Lukas 8:40-48
Nqe cim:
“Thaum cov neeg ncaj ncees thov tus Tswv, nws mloog lawv tej lus thov, nws cawm lawv dim ntawm lawv tej kev ntxhov siab.” (Phau Ntawv Nkauj 34:17)
Lus nug rau sawvdaws xav:
– Tus pojniam uas coj khaubncaws tsis tu tuaj cuag tus Tswv thiab tau kho zoo li cas?
– Tus pojniam no lub neej hloov zoo li cas?
– Zaj kawm no pab tau peb ua neej li cas thaum ntsib kev sim siab?
Tswv Yexus tabtom taug kev mus rau hauv Yailus tus uas saib haujlwm hauv tsev sablaj lub tsev, mus kho nws tus ntxhais uas tabtom mob heev yuav tuag, muaj ib cov neeg coob coob sib nphoo ntxuas. Lub sijhawm ntawd, muaj ib tug pojniam coj khaubncaws tsis tu tau 12 xyoos kho tsis zoo li. Tus pojniam no txiv ntiag hauv cov neeg coob coob los ntawm Yexus. Raws li cov Yudais txojcai, tus pojniam no raug suav tias tsis huv (Levis Kevcai 15:19-33), raug tej neeg sawvdaws tso tseg, thiab txwv tsis pub mus pehawm hauv tsev sablaj. Tsis muaj chaw cia siab, thaum tus pojniam no hnov txog tus Yexus uas tuaj pem lub nroog Naxales tuaj muaj hwjchim kho tau txhua yam mob. Tus pojniam ntseeg thiab txiav txim siab tuaj cuag Tswv Yexus thov Nws kho. Tiamsis tus pojniam no ntsib kev nyuaj vim muaj neeg coob coob nyob puag ncig Tswv Yexus, thiab tsis huv zoo li nws yuav ua li cas thiaj mus cuag tau tus Tswv thov Nws pab kho. Yog li ntawd, tus pojniam thiaj txiav txim siab siv lwm lub tswvyim. “Nws txiv ntiag los rau ntawm Yexus nraubqaum, nws cev tes mus kov Yexus lub tw tsho” (nqe 44). Nov yog txojkev ntseeg ua haujlwm tawm! Tus pojniam tabtom tsis huv thiab txajmuag yog li nws tsis xav cia kom cov neeg coob coob pom nws. Los ntawm txojkev ntseeg thiab cia siab, nws thiaj xav hais tias, “Yog kuv kov Yexus lub tw tsho, kuv tus mob yuav zoo” (Malakaus 5:28). Thiab qhov uas xav tsis thoob, kiag lub sijhawm uas kov Yexus tw tsho ces ntshav txawm tu nrho lawm (nqe 44). Txujci tseemceeb tshwm muaj rau tus pojniam no lub neej. Nws tau txais Vajtswv lub hwjchim kho nws tus mob zoo.
Ua ntej ntawd, tus pojniam no tsuas tuaj ntsib Yexus twjywm, nws muaj kev ntseeg tiamsis tsis tau los taij thov Yexus tabmeeg, tsuas yog kev ntseeg ua haujlwm tawm xwb. Nimno tsis yog tau tus Tswv kho zoo, nws tseem tau nrog tus Tswv sib txuas lus thiab tau hnov tus Tswv lo lus hais tias nws zoo mob lawm: “Me ntxhais, koj tus mob zoo lawm, twb yog vim koj ntseeg. Koj cia li mus kaj siab lug.” (nqe 47-48). Tus pojniam no tau tus Tswv kho sab nqaij tawv thiab sab ntsujplig huvsi, nws muaj kev kaj siab thiab tau nrog tej neeg sawvdaws ua ke.
Tus Tswv haivneeg yeej khiav tsis dhau tej teebmeem, sim siab los raug. Thaum peb daws tej teebmeem los ntawm yus lub zog xws li cia siab rau nyiaj txiag, vamkhom neeg ces yuav ua tsis tau. Tiamsis thaum peb los cuag tus Tswv los ntawm txojkev ntseeeg thiab lus thov, tus Tswv yuav daws teebmeem, cawm peb dim sab nqaij tawv thiab sab ntsujplig. Tiamsis nco ntsoov tias tus Tswv ua li ntawd tsis yog ua raws li peb lub siab, yog ua raws li tus Tswv txojkev txawj ntse pab Nws cov menyuam kom tau qhov zoo kawg nkaus.
Thov Vajtswv,
Tus Tswv, thov Koj pub kom nyuam yaus muaj kev ntseeg, txaus siab tiv kom dhau tej kev txomnyem sim siab kom mus cuag tau tus Tswv, ntseeg Koj tas siab kom tau kho zoo thiab tau Koj pub koob hmoov tiv dhau txhua yam kev sim siab hauv lub neej. Nyuam yaus tuav Tswv Yexus lub npe thov, Amees.
Peb puas thov Vajtswv tas siab los ntawm txojkev ntseeg thaum ntsib teebmeem hauv lub neej?
Nyeem Vajluskub hauv peb lub xyoo Yaxayas 65
Kênh Youtube BHKTHN:
