Klei Aê Diê Blŭ: Êphêsô 4:11‑13
Êlan kliăng: “Tơl jih jang drei truh kơ sa klei đăo msĕ, leh anăn kơ klei thâo kral Anak Aê Diê, kơ klei jing khue prŏng, truh kơ hnơ̆ng klei bŏ ênŭm Krist.” (Êphêsô 4:13)
Klei êmuh ksiêm mĭn: Ya jing klei kñăm brei hung nao bi truh hlăm klei hriăm mjuăt knhuah hdĭp phung đăo? Hŏng si êlan hdră čiăng kơ phung đăo srăng jing khue prŏng, truh kơ hnơ̆ng klei bŏ ênŭm Krist?
Hlăm hră čih Êphêsô 4:13, khua ƀĭng kna Y‑Pôl brei ƀuh, Aê Diê čiăng kơ phung anak ƀuôn sang Ñu thâo kral anôk bi kčah brei hung nao bi truh hlăm knhuang duh leh anăn hriăm mjuăt knhuah hdĭp phung đăo, anăn jing tơl jih jang drei truh kơ sa klei đăo msĕ, leh anăn kơ klei thâo kral anak Aê Diê, kơ klei jing khue prŏng, truh kơ hnơ̆ng klei bŏ ênŭm Krist. Sĭt yơh êjai ti lăn ala anei drei ăt dôk hdĭp hlăm asei mlei kđeh snăn amâo tuôm dưi truh tơl kơ hnơ̆ng klei bŏ ênŭm Krist ôh.
Hŏng si êlan hdră čiăng kơ phung đăo srăng jing khue prŏng, truh kơ hnơ̆ng klei bŏ ênŭm Krist? Klei Khua Yang mtô tinei jing knhuah hdĭp phung đăo drei brei hriăm mjuăt nanao čiăng dôk hlăm knhuang đĭ hriê kơ prŏng leh anăn dưi jing sa phung đăo khue prŏng hlăm klei hdĭp mngăt, grăp hruê jing msĕ si Khua Yang hĭn čiăng kơ hlăm hruê knhal tuč drei srăng truh kơ hnơ̆ng klei bŏ ênŭm Krist. Tơdah mtô kơ klei hdĭp mrâo hlăm Yang Krist, khua ƀĭng kna Y‑Pôl čih hlăm hră Kôlôs 3:9‑10: “Đăm blŭ luar hdơ̆ng diih ôh, kyuadah diih toh hĕ leh mnuih hđăp wăt bruă ñu ngă, leh anăn hơô leh mnuih mrâo, mnuih mrâo anăn Aê Diê dôk bi mrâo hlăm klei thâo săng tui si rup Pô hrih ñu.” Sa čô mnuih mâo knhuah hdĭp “dôk bi mrâo” jing mnuih mâo leh klei bi mlih mrâo, klei bi mlih mrâo anăn ăt dôk bi mrâo êjai ară anei hĭn, leh anăn ăt srăng bi mrâo nanao hlăm hruê ti anăp. Phung đăo knŏng dưi truh kơ hnơ̆ng klei bŏ ênŭm Krist tơdah klei hdĭp ăt dôk bi mlih mrâo nanao grăp hruê. Grăp hruê ƀơ ƀiă, hnơ̆ng hmăr leh anăn hnơ̆ng truh tơl klei bi mlih mrâo grăp čô jing mdê mdê, amâo mâo msĕ ôh pô anei hŏng pô dih, mâo mnuih hmăr, mnuih êmưt, ƀiădah klei Khua Yang čiăng jing jih jang drei brei duh nanao kơ knhuah hdĭp phung đăo, bi mjuăt klei hdĭp mngăt myang čiăng dưi bi mlih mrâo grăp hruê.
Klei yuôm brei drei djă pioh, anăn jing “đăm jing msĕ si phung ênuk anei ôh” (Rôm 12:2), ƀiădah brei Krist yơh jing Pô brei drei tui msĕ čiăng bi mlih mrâo. Brei drei dlăng kơ Khua Yang jing Pô khua leh anăn Pô bi klă klei đăo drei (Hêbrơ 12:2) čiăng êbat ksŭng phă anăp hlăm knhuang êlan tui hlue Khua Yang. Brei drei duh leh anăn hriăm mjuăt knhuah hdĭp phung đăo grăp hruê hŏng klei kñăm čiăng ti hruê knhal tuč drei srăng “jing khue prŏng, truh kơ hnơ̆ng klei bŏ ênŭm Krist”. Ksiêm hriăm Klei Aê Diê Blŭ leh anăn djă pioh klei bi mguôp hŏng Ñu, hŏng klei anăn, Yang Mngăt Jăk srăng đru drei đĭ hriê kơ prŏng hlăm knhuah hdĭp phung đăo.
Si ngă klei hdĭp drei dôk mlih mrâo grăp hruê mơ̆?
Wah lač: Ơ Khua Yang, brei kâo đăm jing msĕ si phung ênuk anei ôh ƀiădah kăp dlăng nanao kơ Khua Yang jing Pô khua leh anăn Pô bi klă klei đăo čiăng kơ kâo djă pioh knhuah hdĭp tui si Klei Aê Diê Blŭ mtô čiăng ti hruê knhal tuč dưi truh kơ hnơ̆ng klei bŏ ênŭm Krist.
Dlăng Klei Aê Diê Blŭ hlăm tlâo thŭn: Y‑Đaniel 4:28‑5:16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
