Klei Aê Diê Blŭ: Y-Mathiơ 28:5-7
Êlan kliăng: “Ñu amâo dôk tinei ôh, kyuadah Ñu kbiă lŏ hdĭp leh tui si Ñu lač leh. Hriê dlăng anôk arăng bi mđih Ñu. Leh anăn nao hưn djăl kơ phung ƀĭng kna Ñu: Ñu kbiă lŏ hdĭp leh mơ̆ng phung djiê” (Y-Mathiơ 28:6-7a)
Klei êmuh ksiêm mĭn: Ya ngă phung mniê ƀĭng kna nao čuă anôk arăng bi mđih leh asei mlei Khua Yang? Leh ƀuh ƀăng msat êhŏng, ya klei phung mniê anei srăng ngă? Lông bi mĭn ƀuh lăng, si klei bi mđĭ ai leh anăn klei bi hriăm drei mâo tơdah mŭt dlăng anôk arăng bi mđih Khua Yang?
Anôk arăng bi mđih asei mlei Khua Yang jing ƀăng msat mmăt tĭt, êăt hriêt. Jing anôk bŏ hŏng klei ênguôt hnĭng leh anăn kơŭ kyăm. Leh anăn jing anôk huĭ, ruă knap leh anăn luč klei čang hmăng mơh. Ƀiădah hlăm hruê Khua Yang kbiă lŏ hdĭp, phung dĭng buăl jăk brei phung mniê hriê dlăng anôk arăng bi mđih Ñu. Asei mlei djiê amâo lŏ dôk tinăn ôh, ƀăng msat êhŏng kdŏng, msat êhŏng anăn jing klei hưn bi sĭt kơ klei Khua Yang kbiă lŏ hdĭp leh. Khua Yang lŏ hdĭp, kbiă đuĕ mơ̆ng msat. Dĭng buăl jăk brei phung mniê dlăng anôk arăng bi mđih leh Khua Yang čiăng bi sĭt, leh anăn mơ̆ng anăn “nao hưn djăl kơ phung ƀĭng kna Ñu: Ñu kbiă lŏ hdĭp leh mơ̆ng phung djiê” (êlan 7a). Mmông ênguôt hnĭng êgao leh, leh anăn ară anei jing mmông lŏ wĭt kơ klei hdĭp yang đar mbĭt hŏng phung ƀuôn sang, čiăng hưn Klei Mrâo Mrang Jăk kơ klei kbiă lŏ hdĭp.
Năng ai srăng mâo mmông hlăm klei hdĭp, drei ăt bi ƀuh kơ drei dôk anôk ƀăng msat, hjăn păn tŭ klei ruă, klei ktrŏ, klei ênguôt, luč jih klei čang hmăng. Bi hdơr hruê Khua Yang kbiă lŏ hdĭp thŭn anei, brei grăp čô drei mŭt bĕ anôk arăng bi mđih leh asei mlei Khua Yang čiăng ƀuh jih jang bruă Khua Yang bi ênŭm leh. Wăt hŏng klei djiê Khua Yang ăt dưi mơh, ƀai êjai hĭn amâo mâo sa klei dleh đei ôh hŏng Ñu!
Hruê anei, tơdah mâo “msat” mmăt tĭt drei ăt dôk djă pioh hlăm ai tiê, đăm wơr bĭt ôh, mâo sa boh msat tuôm mđih leh asei mlei Khua Yang – ară anei jing hĕ msat êhŏng. Msat anăn êhŏng kyuadah Khua Yang dôk hdĭp. Msat anăn êhŏng kyuadah ñu jing klei hưn bi sĭt kơ klei dưi hlăm Khua Yang Yêsu.
Hriê dlăng bĕ anôk bi mđih Ñu leh anăn wĭt bĕ hưn klei mrâo mrang jăk anei. Khua Yang Yêsu kbiă lŏ hdĭp leh mơ̆ng phung djiê jing klei sĭt nik hưn brei jih jang mnuih thâo klei čang hmăng kơ klei hdĭp hlŏng lar. Ară anei Khua Yang Yêsu dôk hdĭp jing klei mrâo mrang jăk brei drei hưn kơ jih jang mnuih thâo Khua Yang ăt khăp leh anăn ƀuh digơ̆. Ktuê êlan wĭt kơ Ƀuôn Jăk Ñu srăng êbat mbĭt hŏng hlei pô đăo kơ Ñu.
Anôk bi mđih Khua Yang jing hĕ rup bi hmô kơ klei bi mlih mơ̆ng klei myang klei kbiă lŏ hdĭp. Ƀăng msat mmăt tĭt, êăt hriêt ară anei jing hĕ anôk bŏ hŏng klei čang hmăng, klei khăp leh anăn klei lŏ mñă nanao kơ bruă hiu hưn Klei Mrâo Mrang Jăk.
Si gă drei jhŏng kbiă mơ̆ng msat leh anăn nao hưn klei mrâo mrang jăk kơ klei kbiă lŏ hdĭp leh mơ̆?
Wah lač: Ơ Khua Yang, tơdah ksiêm mĭn kơ klei kbiă lŏ hdĭp, đru kâo hdĭp msĕ si mnuih arăng mđih leh hlăm msat êhŏng, anôk jing rup bi hmô kơ klei dưi leh anăn klei myang dưi mlih klei hdĭp. Đru kâo bi doh hĕ “msat” kâo dôk djă pioh hlăm ai tiê, bi bŏ ai tiê kâo hŏng klei đăo leh anăn klei čang hmăng, čiăng kâo jing ktang kơ Ih. Brei kơ kâo klei pap čiăng kâo mâo klei hur har nao hưn Klei Mrâo Mrang Jăk kơ klei kbiă lŏ hdĭp kơ jih jang mnuih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Bruă Mtao 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
