Klei Aê Diê Blŭ: II Y-Samuel 12:13-23
Êlan kliăng: “Y-Đawit lač kơ Y-Nathan, “Kâo ngă soh leh hŏng Yêhôwa.” Leh anăn Y-Nathan lač kơ Y-Đawit, “Yêhôwa lăm leh klei soh ih; ih amâo srăng djiê ôh.” (II Y-Samuel 12:13)
Klei êmuh ksiêm mĭn: Si klei mtao Y-Đawit lŏ wĭt ngă tơdah hmư̆ khua pô hưn êlâo Y-Nathan hưn mdah klei soh ñu ngă leh? Ya klei brei ƀuh mtao Y-Đawit kmhal sĭt? Ya klei brei drei ngă čiăng kơ Khua Yang pap brei, grăp blư̆ ngă soh?
Tơdah leh khua pô hưn êlâo Y-Nathan hưn mdah hŏng klei blŭ êun găl ƀiădah khut khat, kơ klei soh mtao Y-Đawit mă leh mô̆ Y-Uri leh anăn bi mdjiê mnuih, mtao Y-Đawit amâo hngah mgang klei soh amâodah lŏ ktư̆ ngă wĭt kơ pô hưn klei soh pô ôh msĕ si khăng ƀuh yang đar, ƀiădah mtao luă gŭ dôk hmư̆, tŭ ư klei soh pô ngă leh, leh anăn bi êdah klei kmhal kơ klei soh ti anăp khua pô hưn êlâo Y-Nathan snei: “Kâo ngă soh leh hŏng Yêhôwa”. Mơ̆ng klei kmhal ênguôt hnĭng kơ klei soh anei yơh hruê êdei mtao Y-Đawit čih leh Klei Mmuñ Hđăp 51, hưn mdah klă ai tiê kmhal kơ klei soh, kwưh akâo kơ Aê Diê pap brei.
Wăt tơdah mtao Y-Đawit hưn leh anăn kmhal kơ klei soh, Khua Yang pap brei leh, ƀiădah khua pô hưn êlâo Y-Nathan brei thâo mtao ăt srăng tŭ boh jhat mơ̆ng bruă pô ngă leh (êlan 10-12, 14). Êdei kơnăn, Aê Diê brei anak êkei mtao Y-Đawit hŏng H’Batsêba tŭ klei ruă kjham. Mtao mŭt hlăm adŭ đih ti lăn, kăm ƀơ̆ng huă, hŏng jih ai tiê kwưh akâo kơ Aê Diê pap brei hlăm kjuh hruê, ƀiădah leh anăn hđeh điêt anăn djiê. Tơdah hmư̆ hưn anak êkei djiê leh, mtao Y-Đawit kgŭ mơ̆ng lăn, mnei, leh anăn mia êa mñak kơ ñu pô, leh anăn bi mlih čhiăm ao ñu; leh anăn ñu nao kơ sang Yêhôwa leh anăn kkuh mpŭ (êlan 20). Mtao brei thâo êjai anak adôk hdĭp snăn mtao wah lač kăm ƀơ̆ng huă čang hmăng Aê Diê pap brei leh anăn brei hđeh điêt dưi hdĭp, ƀiădah ară anei gơ̆ djiê leh, snăn mtao đup gưt tui si klei Aê Diê čiăng leh anăn đăo sĭt mtao srăng lŏ bi tuôm hŏng gơ̆ sa hruê êdei (êlan 22-23). Anei jing klă nik knuih kmhal sĭt kơ klei soh leh anăn tŭ ư mă tŭ boh jhat mơ̆ng klei soh pô ngă leh.
Mtao Y-Đawit ngă soh kjham snăk leh, wăt klei soh knhông leh anăn bi mdjiê mnuih. Ƀiădah tơdah mtao thâo kral ñu ngă soh hŏng Aê Diê leh anăn ênguôt hnĭng kmhal sĭt leh anăn Aê Diê pap brei kơ mtao kluôm dhuôm. Mtao Y-Đawit kah mbha klei ñu bi knal hlăm Klei Mmuñ Hđăp 51:17 snei: “Mnơ̆ng ngă yang bi mơak kơ Aê Diê jing ai mĭn mčah;
Ơ Aê Diê, Ih amâo bi êmut ôh kơ ai tiê mčah leh anăn kmhal kơ klei soh.”.
Sĭt yơh grăp čô drei amâo ƀiă blư̆ ôh ngă soh hŏng Aê Diê. Leh anăn tuôm mâo mơh đa blư̆ Khua Yang yua ayŏng adei pô ktrâo klei soh drei ngă leh. Klei yuôm jing si knuih drei wĭt ngă tơdah hmư̆ mnuih mkăn hưn mdah klei soh drei? Klei drei wĭt ngă yơh bi êdah drei kmhal sĭt amâodah hơăi. Akâo kơ Khua Yang brei drei luă gŭ tŭ klei soh drei ngă leh, amâo dêč đuĕ ôh ƀiădah hưn leh anăn kăp kmhal mtam. Khua Yang ƀuăn leh: “Hriê bĕ, brei drei ksiêm mđrăm mbĭt. Wăt tơdah klei soh diih jing hrah huč, diñu srăng jing kô̆ msĕ si pliêr; wăt tơdah diñu jing hrah jŭ, diñu srăng jing kô̆ msĕ si mlâo biăp.” (Y-Êsai 1:18). Amâo amâo ôh klei soh prŏng đei tơl Khua Yang amâo dưi pap brei, knŏng brei drei kmhal sĭt leh anăn kwưh akâo kơ Khua Yang pap brei.
Si ngă drei hmiêt mkăp hưn leh anăn kmhal klei soh, čiăng dưi mă tŭ klei Khua Yang pap brei mơ̆?
Wah lač: Ơ Yang Mngăt Jăk, bi mni lač jăk kơ Khua Yang kơ klei Ih ƀuăn pap brei klei soh tơdah kâo kmhal sĭt. Akâo Khua Yang ƀuah, ktrâo brei kâo thâo kral klei soh kâo ngă leh hŏng Khua Yang, leh anăn đru kâo luă gŭ tŭ klei soh kâo ngă leh, kăp kmhal mtam, hưn klei soh hŏng Khua Yang čiăng dưi mă tŭ klei pap brei mơ̆ng Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y-Yôhan 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
