsis zoo, tsis muaj nqis rau tus kheej sab cev nqaij daim tawv, tseem ua teebmeem rau sab ntsujplig thiab. Thov tus Tswv qhia rau peb paub kawm noj kom tsis yog vim tej zaub mov lossis tsis xyuamxim thaum mus koom tej rooj noj haus es ua rau peb raug poob meejmom ntawm tus ntseeg Tswv Yexus. Txhob tsuas xav txog qhov uas tau noj qab ua rau lubneej sab ntsujplig raug teebmeem, thiab ua rau lwm tus ntseeg yuamkev.
Thov Vajtswv,
Tus Tswv, thov ua tsaug vim Koj pub nyuam yaus muaj zaub mov noj txhua hnub. Thov Koj pab nyuam yaus paub xyuamxim thiab ceev tus kheej thaum koom tej rooj noj rooj haus. Txawm yuav noj thiab haus los thov pab nyuam yaus ua kom Koj tau koobmeej. Nyuam yaus tuav Yexus Khetos lub npe thov, Amees.
Peb mob siab txog kev ua rau tus Tswv tau koobmeej hauv kev noj haus licas?
Nyeem Vajluskub hauv peb lub xyoos: Lukas 13
Kênh Youtube BHKTHN:
