Klei Aê Diê Blŭ: Klei Mtô Mñă Klei Bhiăn 16:1-8
Êlan kliăng: “Brei diih hdơr pioh ƀơ̆ng knăm Klei Găn kơ Yêhôwa Aê Diê diih hlăm mlan Abip; kyuadah hlăm mlan Abip yơh Yêhôwa Aê Diê diih atăt diih kbiă leh mơ̆ng čar Êjip êjai mlam.” (Klei Mtô Mñă Klei Bhiăn 16:1).
Klei êmuh ksiêm mĭn: Aê Diê čuăn kơ phung ƀuôn sang Ñu brei djă pioh knăm Ƀơ̆ng Klei Găn hlăm ya mlan leh anăn ya bruă brei ngă? Ya klei kñăm kơ jih jang klei Aê Diê mtă brei phung ƀuôn sang Ñu ngă hlăm knăm Ƀơ̆ng Klei Găn? Ya klei brei drei ngă čiăng bi êdah klei thâo hdơr knga kơ Khua Yang?
Trăn Klei Aê Diê Blŭ anei čih yăl dliê kơ klei Aê Diê mtô phung ƀuôn sang Israel kơ hdră bhiăn djă pioh knăm Ƀơ̆ng Klei Găn hlăk diñu mŭt dôk hlăm čar Aê Diê Ƀuăn. Grăp thŭn, brei phung ƀuôn sang Aê Diê mkra knăm Ƀơ̆ng Klei Găn hlăm mlan mdiê ƀlĕ (jing mlan Abip, kơ êdei pia mlan Nisan, hlăm brô mlan tlâo amâodah mlan pă tui si tĭng hruê ară anei), čiăng bi hdơr klei Aê Diê bi mtlaih phung ƀuôn sang kbiă mơ̆ng čar Êjip. Hlăm knăm anei, klei čuăn ƀơ̆ng kpŭng amâo mâo kpei hlăm kjuh hruê čiăng mñă kơ phung ƀuôn sang Israel hdơr kơ hruê diñu tlaih mơ̆ng klei jing hlŭn ti čar Êjip hŏng klei jêč ruăt tơl amâo djăp mmông čiăng bi lŭk kpei leh anăn dôk guôn kpŭng buk ôh.
Djăp mta klei Aê Diê mtă kơ phung ƀuôn sang Ñu brei ngă hlăm hruê knăm anei kñăm đru diñu hdơr kơ klei yuôm bhăn hlăm bruă Aê diê bi mtlaih aê đưm diñu tlaih mơ̆ng čar Êjip. Drei ƀuh klei anăn hŏng bruă Aê Diê mtă kơ diñu myơr êđai biăp, ƀơ̆ng kpŭng amâo mâo kpei, leh anăn brei myơr mnơ̆ng ngă yang tlam mmăt hlăk yang hruê lĕ. Dưi lač knăm Ƀơ̆ng Klei Găn jing sa knăm mâo lu mta rup hdĭp, čiăng đru phung ƀuôn sang Aê Diê amâo djŏ knŏng djă pioh knăm bi leh klei bhiăn, ƀiădah srăng đru diñu thâo săng ya klei aê đưm diñu tuôm găn leh, mbĭt anăn mñă kơ phung ƀuôn sang Aê diê amâo dưi wơr bĭt ôh klei bi mtlaih mơ̆ng Aê Diê mâo jih klei myang mâo jih klei dưi ngă leh kơ găp djuê diñu.
Sĭt yơh grăp čô drei tuôm bi knal leh klei Khua Yang bi mtlaih klei hdĭp drei. Ƀiădah, drei jing phung mnuih djăl wơr bĭt. Knŏng ƀiă hruê êdei kơnăn, drei ênưih pưih wơr bĭt jih klei yuôm bhăn Khua Yang ngă leh kơ klei hdĭp drei. Tơdah tuôm hŏng angĭn êbŭ êa poh yă truh kơ klei hdĭp, drei rŭng răng huĭ hyưt, đing đăo kơ Khua Yang, leh anăn wơr bĭt lu blư̆ leh Khua Yang tuôm ngă bruă prŏng prĭn kơ drei. Brei drei hdơr, phung ƀuôn sang Israel amâo djŏ djă pioh knăm Ƀơ̆ng Klei Găn knŏng sa blư̆ hlăm klei hdĭp diñu ôh, ƀiădah diñu djă pioh knăm anăn grăp thŭn čiăng bi hdơr leh anăn bi êdah klei thâo hdơr knga kơ Aê Diê kluôm jih klei hdĭp diñu. Grăp čô drei leh anăn gŏ sang drei brei bi mâo hĕ hruê mmông dôk hjăn mdê, čiăng lŏ dlăng wĭt jih bruă Aê Diê ngă leh kơ klei hdĭp drei, čiăng bi êdah klei drei thâo hdơr knga kơ Khua Yang, mbĭt anăn čiăng bi mđĭ ai klei đăo drei pô leh anăn gŏ sang kơ jih klei pap Khua Yang brei.
Si ngă drei jêñ mơ̆ bi hdơr leh anăn bi mni kơ Khua Yang kơ jih klei Khua Yang ngă leh kơ drei?
Wah lač: Ơ Khua Yang, jing Pô khăp kơ kâo leh anăn bi mtlaih kluôm jih asei mlei, mngăt ai tiê kâo hŏng klei Anak Aê Diê djiê ti kyâo bi kal. Akâo Khua Yang brei kâo hdĭp kluôm jih klei hdĭp thâo hdơr knga bi mni kơ Khua Yang amâo tuôm mdei.
Dlăng Klei Aê Diê Blŭ hlăm tlâo thŭn: Klei Bi Hriêng 20:1‑30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
