Klei Aê Diê Blŭ: Y‑Luk 8:40-48
Êlan kliăng: “Tơdah phung kpă ur kwưh klei đru, Yêhôwa hmư̆, leh anăn bi mtlaih digơ̆ mơ̆ng jih jang klei knap mñai.” (Klei Mmuñ Hđăp 34:17)
Klei êmuh ksiêm mĭn: Si mniê kluh êrah nao kơ Khua Yang leh anăn si ñu dưi bi hlao? Si klei hdĭp ñu mâo klei bi mlih leh? Ya klei hriăm anei đru ih tơdah tuôm hŏng klei lông dlăng hlăm klei hdĭp?
Êjai Khua Yang Yêsu êbat ti êlan nao kơ sang Y‑Jairus, sa čô khua sang bi kƀĭn, čiăng bi hlao anak mniê gơ̆ ruă kjham giăm djiê, mâo phung lu bi knhiêt tui hlue Khua Yang. Hlăk anăn mâo sa čô mniê kluh êrah êjai 12 thŭn leh, gơ̆ êran hiu djăp anôk duah mdrao klei ruă gơ̆, hŏng lu êlan ƀiădah amâo hlao ôh. Gơ̆ ăt gĭr knhiêt mbĭt hŏng phung lu mơh čiăng dưi bi tuôm hŏng Khua Yang. Tui si klei bhiăn klei đăo phung Israel, arăng yap gơ̆ jing mnuih čhŏ mrŏ (Bruă Lêwi 15:19-33), tŭ klei ƀuôn sang ñĕ đuĕ, leh anăn kăm ghă amâo dưi mŭt kkuh mpŭ hlăm sang bi kƀĭn ôh. Gơ̆ amâo lŏ mâo anôk djă păn ôh, hmư̆ hing mâo sa čô mnuih anăn Yêsu ƀuôn Nasaret ngă klei myang dưi bi hlao djăp mta klei ruă. Gơ̆ đăo leh anăn čuăn ai tiê nao bi tuôm hŏng Ñu yơh čiăng kwưh akâo dưi bi hlao brei. Ƀiădah lĕ, gơ̆ găn klei dleh dlan hŏng phung ƀuôn sang dôk wang jŭm dar Khua Yang Yêsu, leh anăn jing mnuih čhŏ mrŏ msĕ si gơ̆, si dưi nao bi tuôm tlă anăp hŏng Khua Yang čiăng akâo bi hlao brei. Kyuanăn yơh gơ̆ čuăn ngă hŏng sa êlan mdê snăk. “Gơ̆ hriê ti tluôn Ñu, leh anăn ruêh ti knhal ao Yêsu” (êlan 44). Anei jing sa mta klei ngă kbiă hriê mơ̆ng klei đăo yơh! Gơ̆ dôk mâo klei čhŏ mrŏ leh anăn hêñ mlâo kyuanăn amâo čiăng brei phung lu mđing dlăng kơ gơ̆ ôh. Ƀiădah hŏng klei đăo êngeh leh anăn kjăp ktang, gơ̆ bi mĭn snei, “Tơdah kâo knŏng ruêh ti ao Ñu, kâo srăng hlao.” (Y‑Markôs 5:28). Leh anăn klei truh yuôm bhăn êdimima, mnĭt mmông gơ̆ ruêh ti knhal ao Khua Yang yơh êrah gơ̆ thư̆ mtam (êlan 44). Klei myang truh leh hlăm klei hdĭp gơ̆. Gơ̆ thâo kral leh klei myang bi hlao hŏng bruă yuôm bhăn mơ̆ng Khua Yang Yêsu.
Êlâo kơnăn, mniê anei knŏng jhŏng nao kơ Khua Yang djơ djĕ hŏng klei hgăm, gơ̆ mâo klei đăo ƀiădah amâo jhŏng iêô kwưh tlă anăp hŏng Khua Yang hŏng klei blŭ ôh, ƀiădah knŏng bi êdah klei gơ̆ đăo hŏng klei gơ̆ ngă. Mmông anei tơdah Khua Yang bi hlao gơ̆ leh, gơ̆ dưi blŭ hrăm hŏng Khua Yang leh anăn mă tŭ klei blŭ bi hlao mơ̆ng Khua Yang Yêsu: “Ơ bŭ, klei ih đăo bi hlao ih leh. Nao bĕ êđăp ênang!” (êlan 47-48). Gơ̆ mâo klei bi hlao mơ̆ng kđeh asei mlei truh hlăm mngăt ai tiê, mâo klei êđăp ênang leh anăn dưi lŏ bi mguôp hŏng ƀuôn sang.
Klei hdĭp phung anak ƀuôn sang Aê Diê amâo tlaih ôh klei dleh dlan, klei lông dlăng jŭm dar. Tơdah drei mgaih mkra klei dleh dlan hŏng klei ktang hjăn drei pô msĕ si klei knang kơ prăk kăk, knang kơ mnuih, knang kơ klei dưi mơ̆ng lăn ala, snăn knŏng mă tŭ wĭt klei dlưh lĕ yơh. Ƀiădah tơdah drei nao kơ Khua Yang hŏng klei đăo leh anăn klei kwưh akâo, Khua Yang srăng bi mgaih mkra brei klei dleh dlan drei, bi mtlaih drei mơ̆ng kđeh asei mlei truh hlăm mngăt ai tiê. Ƀiădah brei drei hdơr snei, Khua Yang amâo mgaih mkra tui si klei mĭn drei čiăng ôh ƀiădah tui si klei thâo mĭn khut khat tloh ênoh Khua Yang pô, čiăng ba hriê klei jăk jĭn hĭn kơ phung anak ƀuôn sang Ñu.
Si ngă drei jih ai tiê wah lač kơ Khua Yang hŏng klei đăo kjăp ktang mơ̆ tơdah tlă anăp hŏng klei dleh dlan hlăm klei hdĭp?
Wah lač: Ơ Khua Yang, akâo Khua Yang brei kơ kâo klei đăo kjăp ktang, kăp dưi găn jih klei lông dlăng čiăng nao truh kơ Khua Yang, knang kơ Khua Yang hŏng jih ai tiê, čiăng dưi mâo klei bi hlao leh anăn mâo klei pap dưi găn jih klei lông dlăng hlăm klei hdĭp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Êsai 65
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
