II Pêtrôs 3:18
“Inh roi lê̆ kơ iĕm thoi noh wă kơ iĕm gơnang kơ Kră Yang bơ̆n Yêsu Krist mă dŏng pơklaih bơ̆n. Thoi noh na tơdrong lui iĕm rai đunh rai wơ̆ kơjăp. Păng inh wă kơ iĕm rai đunh rai hlôh wao tôm tơdrong Sư. Bĕ bôl jơ̆p teh ư-ang Sư đơ̆ng dang ei truh ning-mônh ưh kơ layơ tôch. A-men.” (II Pêtrôs 3:18)
Nơ̆r jet tơchĕng pơwao:
- Pêtrôs pơchŭt lu kon ‘Bok Kei-Dei lăm tơdrong kiơ?
- Kơnhăm lăm tơdrong pơchŭt âu noh tơdrong kiơ?
- Lăm sơnăm ‘nao lu bơ̆n hơpơi wă kơ “yak tơ hơnăp” gah tơdrong kiơ?
Lăm tuch luch kơ kơthơ mă ‘bar âu, Pêtrôs khan lê̆ kơ lu bơngai lui jơ̆p jang gah năr hơ tuch păng năr Kră Yang wă jur dơ̆ng (II Pêtrôs 3:6-10). Hơrĭ kơ noh, kơplah sư wă pơtôch kơ thơ sư đei pơchŭt lu kon ‘Bok Kei-Dei jơ̆p jang, “Inh roi lê̆ kơ iĕm thoi noh wă kơ iĕm gơnang kơ Kră Yang bơ̆n Yêsu Krist mă dŏng pơklaih bơ̆n. Thoi noh na tơdrong lui iĕm rai đunh rai wơ̆ kơjăp. Păng inh wă kơ iĕm rai đunh rai hlôh wao tôm tơdrong Sư. Bĕ bôl jơ̆p teh ư-ang Sư đơ̆ng dang ei truh ning-mônh ưh kơ layơ tôch. A-men.” (trong 18). Nơ̆r “năm tơ anăp” wă khan wơ̆ ‘lŏ, yak tơ hơnăp, kăl kơ pơm rai lơ… ‘nâu jơ̆ nơ̆r athei pơm ngei ưh kơ trŏ tơdrong rơih iŏk kiơ̆ thoi kơdih akâu wă.
Pêtrôs đei roi pơdah ‘bar tơdrong yak năm tơ hơnăp. Mă mônh noh jơ̆ “yak năm kiơ̆ thoi tơdrong mơnat đơ̆ng Kră Yang”, wơ̆ ‘lŏ lăm tơdrong băt mơn kơ tơdrong ‘mêm păng tơdrong mơnat đơ̆ng Kră Yang đei ăn kơ lu bơ̆n. Lu bơ̆n gĭt kơ tơdrong dŏng pơklaih đơ̆ng Kră Yang ăn păng hlôh băt kơ tơdrong gĭt kăl tơdrong mơnat noh. Mă ‘bar noh jơ̆ “yak năm tơ hơnăp lăm tơdrong hlôh băt Kră Yang păng Kră Yang Dŏng Pơklaih bơ̆n noh jơ̆ Kră Yang Yêsu Krist”. “Hlôh băt” wă khan hlôh tơdrong hlơp. Lơ bơngai ưh kơ lui băt kơ Kră Yang, yang kơnê̆ kư̆m băt (Yakơ 2:19). Lu bơ̆n ưh kơ gơh hlôh băt kơ Kră Yang păng tơdrong chĕng bơ̆n đĕch ôh mă lei kăl kơ đei tơdrong tơ ‘bưh hăm Kră Yang. Rai đunh khei năr yak năm hăm Kră Yang bơ̆n kăl kơ rai đunh rai hloi loi gah “tơdrong hlôh băt Kră Yang”. Yua kơ Kră Yang đei dŏng pơklaih bơ̆n, păng bơ̆n gah Sư. Tơdah lu bơ̆n ưh kơ ăn kơ Kră Yang pơm pơtao lăm chăl arih bơ̆n lei bơ̆n ưh kơ gơh arih wă pơ ư ang kơ Anăn Kră Yang lăm teh đak âu nhen thoi tơdrong Pêtrôs hơ pơi wă “…Bĕ bôl jơ̆p teh ư-ang Sư đơ̆ng dang ei truh ning-mônh ưh kơ layơ tôch. A-men.”
Lăm năr blŭng a sơnăm ‘nao, lơ bơngai đei sơkat dih băt lăm tơdrong “wă đei jên tơmam mơ̆t lăm hnam” noh jơ̆ tơdrong hơ pơi wă, mă lei dah wă kơ đei lei ưh kơ đei bu băt. Bơ̆n jing kon Kră Yang bơih lăm năr blŭng a sơ năm ‘nao lu bơ̆n kăl kơ đei jơ năr lăng lăi tơdrong bơ̆n đei kiơ̆ Kră Yang, lu bơ̆n oei “yak tơ hơnăp”, ưh kơ trŏ “wă kơ đei jên tơmam mơ̆t lăm hnam” mă lei “wă kơ rai net lăm tơdrong hlôh băt gah tơdrong mơnat păng tơdrong hlôh băt Kră Yang păng Kră Yang Dŏng Pơklaih lu bơ̆n noh jơ̆ Kră Yang Yêsu Krist” dah ưh? Tơdah lu bơ̆n ưh kơ wơ̆ tơ̆l lăm tơdrong arih gah bơhngol păng rai đunh rai hlôh băt gah tơdrong hlơp ‘Bok Kei-Dei păng hlôh lăm tơdrong dŏng pơklaih lei chăl arih bơ̆n ưh kơ đei pơm kơ Kră Yang lăp đon, ưh kơ pơ ư ang kơ Kră Yang lăm nơ̆r pơma păng tơdrong pơm jang lu bơ̆n. Apinh Kră Yang tơgŭm wă kơ rơhing kơ chă Kră Yang lăm tơdrong krao khan, pơkă pơkăm yak kiơ̆ tơdrong tơ’bôh đơ̆ng Yang Bơhngol ‘Lơ̆ng truh đĭ lăm sơnăm ‘nao âu.
Kơkuh kơ Kră Yang ‘mêm mơnat, bơnê kơ Ih ăn kơ inh bơyan phang ‘lơ̆ng rŏ chơt hiôk. Apinh Ih togŭm inh ling lang kơ rơhing gah tơdrong hlôh băt kơ Kră Yang rai hloh, wă kơ đon lui inh rai wơ̆ tŏk lăm Ih rai hloh, păng chăl arih inh pơ ư ang a-năn Ih rai hloh. Yua anăn Kră Yang Yêsu Krist. Amen
Lu bơ̆n oei yak tơ hơnăp lei mă kơdŭn tơrŏng lăm chăl arih kơ plah kiơ̆ Kră Yang?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: I Kôrintô 7
Kênh Youtube BHKTHN:
