Klei Aê Diê Blŭ: II Klei Yăl Dliê 18:7-26
Êlan kliăng: “Ƀiădah Y-Pêtrôs leh anăn phung khua ƀĭng kna lŏ wĭt lač,“Hmei srăng gưt kơ Aê Diê, hĭn hŏng gưt kơ mnuih” (Bruă Phung Khua Ƀĭng Kna 5: 29).
Klei êmuh ksiêm mĭn: Dôk ti anăp klei dưi leh anăn êpul lu blŭ mdê hŏng pô, si Khua pô hưn êlâo Y-Mika ngă? Si klei tŭ knhal tuč? Si klei mđĭ ai drei mâo mơ̆ng klei bi hmô Khua pô hưn êlâo Y-Mika?
Kyua Mtao Jôsaphat čiăng êmuh thiăm sa čô khua pô hưn êlâo čiăng thâo klă nao bi blah ti ƀuôn Ramôt mơ̆ amâodah hơăi, Mtao Ahap tiŏ nao sa čô khua kahan “Atăt ba djăl Y-Mika” (êlan 8). Khua kahan anei lač kơ Khua pô hưn êlâo Y-Mika brei lač klei jăk msĕ si phung khua pô hưn êlâo dih ƀiădah ñu wĭt lač knŏng srăng hưn ya klei Aê Diê blŭ.
Tinei drei ƀuh sa klei bŏ hŏng klei dưi hlăk êjai dua čô mtao hơô ao mtao dôk ti jhưng mtao, ti anăp diñu jing pă êtuh čô khua pô hưn êlâo Mtao Ahap hưn êlâo mtao srăng dưi. Leh ƀuh Khua pô hưn êlâo Y-Mika, Mtao Ahap ruăt êmuh “hmei srăng nao kơ ƀuôn Ramôt-Galaat čiăng bi blah mơ̆…?” Khua pô hưn êlâo Y-Mika lač nao blah yơh kyua mtao srăng dưi. Boh sĭt, Khua pô hưn êlâo Y-Mika amâo lač ôh Aê Diê lač snăn, ñu knŏng mñă wĭt klei wĭt lač phung khua pô hưn êlâo dih čiăng mưč đuč. Mtao Ahap thâo anăn ƀuah leh anăn brei ñu hưn klei sĭt. Khua pô hưn êlâo Y-Mika lač,“Yêhôwa blŭ leh klei jhat djŏ kơ ih” (êlan 22b). Kyua jhŏng lač klei sĭt nik anăn Y-Sêdêkia, khua pô hưn êlâo mơ̆ng Mtao Ahap pah miêng ñu. Mtao Ahap lŏ mtrŭn asăp krư̆ ñu hlăm mnă, knŏng brei ƀơ̆ng kpŭng leh anăn mnăm êa krơ̆ng klei hdĭp.
Dôk ti anăp sa êpul lu leh anăn grăp čô čiăng bi êdah klei dưi msĕ si Khua pô hưn êlâo Y-Mika, arăng khăng ƀuh huĭ hyưt leh anăn ênưih kpĭ hlue ngă si êpul lu. Ƀiădah wăt tơdah arăng arưp dưn, wăt tơdah knŏng hjăn păn pô ti anăp klei bi kdơ̆ng anei, hlăk êjai nah dih mâo truh pă êtuh čô lač mklăk hŏng pô, leh anăn sa čô mtao bŏ hŏng măk ƀai dôk ti jhưng mtao mprăp bi kmhal pô, Khua pô hưn êlâo Y-Mika ăt thâo săng “Hjăn pô ƀiădah amâo hjăn păn ôh” kyua Aê Diê dôk mbĭt. Ñu amâo huĭ ôh, tŭ klei arăng ngă jhat kyua thâo knŏng mâo Aê Diê jing pô phat kđi klă sĭt, dôk ti jhưng mtao Ñu čiăng phat kđi.
Mâo mmông drei ăt dôk hlăm boh klei brei blŭ klei sĭt, lač klei Aê Diê čiăng lu mnuih amâo čiăng hmư̆ leh anăn knŏng hjăn pô bi phung bi kdơ̆ng, ngă jhat kơ pô lu snăk. Amâodah tơdah drei hưn Klei Mrâo Mrang Jăk ƀiădah mâo lu mnuih amâo čiăng hmư̆ ôh Klei Aê Diê Blŭ. Phung anei amâo čiăng drei hưn ôh klei Khua Yang Yêsu mtô drei brei lač, anăn jing hưn Klei Mrâo Mrang Jăk kơ grăp čô mnuih (Y-Markôs 16:15). Hlue si klei Khua pô hưn êlâo Y-Mika bi hmô, drei ăt srăng tŭ kơ djăp klei arăng ngă jhat kyua “Hmei srăng gưt kơ Aê Diê, hĭn hŏng gưt kơ mnuih” (Bruă Phung Khua ƀĭng Kna 5:29). Leh anăn klei mđĭ ai prŏng kơ drei jing thâo săng pô amâo dôk hjăn păn ôh ƀiădah mâo nanao Aê Diê dôk mbĭt hlăm djăp klei mâo.
Drei jhŏng hưn Klei Aê Diê Blŭ, klei Aê Diê čiăng wăt tơdah tŭ klei arăng bi kdơ̆ng leh anăn ngă jhat mơ̆?
Ơ Khua Yang, ti anăp klei kpĭ mơ̆ng lăn ala leh anăn klei bi kdơ̆ng, akâo kơ Ih đru kâo djăp klei đăo leh anăn klei jhŏng hưn klei Ih čiăng kâo hưn čiăng atăt pô mkăn kơ klei kmhal, đăo kơ Aê Diê leh anăn mngăt dưi tlaih.
Dlăng Klei Aê Diê Blŭ hlăm tlâo thŭn: Y-Êsêkiêl 46
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
