Klei Aê Diê Blŭ: Y-Yôhan 14:15-21
Êlan kliăng: “Leh anăn Kâo srăng akâo kơ Ama, leh anăn Ñu srăng brei kơ diih Pô Đru mkăn dôk mbĭt hŏng diih nanao,” (Y-Yôhan 14:16)
Klei êmuh ksiêm mĭn: Si klei Khua Yang Yêsu lač hŏng phung ƀĭng kna kơ Pô Đru, Ñu srăng akâo kơ Ama srăng brei kơ digơ̆? Ya klei brei phung anak ƀuôn sang Aê Diê ngă tơdah diñu lač diñu khăp kơ Khua Yang? Ya hdră êlan đru drei dưi hgao klei lông dlăng leh anăn ya mta klei bi mđĭ ai diih tui hlue Khua Yang hlăm thŭn mrâo 2024?
Knŏng hjăn Khua Yang Yêsu yơh jing êlan brei kơ drei dưi mă tŭ klei hdĭp hlŏng lar msĕ si klei ñu lač:“Kâo jing êlan, klei sĭt nik, leh anăn klei hdĭp; amâo mâo pô dưi nao kơ Ama, knŏng hŏng Kâo.” (Y-Yôhan 14:6). Phung anak ƀuôn sang Aê Diê amâo lăm hĕ ôh êlan tui hlue Khua Yang mâo lu êdi klei jăk mơak, ƀiădah tui si klei Khua Yang lač leh, êlan anăn amâo djŏ prŏng êhai ôh, ƀiădah jing êlan kniă, ƀăng bhă điêt; amâo djŏ êđăp ênang nanao msĕ si ênao êa kriêp êyăng ôh, ƀiădah lu blư̆ srăng mâo angĭn êbŭ poh yă. Khua Yang mtô hlei pô čiăng tui hlue Ñu, brei grăp hruê klam kyâo bi kal ñu pô tui hlue Khua Yang (Y-Luk 9:23).
Êlan tui hlue Khua Yang jing msĕ snăn, ƀiădah klei bi mđĭ ai grăp čô phung ƀuôn sang Aê Diê jing Khua Yang Yêsu thâo kơ drei amâo tlaih ôh kơ klei lông dlăng hlăm klei hdĭp, snăn êlâo kơ Ñu bi ktlah hŏng phung ƀĭng kna đĭ wĭt kơ adiê, Ñu akâo kơ Aê Diê Ama brei kơ phung anak ƀuôn sang Aê Diê sa Pô Đru mkăn. Khua Yang Yêsu srăng wĭt hŏng Ama, ƀiădah Pô Đru srăng dôk mbĭt hŏng drei leh anăn dôk mbĭt hlăm drei hlŏng lar. Khua Yang amâo lui drei jing anak êrĭt ôh ƀiădah hŏng Pô Đru, Ñu dôk mbĭt hŏng drei nanao hlăm djăp anôk, brei ai ktang, thiăm kơ drei klei pap dưi hgao klei lông dlăng hlăm klei hdĭp. Klei ƀuăn anei pioh kơ hlei pô khăp kơ Khua Yang leh anăn djă pioh klei Ñu mtă (êlan 15-17).
Si klei Khua Yang ƀuăn leh hŏng phung ƀĭng kna hlăk mphŭn dô, hruê anei ăt msĕ snăn mơh Yang Mngăt Jăk srăng bi êdah klei sĭt nik hŏng drei, kyuadah Ñu jing Aê Diê amâo tuôm mlih ôh. Yang Mngăt Jăk srăng bi mlih klei hdĭp drei kluôm dhuôm leh anăn brei ai ktang kơ drei dưi gưt asăp Ama, dưi mă tŭ klei mơak hlăm klei lông dlăng, klei hdjul hlăm klei hdĭp (Y-Mathiơ 11:28-30). Aê Diê Ama khăp kơ drei nanao, Pô Đru srăng bi êđăp anôk ruă êka hlăm lam ai tiê grăp čô drei. Grăp hruê, brei drei mkŏ mjing klei bi mguôp hŏng Khua Yang hŏng klei hriăm Klei Aê Diê Blŭ leh anăn djă pioh klei Ñu mtă. Tơdah drei djă pioh klei Khua Yang mtă, ăt jing msĕ si klei drei khăp kơ Aê Diê mơh. Tơdah drei khăp kơ Aê Diê Ama, drei ăt srăng mâo Aê Diê Ama leh anăn wăt Aê Diê Anak khăp kơ drei mơh (êlan 21). Kdlưn hĭn kơnăn, tơdah drei djă pioh klei Khua Yang mtô leh anăn gưt hlue klei blŭ mơ̆ng Pô Đru, drei srăng bi knal klei hơ̆k mơak, klei jăk jĭn Khua Yang brei leh anăn hgao jih jang klei lông dlăng hlăm klei hdĭp, boh nik nak hlăm thŭn mrâo 2024.
Si drei čuăn djă pioh klei Khua Yang mtă hlăm kluôm jih thŭn mrâo anei?
Wah lač: Ơ Ama dôk ti dlông adiê, bi mni kơ Ama brei leh Yang Mngăt Jăk dôk mbĭt leh anăn dôk hlăm kâo. Akâo kơ Ama brei kâo djă pioh nanao klei bi mguôp hŏng Ih hlăm klei djă pioh leh anăn gưt klei Ama mtô. Akâo Khua Yang bi kjăp ai tiê kâo dưi hgao klei lông dlăng hlăm thŭn mrâo 2024 hŏng klei hơ̆k mơak leh anăn klei êđăp ênang Khua Yang brei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
