Klei Aê Diê Blŭ: Y‑Luk 2:41-52
Êlan kliăng: “Yêsu lač kơ diñu, “Ya ngă diih tui duah kâo? Diih amâo thâo hĕ jing djŏ kơ kâo dôk mă bruă kơ Ama kâo?” (Y‑Luk 2:49)
Klei êmuh ksiêm mĭn: Ya klei mâo hlăk Khua Yang Yêsu pluh dua thŭn? Hlue si diih, ya klei yuôm bhăn mơ̆ng klei Khua Yang wĭt blŭ hŏng amĭ ama? Ya ngă leh wĭt lač “dôk mă bruă kơ Ama kâo”, Khua Yang Yêsu lŏ gưt kơ amĭ ama mơh? Si ngă čiăng kơ drei amâo wơr ôh hlei Khua Yang jing leh anăn ya klei drei thâo hlăm yan Noel?
Ksiêm dlăng tui si anak mnuih, bruă Y‑Yôsep – H’Mari rŭng răng nao duah Khua Yang Yêsu bŏ tlâo hruê amâo ƀuh Ñu ôh jing klei drei thâo săng (êlan 41-46). Leh ƀuh, H’Mari lač: “Ơ dam, si ngă ih ngă kơ hmei snei lĕ? Nĕ anei, ama ih leh anăn kâo tui duah ih hŏng klei rŭng răng” (êlan 48). Klei diñu ƀuah anak êkei leh tlâo hruê amâo ƀuh ăt adôk êđăp ênang hlăm Sang kkuh mpŭ, “dôk hmư̆ leh anăn êmuh” phung khua pô mtô, snăn ăt kăn êgao hnơ̆ng mơh. Mâo mơ̆ hlei amĭ ama amâo rŭng răng leh anăn kăn ƀuah mơh anak pô hlăm boh klei snăn?
Khădah, leh hmư̆ klei ƀuah anăn, Khua Yang Yêsu lŏ wĭt lač: “Ya ngă diih tui duah kâo? Diih amâo thâo hĕ jing djŏ kơ kâo dôk mă bruă kơ Ama kâo?” (êlan 49). Khua Yang Yêsu khăng kŏ đei mơ̆ leh wĭt lač hŏng amĭ ama snăn? Klei amĭ ama ƀuah, klei Khua Yang Yêsu wĭt lač, klei blŭ pô čih hră Y‑Luk “Ƀiădah diñu amâo thâo săng ôh klei gơ̆ lač kơ diñu” (êlan 50), leh anăn wăt bruă êdei anăn Khua Yang Yêsu hlue amĭ ama wĭt ti ƀuôn Nasaret leh anăn “gưt kơ diñu” (êlan 51) brei ƀuh năng ai hruê mlan êgao, Y‑Yôsep leh anăn H’Mari dlăng leh kơ Khua Yang Yêsu msĕ si sa čô anak mkăn mơ̆ng diñu. Khua Yang jing mnuih diñu kriê dlăng amâo djŏ ôh jing mnuih mâo ƀô̆ mta ba klei jăk mơak, klei bi mni leh anăn klei hơ̆k mơak kơ diñu, msĕ si diñu tuôm thâo leh. Diñu wơr hĕ Khua Yang Yêsu mâo sa čô Ama mkăn, Ñu jing “anak doh jăk”, “Anak Aê Diê” (Y‑Luk 1:35), Anak mơ̆ng “Pô Ti Dlông Hĭn”, jing Mtao mơ̆ng djuê ana Mtao Đawit (Y‑Luk 1:32-33). Êbeh pluh thŭn rông ba Khua Yang Yêsu, năng ai diñu dua wơr hĕ leh hlei Khua Yang jing. Leh anăn kyua mta phŭn anăn, Y‑Yôsep leh anăn H’Mari brei dưi mñă hŏng sa klei blŭ ngă kơ diñu brei hdơr leh anăn brei “djă pioh jih klei anăn hlăm ai tiê” (êlan 51).
Hlăm gưl Noel, arăng khăng mñă kơ drei kơ klei khăp leh anăn hlei Khua Yang Yêsu jing. Drei jăk mơak, hrăm mbĭt kkuh mpŭ kơ Ñu, hơ̆k mơak hơêč hmưi bi mni Ñu. Ƀiădah leh anăn klei hdĭp lŏ ktŭng phung drei, leh anăn ƀrư̆ ƀrư̆ drei dlăng kơ Khua Yang msĕ si phung mkăn, jing drei wơr hĕ Ñu jing Khua Yang, jing Mtao kơ drei, jing mta phŭn čiăng drei bi mni, hơ̆k mơak, jing mta phŭn čiăng kơ drei ƀuh pô mâo klei jăk jĭn.
Drei hdơr nanao mơ̆ Khua Yang jing Mtao, jing Khua Yang drei mơ̆?
Wah lač: Ơ Khua Yang Yêsu, kâo bi mni lač jăk kơ Ih hriê leh hŏng kâo čiăng klei hdĭp kâo bŏ hŏng klei mơak, klei čang hmăng, klei êđăp ênang leh anăn klei khăp. Akâo kơ Ih đru kâo amâo brei knuih hdĭp grăp hruê ngă kơ kâo wơr bĭt hĕ kơ ya klei Ih brei leh kơ kâo leh anăn Ih jing Mtao, jing Khua Yang klei hdĭp kâo.
Dlăng Klei Aê Diê Blŭ hlăm tlâo thŭn: Y‑Yêrêmi 46:20–47:7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
