Klei Aê Diê Blŭ: Y‑Mathiơ 8:23-27
Êlan kliăng: “Phung anăn bi kngăr, lač, “Hlei mnuih anei jing tơl wăt angĭn leh anăn êa ksĭ gưt kơ Ñu mơh?” (Y‑Mathiơ 8:27).
Klei êmuh ksiêm mĭn: Si Khua Yang Yêsu leh anăn phung ƀĭng kna ngă ti anăp angĭn mbŭ mdê mdê? Si klei đaŏ phung ƀĭng kna dưi đĭ mơ̆ng gưl angĭn êbŭ huĭ hyưt anei? Ya klei mđĭ ai phung drei sĭt tuôm hŏng klei rŭng răng hlăm klei hdĭp?
Khua Yang Yêsu leh anăn phung ƀĭng kna đĭ čhŏng găn hang nah dih êa ksĭ Galilê snăn bhiâo riâo rit tuôm hŏng angĭn êbŭ. Angĭn êbŭ ktang tĭt êgao kơ klei phung ƀĭng kna dưi krơ̆ng, tuôm ƀuh hlăk êjai digơ̆ jing phung trah yao mă kan. Ti anăp klei huĭ hyưt anăn, mâo dua klei mâo mdê mdê mnuih hlăm čhŏng êjai čhŏng dôk đing đưng čiăng kngăm. Sa nah jing Khua Yang Yêsu ăt dôk pĭt amâo mđing ôh kơ angĭn êbŭ; sa nah jing phung ƀĭng kna wăt tơdah tuôm găn leh lu blư̆ angĭn êbŭ hlăm êa ksĭ grăp hruê msĕ si huă êsei aguah tlam, ƀiădah ăt bŏ hŏng klei rŭng răng hyưt huĭ. Klei bi mdê anei mjưh ruĕ mtam leh phung ƀĭng kna kwưh akâo: “Ơ Khua Yang, bi mtlaih hmei bĕ; drei srăng djiê yơh!” (êlan 25).
Klei blŭ tal êlâo leh Khua Yang mdih, jing ƀuah klei đaŏ phung ƀĭng kna, “Yêsu lač kơ digơ̆, ‘Si ngă diih huĭ, Ơ phung mnuih mâo klei đăo điêt?’ Ñu kgŭ mtam, ghă angĭn leh anăn êa ksĭ, snăn mâo klei êngăn yơh” (êlan 26). Phung bĭng kna akâo kơ Khua Yang Yêsu đru leh anăn knŏng sa boh blŭ, êa ksĭ dôk poh yă kriêp êngăn mtam. Khua Yang mâo klei myang dưi bi mtlaih diñu leh anăn Khua Yang knŏng čiăng hlăm diñu sa mta đuč, anăn jing đaŏ kluôm ênŭm kơ Khua Yang.
Tinei brei drei mđing dua mta klei, tal sa, knuih êđăp ênang Khua Yang Yêsu êjai tuôm hŏng angĭn êbŭ ktang “êa poh yă čiăng bi kngăm čhŏng” brei ƀuh Khua Yang mâo klei dưi hlăm angĭn leh anăn êa ksĭ. Tal dua, mơ̆ng klei myang leh anăn Klei Khua Yang ƀuah klei đaŏ phung ƀĭng kna, diñu grăp knhuang dưi đĭ hriê kơ prŏng hlăm klei thâo kral Khua Yang. Êlâo anăn diñu mĭn Khua Yang srăng djiê mbĭt hŏng diñu, ƀiădah ară anei diñu mphŭn êmuh “Hlei mnuih anei jing tơl wăt angĭn leh anăn êa ksĭ gưt kơ Ñu mơh?” (êlan 27b). Pô diñu lui jih djăp mta bruă čiăng tui hluê, tuôm bi êdah leh klei myang bi hlao klei ruă, suôt yang jhat, ară anei lŏ bi êdah klei myang hlăm angĭn êbŭ, êa ksĭ. Snăn hlei Ñu jing? Êa poh yă đru kơ phung ƀĭng kna ƀơ ƀrư̆ thâo kral Khua Yang.
Čhŏng kơ grăp čô phung đaŏ kơ Krist năng ai srăng tuôm hŏng êa poh yă êjai ktuê êlan drei êbat nao kơ Ƀuôn Ala Mtao Adiê. Knŏng čiăng Khua Yang Yêsu ăt dôk hlăm čhŏng klei hdĭp drei snăn amâo mâo sa mta klei dưi mkăn dưi bi kngăm hĕ drei ôh. Mklăk wĭt, kyua dŭm klei truh anăn drei ƀrư̆ bi mguôp klei hdĭp pô hŏng Aê Diê hĭn, klei đaŏ ăt dưi hriê kơ prŏng hlăm grăp mlan. Y‑Yakơ bi hriăm: “Ơ phung ayŏng amai adei, tơdah diih tuôm hŏng klei lông dlăng lu mta, brei diih yap klei anăn jing klei hơ̆k mơak sơăi” (Y‑Yakơ 1:2). Đăm huĭ ôh kơ klei angĭn êbŭ, rŭng răng truh kơ pô, hrô kơ klei anăn brei tŭ mă msĕ si sa klei găl dưi thâo klei myang Aê Diê hlăm klei hdĭp pô.
Drei mâo klei thâo kral Khua Yang lu hĭn mơ̆ leh dŭm klei rŭng răng hlăm klei hdĭp?
Wah lač: Ơ Khua Yang, jing Pô thâo săng dŭm klei êdu awăt anak mnuih. Akâo kơ Ih đru kâo mâo klei êđăp ênang leh anăn đaŏ knang hlăm klei Aê Diê kiă kriê ti krah klei rŭng răng truh, wăt tơdah tăp năng kâo bi mĭn klei rŭng răng anăn dơ̆ng bi kngăm kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 10
Kênh Youtube BHKTHN:
