Khiavdim 3:1-10
Nqe cim:
“Thaum tus TSWV pom Mauxes txav los ze, nws hu Mauxes hauv tsob ntoo ntawd tuaj hais tias, “Mauxes! Mauxes!” Mauxes teb hais tias, “Kuv nyob ntawm no” (Khiavdim 3:4)
Lus nug rau sawvdaws xav:
– Mauxes lub tsam thawj tabtom zoo li cas ua ntej nws hnov tus Tswv lub suab hu?
– Tom qab 40 xyoo uas tau tus Tswv hu, qhia pom tus Tswv tswj Mauxes lub neej zoo li cas?
– Peb ua dabtsi nyob rau lub xyoo tshiab kom hnov tus Tswv lub suab hu?
Plaub caug xyoo khiav nkaum, plaub caug xyoo yug yaj, plaub caug xyoo hnov qab, xav tias ntshai twb muab lub neej zais rau tom tebchaws Midias nrog cov niam tub, nrog tsev neeg, tso tagnrho txhua yam nyob rau yav tom qab…, tej thaum Mauxes twb hnov qab tas txhua yam! Tiamsis txawm yog Mauxes yuav tsis nco txog txhua yam los, tus Tswv yeej tseem nco txog nws. Tibneeg kheev hnov qab tus Tswv tiamsis tus Tswv tsis muaj hnub hnov qab tej uas tus Tswv tsim los. Ncaj tus Tswv lub sijhawm, Nws tau los nrhiav Mauxes, los nqua hu Mauxes. Tus Tswv tuav nkaus npe hu: “Mauxes! Mauxes!” Thiab tus Tswv hais, “Kuv pom kuv haivneeg uas nyob nram tebchaws Iziv raug kev tsimtxom heev, kuv hnov lawv tej suab quaj qw thov kuv pab kom lawv dim ntawm txojkev uas lawv raug yuam ua luag qhev. Kuv paub lawv raug kev txomnyem kawg nkaus li lawm,” (nqe 7). Tus Tswv pom, twb hnov thiab twb paub tas tej kev txomnyem uas Nws haivneeg raug yog li Nws thiaj hu Mauxes cia li rov mus thiab coj tus Tswv haivneeg tawm hauv tebchaws Iziv mus.
Txhua tus lub neej puavleej nyob rau hauv tus Tswv lub luag haujlwm, muaj ntau zaug peb hnov zoo li tsis pom tus Tswv nyob qhov twg, peb tej lus taij thov tsis paub tus Tswv puas hnov, vim tsis pom tus Tswv teb, thooj nkaus li tus Tswv twb tso peb tseg lawm! Txawm li ntawd los tas tej kev xav, tej uas peb hais puavleej tsis muaj nyob hauv Vajtswv lub luag haujlwm thiab tsis yog Vajtswv tus dej siab. Txawm peb yuav nyob rau qhov twg, ua dabtsi, tus Tswv yeej nyob rawv ntawm peb ib sab. Txhua yam xwmtxheej, txhua ntu sijhawm nyob hauv peb lub neej puavleej yog tus Tswv txojkev npaj kom siv peb los rau tus Tswv lub homphiaj. Qhov tseemceeb uas peb cheem tsum nco ces yog tus Tswv ua haujlwm thaum txog Nws lub sijhawm xwb tsis yog ua raws li peb lub sijhawm; tus Tswv ua tej uas tus Tswv xav tsis yog ua raws li tej uas peb xav. Nws yog tus Tswv uas muaj hwjchim, muaj tswvyim, yog Vajntxwv ntawm lub qab ntuj thiab kuj yog peb tus Vajntxwv. Cia li hwm tus Tswv lub luag haujlwm.
Hnub no xiab ob tsiab. Peb tabtom zoo siab txais tej hnub tshiab hauv xyoo tshiab, thov tseg ib ntsis sijhawm los tig saib, puas muaj tej zaug yus nyob hauv lub tsam thawj zoo li Mauxes? Tus Tswv nyob qhov twg lawm? Vim li cas Nws tsis hnov kuv tej lus thov? Thov ruaj siab rau tus Tswv. Peb tau tus Tswv pub muaj phau Vajluskub uas yog Vajtswv Txojlus. Thaum nyeem, kawm tus Tswv tej lus peb hnov tus Tswv lolus hais rau yus. Ntseeg tias thaum txog sijhawm, tus Tswv yuav tuav nkaus peb lub npe hu li nws tau hu Mauxes hnub thaud: “me tub, me tub!” Yuav tsum cia siab ruaj khov rau tus Tswv, ua zoo mloog thiab teb tus Tswv lolus nqua hu tias “menyuam nyob ntawm no!”, peb txhua tus lub neej yuav muaj nqis rau tus Tswv thiab rau coob leej.
Thov Vajtswv,
Tus Tswv, thov zam txim rau nyuam yaus vim muaj ntau zaug nyuam yaus hnov qab Koj, muaj ntau zaug nyuam yaus xav tias Koj twb tso nyuam yaus tseg lawm! Thov tus Tswv koj pab kom nyuam yaus nquag nyeem, kawm Koj tej lus kom hnov tau Koj lub suab hu. Thov pab kom nyuam yaus paub teb Koj lolus nqua hu rau nyuam yaus lub neej. Nyuam yaus tuav Yexus Khetos lub npe thov, A-mees.
Peb puas hnov tus Tswv lub suab hu yus? Peb teb zoo li cas?
Nyeem Vajluskub hauv peb lub xyoo: Phau Ntawv Nkauj 31-32
Kênh Youtube BHKTHN: