Klei Aê Diê Blŭ: Philip 2:14-16
Êlan kliăng: “Ngă bĕ jih jang bruă amâo blŭ dŭñ dŭñ amâodah kĭ kơ̆ ôh” (Philip 2:14)
Klei êmuh ksiêm mĭn: Ya boh blŭ khua ƀĭng kna yua, čiăng lač kơ lăn ala? Ya knhuah hdĭp êdu ai brei ñĕ đuĕ hĕ, čiăng dưi mtrang mngač ti krah lăn ala? Si drei ngă čiăng dưi ñĕ đuĕ mơ̆ng knhuah hdĭp anei?
Tơdah blŭ kơ lăn ala, khua ƀĭng kna yua pruê̆ blŭ “ênuk phung soh leh anăn jhat”. Tinei ñu amâo blŭ kơ kmrơ̆ng dliê čư̆ êa leh anăn mnơ̆ng dhơ̆ng jăk siam Aê Diê hrih mjing leh ôh. Ăt kăn lač kơ lăn ala anak mnuih rei, kyuadah Khua Yang Yêsu pô yơh tŭ klei djiê kyua anak mnuih. Ƀiădah ñu čiăng lač kơ sa “djuê ana” amâodah êlan bhiăn mơ̆ng klei myang yang jhat Satan dôk gĭt gai čiăng bi kdơ̆ng hŏng Aê Diê leh anăn klei Ñu čiăng (Êphêsô 2:2). Lăn ala anei jing ênuk “phung soh”, mblang jing jhat ƀai, luar mnêč; leh anăn “jhat”, mblang jing brŭ rai mâo tŭ yua ôh. Hruê mmông găn gao, lu klei bruă bi mlih, ƀiădah klei phung lăn ala bi kdơ̆ng hŏng Aê Diê ăt msĕ nanao amâo mlih ôh, leh anăn klei bi roh hŏng Klei Mrâo Mrang Jăk mbĭt hŏng phung mnuih jing dŏ Khua Yang Yêsu ƀrư̆ hruê đĭ hĭn êjai (Y‑Yôhan 15:18-20). Dôk hdĭp ti krah ênuk phung lăn ala msĕ snăn, brei phung đăo kơ Krist weh đuĕ hĕ mơ̆ng knuih bi êdu ai, jing klei blŭ dŭñ dŭñ leh anăn ngă kĭ kơ̆. “Blŭ dŭñ dŭñ” bi êdah kơ ênai grêñ, blŭ mhač hlăm lam ƀăng đŏk tơdah amâo ư ai ôh kơ ya mta klei, leh anăn “kĭ kơ̆” ăt čiăng lač kơ klei bi tăng mgăl mơh. Tơdah sa čô mnuih truăn “blŭ dŭñ dŭñ” bi kdơ̆ng hŏng Aê Diê, snăn pô anăn srăng truh sĭt bi tăng mgăl hŏng Aê Diê mơh.
Hlăk brei klei mtă “Ngă bĕ jih jang bruă amâo blŭ dŭñ dŭñ amâodah kĭ kơ̆ ôh”, khua ƀĭng kna Y‑Pôl brei ƀuh anei jing sa boh klei dôk mâo hlăm Phung Sang Aê Diê. Phŭn knhal ăt mâo nanao knuih êdu ai anei hlăm klei hdĭp phung đăo, kyuadah drei ăt hlăk dôk hlăm knhuang êlan nao kơ klei jing doh jăk, kyuanăn klei êdu awăt, dluh lĕ êjai êbat hlăm knhuang êlan ăt mâo mơh. Grăp hruê drei ăt tlă anăp nanao hŏng klei boh sĭt ruă ênguôt, msĕ si klei djiê phung drei khăp hơiêng, klei jhat truh, klei knap mñai, klei amâo mtăp mđơr… grăp hruê drei tŭ klei phung lăn ala ksŭng ngă, bi kdơ̆ng hŏng klei đăo drei hŏng êlan mđung asăp, klei kưt mmuñ, knhuah mĭn, klei mtô mjuăt… Leh anăn grăp hruê drei ăt dôk hdĭp hlăm asei mlei kđeh soh jhat hrăm mbĭt hŏng lăn ala soh jhat anei, wăt tơdah drei amâo lŏ dôk ti gŭ klei soh kiă kriê dưn mơh, ƀiădah asei mlei kđeh anei ăt adôk mơh klei mưng klei tluh čiăng soh wê, leh anăn klei mgao.
Čiăng dưi weh đuĕ kơ klei “blŭ dŭñ dŭñ” leh anăn “kĭ kơ̆”, brei drei “jing phung anak Aê Diê” sĭt (êlan 15). Hŏng klei thâo kral klei bi mtlaih, brei drei thâo săng klei jăk leh anăn klei khăp Aê Diê, klei ktang myang Aê Diê dlông hĭn, thâo kdriêl knhal drei pô, leh anăn thâo hdră Aê Diê kñăm kơ klei hdĭp drei (Y‑Yakơ 1:2-4). Kyua hŏng klei anăn yơh, drei dưi êbat hlăm knhuang êlan klei hdĭp myang hŏng klei êđăp ênang, đăo knang, jao kluôm jih jang klei hlăm kngan Khua Yang, hmiêt mkăp găn gao klei lông dlăng tơdah tlă anăp hŏng klei ksŭng bi kdơ̆ng mơ̆ng phung lăn ala.
Ya drei khăng wĭt ngă tơdah tlă anăp hŏng klei phung lăn ala ksŭng bi kdơ̆ng hŏng klei đăo?
Wah lač: Ơ Khua Yang, kâo thâo Ih mâo hdră kñăm jăk kơ kâo, tơdah dưm kâo ti krah lăn ala mmăt tĭt anei. Akâo Khua Yang brei kâo hdĭp sa klei hdĭp bi mđĭ ai, mơak ai tiê, leh anăn gưt asăp Ih, čiăng dưi găn gao klei lông dlăng tơdah tŭ klei arăng bi kdơ̆ng hŏng klei đăo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôhan 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
