Klei Aê Diê Blŭ: Klei Bi Hriêng 23:6‑8
Êlan kliăng: “Đăm ƀơ̆ng ôh mnơ̆ng ƀơ̆ng huă mnuih mâo ală dlăng hŏng klei jhat, đăm tluh ôh kơ mnơ̆ng ƀơ̆ng huă jăk ñu” (Klei Bi Hriêng 23:6)
Klei êmuh ksiêm mĭn: Si Mtao Salômôn bi hriăm anak hlăm klei hriăm ƀơ̆ng? Ya jing boh jhat kơ klei ƀơ̆ng mnơ̆ng ƀơ̆ng huă mnuih jhat? Ya klei brei drei mĭn hĕ bi nik êlâo kơ drei nao kơ klei ƀơ̆ng huă čhưn?
Mtao Salômôn bi hriăm anak ƀơ̆ng tinei amâo djŏ čiăng kñăm kơ klei si srăng ƀơ̆ng ôh, ƀiădah čiăng kñăm kơ klei ư hĕ amâodah hơăi kơ klei arăng jak hriê ƀơ̆ng huă. Bhiăn gơ̆, klei jak hriê ƀơ̆ng huă jing klei bi êdah kơ klei khăp hdơ̆ng mah jiăng leh anăn klei thâo jum tue. Kyuanăn klei ƀơ̆ng huă mbĭt hŏng pô sang jing sa klei bhiăn ngă čiăng bi êdah klei khăp leh anăn ngă klei bi mguôp. Wăt snăn dưn mơh, ƀiădah bi hŏng mnuih “mâo ală dlăng hŏng klei jhat”, jing sa čô mnuih jhat, mâo klei mĭn jhat, amâo djŏ ôh kyua tluh kơ mnơ̆ng ƀơ̆ng huă jăk ñu snăn ư hĕ kơ klei ñu jak. Pruê̆ blŭ “mâo ală dlăng hŏng klei jhat” čiăng lač kơ ală dlăng hŏng klei jhat ƀai sa čô mnuih čuôt klih, mdê hŏng sa čô mnuih kmah mâo ală dlăng hŏng klei thâo pap (Klei Bi Hriêng 22:9). Pô anei jing sa čô mnuih ai ngăm, ti êngao jak hŏng klei kmah snăk ƀiădah hlăm lam ai tiê bŏ hŏng klei čuôt klih. Ƀăng êgei lač: “Ƀơ̆ng mnăm bĕ” ƀiădah ai tiê ñu amâo mĭn msĕ snăn ôh (êlan 7). Diñu knŏng mtrŭt hŏng klei “duah myâo” mă, amâo djŏ hŏng klei sĭt ôh. Ƀăng êgei mtrŭt ƀiădah ai tiê diñu amâo čiăng anak ƀơ̆ng ôh.
Mtao Salômôn msĕ mơh brei anak ƀuh boh jhat tơdah anak ƀơ̆ng mnơ̆ng ƀơ̆ng huă mnuih jhat, anak “srăng ô̆ mnơ̆ng ih ƀơ̆ng leh” leh anăn klei anak blŭ jăk hŏng diñu srăng luč hơăi mang. Boh blŭ “ô̆” tinei čiăng lač kơ klei êhŭng amâo dưi bi lik ôh mnơ̆ng ƀơ̆ng, ƀiă kăn mâo rei, lui bĕ knŏng amâo ba klei jăk kơ asei mlei, lŏ ngă kơ pô ƀơ̆ng êmăn hĭn êjai. Anak srăng bi luč hruê mmông leh anăn ai tiê hơăi mang tơdah ƀơ̆ng huă mbĭt hŏng phung amâo mpŭ leh anăn amâo khăp ôh kơ anak. Anak srăng hƀlŏk tơdah ƀơ̆ng mnơ̆ng ƀơ̆ng huă amâo mâo klei tŭ ôh leh anăn bi luč knuih kơhưm.
Hruê anei, klei bi jak ƀơ̆ng huă jing sa klei bhiăn ngă. Mâo lu klei jak ƀơ̆ng huă hŏng klei sĭt ƀiădah ăt mâo lu mơh klei bơ̆ng huă amâo djŏ kyua klei khăp hdơ̆ng găp ôh ƀiădah mâo lu klei čiăng mkăn hlăm lam ai tiê. Kyuanăn, klei Mtao Salômôn bi hriăm kơ klei hriăm ƀơ̆ng ăt jing yuôm snăk mơh kơ grăp čô drei. Brei phung đăo ksiêm bi nik kơ ai tiê leh anăn klei pô jak hriê ƀơ̆ng huă čiăng, čiăng amâo bi luč knuih kơhưm drei pô leh anăn amâo bi têč hnêč kơ ayŏng amai adei đăo leh wăt kơ phung ka đăo msĕ mơh. Khua ƀĭng kna Y‑Pôl lač: “Snăn thâodah diih ƀơ̆ng huă mnăm, amâodah ya klei diih ngă, ngă bĕ jih čiăng bi guh kơang kơ Aê Diê” (I Kôrantô 10:31). Wăt tơdah klei ƀơ̆ng mnăm jing bruă ngă aguah tlam dưn, ƀiădah tơdah amâo răng ôh sĭt nik srăng ba hriê boh jhat kjham snăk, amâo djŏ knŏng amâo ba klei tŭ kơ asei mlei ôh ƀiădah wăt bi êka kơ ai tiê mơh. Akâo Khua Yang đru grăp čô drei thâo hriăm ƀơ̆ng čiăng đăm kyua mnơ̆ng ƀơ̆ng amâodah kƀah klei răng tơdah nao kơ klei ƀơ̆ng huă snăn bi luč hĕ knuih kơhưm jăk sa čô pô đăo kơ Krist. Đăm ôh knŏng mĭn kơ klei bi hrăp hŏng mnơ̆ng ƀơ̆ng jăk snăn bi hmăi kơ klei hdĭp myang drei pô, leh anăn jing klei bi têč hnêč kơ phung ayŏng adei hlăm klei đăo.
Si drei bi guh kơang kơ Anăn Khua Yang hlăm klei drei ƀơ̆ng leh anăn mnăm?
Wah lač: Ơ Khua Yang, kâo lač jăk kơ Ih kyuadah Ih brei kơ kâo mnơ̆ng ƀơ̆ng huă djăp kơ grăp hruê. Akâo Ih đru kâo thâo răng leh anăn djŏ hnơ̆ng tơdah nao kơ klei huă mnăm, thâodah ƀơ̆ng amâodah mnăm brei kâo ngă jih kyua čiăng bi guh kơang kơ Anăn Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Luk 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
