Klei Aê Diê Blŭ: Klei Kbiă 25:31-40
Êlan kliăng: “Brei ih ngă sa ƀĕ jơ̆ng diăn hŏng mah doh; jơ̆ng diăn anăn arăng srăng ngă hŏng mah tia, jơ̆ng ñu, asei ñu, kčok ñu, boh kŏ ñu, leh anăn mnga ñu srăng jing hlăm sa đrông. Năm ƀĕ adhan srăng kbiă tĭng djiêu, tlâo ƀĕ tĭng sa nah leh anăn tlâo ƀĕ tĭng sa nah mkăn” (Klei Kbiă 25:31-32).
Klei êmuh ksiêm mĭn: Mnơ̆ng mkra, hdră mkra leh anăn ênoh pui diăn lač kơ ya mta klei yuôm bhăn mơ̆ng jơ̆ng pui diăn? Ya klei jơ̆ng pui diăn djŏ tuôm hŏng phung ƀuôn sang Aê Diê hruê anei? Hŏng ya hdră arăng dưi ƀuh klei Khua Yang kiă kriê hlăm klei hdĭp drei?
Ăt msĕ si mnơ̆ng dhơ̆ng mkăn hlăm anôk doh jăk hlăm Sang Čhiăm, arăng ngă jơ̆ng pui diăn hŏng mah doh jing mnơ̆ng yuôm bhăn bi hmô kơ klei mdrŏng sah guh kơang, hơĭt kjăp leh anăn doh jăk kơ sa čô Mtao. Arăng mkra mjing jơ̆ng pui diăn siam snăk, msĕ si sa ana boh amandê, mâo năm ƀĕ adhan kbiă tĭng djiêu, mâo sa boh kŏ leh anăn mnga ñu dưi dăp bi knar hlăm asei leh anăn dŭm ƀĕ adhan. Ana boh amande jing sa hlăm mta ana mblang mnga tal êlâo hlăm yan Mnga ti krĭng giăm Ngŏ boh lăn, bi hdơr kơ klei jăk Aê Diê hlăk Ñu hrih mjing war Êđen jăk siam leh anăn mâo lu mta boh kroh, Aê Diê srăng mkăp êbeh dlai djăp mta mnơ̆ng kơ phung ƀuôn sang mơak dưi dưn.
Arăng dưm jơ̆ng pui diăn tlă anăp hŏng jhưng dưm kpŭng myơr kơ Aê Diê, nah Dhung anôk doh jăk. Klei mngač mơ̆ng jơ̆ng pui diăn bi êdah klei guh kơang Yêhôwa. Grăp blư̆ Aê Diê dôk ti čư̆ Sinai, phung ƀuôn sang ƀuh pui ƀơ̆ng ti dlông čư̆. Jih jang mâo kjuh boh pui kđen hlăm jơ̆ng pui kđen, bi hmô kơ kjuh hruê Aê Diê hrih mjing leh anăn tuôr mông anei dưi lŏ wĭt hluê si klei Aê Diê bi mklă hruê Sabat, thŭn Sabat. Kjuh boh pui ăt bi hdơr kơ klei Khua ƀĭng kna Y‑Yôhan čih kơ kjuh boh Sang Aê Diê hlăm Klei bi êdah kdrêč 1-3. Jơ̆ng pui kđen mtrang kơ phung khua ngă yang mă bruă hlăm Sang čhiăm. Pui mtrang jơ̆ng pui diăn yua čuh ti êngao čhiăm păng hip klei bi mguôp hlăm sang čhiăm bi kƀĭn leh anăn čuh mnơ̆ng ngă yang nah êngao sang čhiăm. Phung khua ngă yang klam bruă dưm nanao êa pui hlăm jơ̆ng pui diăn čiăng kơ pui kđen trơ̆ng nanao (Klei Kbiă 27: 20-21; Bruă Lêwi 24: 1-4).
Jơ̆ng pui kđen jing klei bi hmô kơ Khua Yang Yêsu, Khua ƀĭng kna Y‑Yôhan čih leh: “Klei mngač anăn jing klei mngač sĭt, tơdah Ñu truh ti lăn ala, Ñu mtrang kơ grăp čô mnuih” (Y‑Yôhan 1:9). Khua Yang Yêsu bi mklă snei, “Hlei pô tui hlue kâo amâo srăng êbat hlăm klei mmăt ôh, ƀiădah srăng mâo klei mngač kơ klei hdĭp.” (Y‑Yôhan 8:12b). “Êjai kâo dôk hlăm lăn ala, kâo jing klei mngač kơ lăn ala.” (Y‑Yôhan 9:5). Khua Yang Yêsu ăt bi msĕ phung ƀĭng kna jing klei mngač: “ Diih jing klei mngač kơ lăn ala…msĕ mơh brei klei mngač diih mtrang ti anăp mnuih, čiăng kơ diñu dưi ƀuh bruă jăk diih ngă leh anăn diñu mpŭ mni kơ Ama diih hlăm adiê.” (Y‑Mathiơ 5:14,16). Klei hdĭp phung ƀuôn sang Aê Diê brei mtrang klei mngač Aê Diê čiăng mơ̆ng klei hdĭp bi êdah klei đaŏ drei lu mnuih thâo kral Aê Diê leh anăn nao giăm Ñu.
Ya klei Aê Diê čiăng diih hluê ngă mơ̆ng klei hriăm hruê anei?
Wah lač: Ơ Khua Yang, kâo bi mni lač jăk kơ Ih mtrang leh, lŏ bi hdĭp mngăt kâo mơ̆ng klei djiê, brei kâo jing mnơ̆ng mtrang klei mngač Khua Yang kơ grăp čô mnuih. Akâo kơ Yang Mngăt Jăk bi bŏ hlăm kâo čiăng kơ pô mkăn ƀuh Aê Diê hlăm klei hdĭp kâo thâo huĭ mpŭ.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 19
Kênh Youtube BHKTHN:
