Klei Aê Diê Blŭ: II Kôrantô 12:7-10
Êlan kliăng: “Tlâo blư̆ kâo kwưh kơ Khua Yang mă mđuĕ klei anăn mơ̆ng kâo” (II Kôrantô 12:8)
Klei êmuh ksiêm mĭn: Ti anăp klei dleh dlan dôk găn, ya klei khua ƀĭng kna Y‑Pôl iêô kwưh leh kơ Khua Yang hŏng jih ai tiê? Si knhuah leh anăn si klei ñu bi êdah tơdah leh hmư̆ Khua Yang wĭt lač kơ ñu? Si knhuah ih bi êdah wĭt tơdah klei Khua Yang wĭt lač amâo djŏ tui si klei ih čiăng ôh?
Khua ƀĭng kna Y‑Pôl găn leh lu klei knap mñai leh anăn klei bi kdơ̆ng êjai ktuê jih klei hdĭp ñu mă bruă kơ Khua Yang (II Kôrantô 11:23-29). Ƀiădah lĕ, tal anei klei dleh dlan ñu dôk găn jing klei ngă hlăm asei mlei ñu klei suaih pral ñu pô yơh. Anăn jing mâo sa aruăt êruê tlŏ dôk hlăm klĭt kđeh asei mlei ñu. Wăt tơdah ñu amâo hưn klă nik ôh ƀiădah drei dưi thâo săng klei anăn ngă kơ ñu ruă jhat amâo mâo mdei ôh, tăp năng ngă kơ ñu tơl amâo dưi ngă bruă. Grăp blư̆ “aruăt êruê” anăn ngă kơ ñu ruă snăn knŏng sa mta klei ñu hmăng hmưi jing akâo kơ Khua Yang mă mđuĕ hĕ klei anăn mơ̆ng ñu. Kyuanăn, hŏng jih ai tiê tlâo blư̆ leh ñu akâo kwưh Khua Yang mă mđuĕ hĕ klei anăn mơ̆ng ñu. Ƀiădah Khua Yang lŏ wĭt lač kơ ñu snei: “Klei kâo pap djăp leh kơ ih”. Amâo djŏ ôh Khua Yang amâo mđing uêñ kơ klei ruă ñu amâodah amâo dưi bi hlao kơ ñu, ƀiădah Khua Yang čiăng kơ ñu thâo kral klei myang Khua Yang dôk hlăm ñu. Khua Yang lač klă, “kyuadah klei myang kâo bi êdah klă hlăm klei ih awăt” (êlan 9) kñăm čiăng brei khua ƀĭng kna Y‑Pôl tŭ klei awăt čiăng thâo kral klei myang klă kluôm Khua Yang. Klei anei ăt jing sa êlan hdră brei drei tui ngă hlăm klei hdĭp drei pô, kyuadah thâo kral hĭn klei awăt drei pô, drei srăng srăng thâo kral lu hĭn mơh klei myang leh anăn klei pap Khua Yang.
Khua ƀĭng kna Y‑Pôl hơ̆k mơak tŭ ư klei Khua Yang wĭt lač pioh kơ ñu leh anăn ñu thâo kral sĭt klei pap mbĭt hŏng klei myang Khua Yang ti dlông klei hdĭp ñu. Kyuanăn, ñu hmiêt mkăp “Snăn kyua Krist kâo mơak tŭ klei awăt, klei arăng dlao wač, klei dleh dlan, klei arăng ngă jhat, leh anăn klei jŭ jhat; kyuadah êjai kâo jing awăt, hlăk anăn kâo jing ktang” (êlan 10). Khua ƀĭng kna Y‑Pôl thâo kral “aruăt êruê” jing klei Khua Yang mñă čiăng bi hdơr ñu djă pioh klei luă gŭ, bi ti gŭ ñu pô ti anăp klei ktang myang Khua Yang.
Tơdah drei mâo klei hưn ktưn leh anăn mgao, drei srăng mă tŭ klei guh kơang ti lăn ala anei, amâo djŏ mơ̆ng Khua Yang ôh. Kyuanăn, tăp năng Khua Yang brei phung ktang jing awăt hĭn čiăng kơ klei ktang myang Aê Diê dưi bi êdah klă mngač hĭn. Mâo đa đa klei lông dlăng, klei ruă duam, klei dleh dlan truh hlăm klei hdĭp drei, ƀiădah drei amâo thâo săng ôh, leh anăn drei knŏng thâo iêô kwưh hmăng hmưi Khua Yang bi mtlaih brei mtam, ƀiădah tui si klei khua ƀĭng kna Y‑Pôl găn leh, drei thâo Khua Yang brei klei anăn truh čiăng bi leh ênŭm hdră kñăm jăk Ñu pioh leh kơ klei hdĭp drei. Hdĭp hŏng klei đăo kơ klei pap Aê Diê, mblang jing drei mơak hŏng jih jang klei Aê Diê pioh brei kơ klei hdĭp drei hlăm Khua Yang Yêsu. Anăn yơh jing klei kñăm kơ klei awăt leh anăn klei knap mñai pioh kơ drei.
Si ngă drei gưt tui si klei Khua Yang čiăng mơ̆, tơdah Khua Yang mgaih mkra klei dleh dlan drei tui si klei Ñu čiăng?
Wah lač: Ơ Khua Yang, akâo Ih đru kâo iêô kwưh kơ Khua Yang hŏng jih ai tiê hlăm klei lông dlăng dleh dlan, ƀiădah ăt brei kâo hmiêt mkăp hơ̆k mơak tŭ ư klei Khua Yang wĭt lač, wăt tăp năng kâo amâo thâo săng jih ôh. Brei kâo thâo kral klei ktang myang Khua Yang hlăm klei awăt êdu kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Êsai 66
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
