Klei Aê Diê Blŭ: Y-Mathiơ 7:21-23.
Êlan kliăng: “Amâo djŏ ôh grăp čô hlei pô lač kơ kâo, ‘Ơ Khua Yang, Ơ Khua Yang’ srăng mŭt hlăm ƀuôn ala mtao adiê, ƀiădah knŏng hlei pô ngă tui si Ama kâo hlăm adiê čiăng” (Y-Mathiơ 7:21)
Klei êmuh ksiêm mĭn: Ya klei yuôm bhăn Khua Yang Yêsu bi hriăm čiăng dưi mŭt hlăm Ƀuôn Ala Mtao? Ya ngă Khua Yang lač kơ phung tuôm iêu anăn Khua Yang ngă bruă myang, suôt yang jhat jing phung soh jhat? Ya bruă brei drei ngă čiăng dưi mŭt hlăm Ƀuôn Ala Mtao?
Hlăm trăn Klei Aê Diê Blŭ anei, Khua Yang Yêsu lač klei mâo kơ êdei anăp, boh blŭ “Hruê anăn” hlăm êlan 22 lač kơ hruê phat kđi, srăng mâo lu phung nao kơ Khua Yang čiăng lač diñu jing anak čô Aê Diê, leh anăn hưn hŏng Aê Diê diñu tuôm yua anăn Aê Diê ngă klei anei klei adih, kñăm dưi tlaih mơ̆ng klei phat kđi hlăm hruê knhal tuč leh anăn dưi mŭt hlăm Ƀuôn Ala Mtao. Lu mnuih năng ai êmuh ya ngă phung anei tuôm yua anăn Khua Yang blŭ klei hưn êlâo, suôt yang jhat, leh anăn yua Anăn Aê Diê ngă lu bruă myang, ƀiădah hlăm hruê phat kđi Khua Yang Yêsu lač hŏng digơ̆ snei: “Kâo amâo tuôm thâo kral diih ôh; đuĕ bĕ mơ̆ng kâo, Ơ phung soh jhat”? Brei drei hdơr, kdrêč Klei Aê Diê Blŭ anei dôk hlăm klei čih lač kơ hdră čiăng thâo kral phung khua pô hưn êlâo soh hŏng khua pô hưn êlâo sĭt. Kyua anăn, sa čô mnuih dưi yua ƀăng êgei yua Anăn Khua Yang čiăng blŭ klei hưn êlâo, ƀiădah amâo jing dŏ Khua Yang ôh leh anăn amâo “ngă tui si Ama kâo hlăm adiê čiăng” (êlan 21b). Amâo dah ăt mâo mnuih blŭ yua Anăn Khua Yang ngă bruă myang, ƀiădah klă sĭt klei dưi anăn amâo kbiă hriê mơ̆ng Aê Diê ôh.
Klei Khua Yang Yêsu brei ƀuh klei blŭ leh anăn bruă mă nah êngao mơ̆ng sa čô mnuih amâo djŏ jing klei dưi čiăng mŭt hlăm Ƀuôn Ala Mtao. Khua Yang bi mklă knŏng phung hluê ngă klei Aê Diê Ama hlăm adiê čiăng kơh dưi mŭt hăm Ƀuôn Ala Mtao. Blŭ mkăn jing, knŏng phung hmư̆ Klei Aê Diê Blŭ leh anăn hluê ngă klei Aê Diê čiăng snăn klei blŭ leh anăn bruă mă mơ̆ng diñu mâo ênoh hlăm hruê knhal tuč. Dŭm klei drei blŭ amâo dah ngă hlăm djăp bruă prŏng amâodah điêt brei bi êdah klei drei đaŏ knang hlăm Khua Yang Yêsu amâo djŏ knŏng jing mă boh blŭ jăk siam ti kƀuê ôh.
Đa đa mnuih mâo klei thâo kơ Klei Aê Diê Blŭ, dưi tŭ mă sa mta bruă hlăm Sang Aê Diê, năng ai gĭr hur har ngă djăp bruă hlăm Sang Aê Diê, năng ai dưi mâo lu mnuih bi mni…. Ƀiădah jih jang dŭm klei anăn ka djŏ jing klei găl dưi mŭt hlăm Ƀuôn Ala Mtao ôh. Klei yuôm bhăn hĭn jing hriăm thâo klei Aê Diê čiăng leh anăn gưt hluê ngă. Boh sĭt, mâo lu mnuih thâo lu Klei Aê Diê Blŭ ƀiădah klei hdĭp diñu mklăk wĭt hŏng Klei Aê Diê Blŭ, anăn bi msoh kơ lu mnuih. Čiăng dưi hdĭp hŏng Khua Yang leh anăn hluê ngă Klei Aê Diê Blŭ hlăm grăp hruê, brei drei dôk hlăm klei bi mguôp hŏng Aê Diê, knang kơ Yang Mngăt Jăk atăt gai ai tiê klei mĭn leh anăn đru drei grăp knhuang hdĭp hŏng Klei Aê Diê Blŭ mtô.
Drei hlăk knŏng thâo lač kơ Aê Diê hĕ amâodah hdĭp djŏ hŏng Klei Aê Diê Blŭ mơ̆?
Ơ Khua Yang, jing pô bi mtlaih kâo, akâo kơ Ih đru kâo thâo săng kơ Ih jing bruă ngă klă klơ̆ng hlăm klei hdĭp kâo grăp hruê. Akâo kơ Ih đru kâo dưi hdĭp hluê ngă tui si klei čiăng Aê Diê Ama hlăm adiê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 4:1-5:5
Kênh Youtube BHKTHN:
