Hmư̆ Asăp Aê Diê Iêô – 30/1/2025

481
Trình chơi Audio

 

Klei Aê Diê Blŭ: Klei Kbiă 3:1-10

Êlan kliăng: “Tơdah Yêhôwa ƀuh ñu weh čiăng dlăng, snăn mơ̆ng krah ƀur Aê Diê iêu ñu leh anăn lač, “Ơ Y‑Môis ơi, Y‑Môis ơi.” Leh anăn ñu lŏ wĭt lač, “Nĕ tinei kâo.” (Klei Kbiă 3:4)

Klei êmuh ksiêm mĭn: Si klei jing Y‑Môis êlâo kơ ñu hmư̆ asăp Aê Diê iêô? Aê Diê iêô Y‑Môis leh pă pluh thŭn brei ƀuh si klei Aê Diê kiă kriê klei hdĭp ñu? Ya drei ngă hlăm thŭn mrâo čiăng hmư̆ asăp Aê Diê iêô?

Pă pluh thŭn đuĕ dăp, pă pluh thŭn kiă biăp, pă pluh thŭn wơr hĕ, msĕ si wơr leh klei hdĭp ñu ti krĭng Madian hŏng mô̆ anak, gŏ sang trei mđao, lui ti tluôn jih jang klei…, năng ai Y‑Môis wơr jih leh! Ƀiădah wăt tơdah ñu wơr leh dưn mơh, Aê Diê ăt hdơr kơ ñu. Anak mnuih khăng wơr Aê Diê ƀiădah Aê Diê amâo tuôm wơr ôh mnơ̆ng Ñu hrih mjing. Djŏ wưng kčah Aê Diê, Ñu nao duah leh Y‑Môis čiăng iêô ñu. Aê Diê iêô anăn ñu: “Ơ Y‑Môis ơi, Y‑Môis ơi!” Leh anăn Ñu lač, “Kâo ƀuh leh klei knap mñai phung ƀuôn sang kâo hlăm čar Êjip, leh anăn kâo hmư̆ leh klei diñu ur krao kyua phung khua bruă diñu; kâo thâo kral klei knap diñu” (êlan 7). Aê Diê ƀuh leh, hmư̆ leh leh anăn thâo jih leh klei knap mñai, dleh dlan hĭn phung ƀuôn sang Ñu anăn Ñu iêô Y‑Môis wĭt bĕ leh anăn atăt phung ƀuôn sang Ñu kbiă mơ̆ng Êjip.

Klei hdĭp grăp čô dôk hlăm hdră Aê Diê, lu blư̆ drei ƀuh hlăm ai tiê msĕ si amâo ƀuh ti anôk Aê Diê, Aê Diê hmư̆ mơ̆ klei drei kwưh akâo kyua amâo hmư̆ ôh klei Aê Diê wĭt lač, msĕ si Aê Diê lui drei leh! Khădah snăn jih jang klei drei bi ƀuh, klei drei bi mĭn, klei drei mblang amâo dôk hlăm hdră leh anăn klei Aê Diê čiăng ôh. Wăt tơdah ti anôk drei dôk, ya bruă drei ngă, Aê Diê ăt dôk mbĭt nanao hŏng drei. Djăp klei truh, grăp wưng hlăm klei hdĭp drei jih jang jing klei Aê Diê mprăp čiăng yua drei kơ hdră Ñu kñăm. Klei yuôm bhăn hĭn brei drei hdơr jing Aê Diê mă bruă hlăm wưng Ñu kčah amâo djŏ wưng drei kčah ôh; Aê Diê ngă klei Ñu čiăng amâo djŏ klei drei čiăng ôh. Ñu jing Pô Myang Hĭn, Thâo Mĭn, jing Mtao kơ jih jang lăn adiê leh anăn ăt jing Mtao kơ grăp čô drei. Brei gưt kơ hdră Ñu.

Hruê anei jing Hruê Dua Tết. Drei dôk mơak hlăm hruê yan mnga, akâo kơ phung drei pioh mnĭt mmông dlăng wĭt, mâo mơ̆ tăp năng drei dôk hlăm boh klei msĕ si Y‑Môis mơ̆? Ti anôk Aê Diê? Ya ngă Ih amâo hmư̆ asăp kâo? Akâo kơ phung drei kjăp ai tiê đăo knang kơ Ñu. Aê Diê brei leh kơ drei Klei Aê Diê Blŭ jing Klei Blŭ Aê Diê. Tơdah dlăng, hriăm Klei Aê Diê Blŭ, drei hmư̆ asăp Aê Diê lač kơ pô. Klă sĭt truh wưng djŏ guôp, Aê Diê srăng iêô anăn grăp čô drei msĕ si Ñu iêô leh Y‑Môis mphŭn dô: “Ơ Y‑Môis ơi, Y‑Môis ơi!” Brei kjăp ai tiê hŏng Aê Diê, mđing hmư̆ leh anăn lŏ wĭt lač asăp Aê Diê iêô , “Nĕ tinei kâo!”, klei hdĭp grăp čô drei srăng jing tŭ dưn kơ Aê Diê leh anăn kơ lu mnuih.

Drei hmư̆ asăp Aê Diê iêô pô mơ̆? Si drei lŏ wĭt ngă?

Wah lač: Ơ Khua Yang, akâo kơ Ih pap brei kơ kâo kyua lu blư̆ kâo wơr hĕ Khua Yang, lu blư̆ kâo bi mĭn Aê Diê lui kâo! Akâo kơ Ih đru kâo hur har dlăng, hriăm Klei Aê Diê Blŭ čiăng mđing hmư̆ klei Ih mtô. Akâo kơ Ih đru kâo wĭt lač kơ asăp Ih iêô hlăm klei hdĭp kâo. Kâo wah lač hlăm Anăn Khua Yang Yêsu Krist, Amen.

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.

Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com

Dlăng Klei Aê Diê Blŭ hlăm tlâo thŭn: Klei Mmuñ Hđăp 31-32

Kênh Youtube BHKTHN:

https://www.youtube.com/c/bhkthn

Bài trướcHnov Tus Tswv Lub Suab Hu – 30/1/2025
Bài tiếp theoNghe Tiếng Chúa Gọi – 30/1/2025