Filipis 2:14-16
Nqe cim:
“Ib puas tsav yam uas nej ua, nej tsis txhob yws thiab tsis txhob sib cav sib ceg.” (Filipis 2:14)
Lus nug rau sawvdaws xav:
– Timthawj Paulus siv cov lus twg los hais txog lub ntiajteb?
– Tus cwjpwm tsis zoo twg cheemtsum qaij kom peb ua tau lub teeb ci rau neeg ntiajteb?
– Yuav ua li cas peb thiaj qaij dhau cov cwjpwm no?
Thaum hais txog ntiajteb, Timthawj Paulus siv lo lus “cov neeg tsis ncaj thiab muaj txim”. Ntawm no, Paulus tsis hais txog lub ntiajteb tej uas Vajtswv tsim. Kuj tsis yog hais txog tibneeg, rau qhov Tswv Yexus twb los tuag txhiv tibneeg. Tiamsis Paulus tabtom hais txog “cov” lossis ib lub hwjchim ntsujplig phem uas dab ntxwgnyoog kav los tawmtsam Vajtswv thiab Nws lub siab nyiam (Efexus 2:2). Lub ntiajteb no yog cov neeg uas “ua tsis ncaj”, txhais tau tias ua phem, dag ntxias; thiab “muaj txim” txhais tias puas neeg, tsis zoo. Lub sijhawm dhau mus, ntau tes haujlwm hloov, los txojkev tawmtsam Vajtswv ntawm lub ntiajteb no yeej tsis hloov, thiab kev ntxub Txojmoo Zoo nrog rau cov ntseeg yeej tseem niaj hnub muaj ntxiv (Yauhas 15:18-20). Ua neej nyob hauv lub ntiajteb li no, cov ntseeg Yexus yuav tau txav deb cov cwjpwm yws thiab sib cav sib ceg. “Yws” hais txog lub suab nyooj, hais tuj taws hauv lub qa tuaj thaum tsis haum siab ib yam dabtsi twg, thiab “sib cav sib ceg” kuj muaj lub ntsiab hais tias coj tsis tus. Thaum ib tug neeg twg pheej “yws” rau Vajtswv ces tus ntawd yuav nrog Vajtswv sib cav.
Thaum hais cov lus samhwm “Ib puas tsav yam uas nej ua, nej tsis txhob yws thiab tsis txhob sib cav sib ceg”, Timthawj Paulus qhia paub nov yog ib qhov muaj tseeb nyob hauv Pawg Ntseeg. Qhov vimchiv uas pheej muaj qhov tsis zoo no nyob hauv cov ntseeg Yexus lub neej los vim yog peb tseem tabtom xyaum ua kom tau neeg dawbhuv, yog li tej kev qaug zog, ua tsis tau zoo thiaj ua rau muaj kev tshwm tej no tuaj. Txhua hnub peb yeej ntsib ntau yam kev nyuaj siab xws li tej txheebze tas sim neej, raug teebmeem, txomnyem, raug ua tsis ncaj… Txhua hnub peb raug lub ntiajteb no tawmtsam, thuam peb txojkev ntseeg saum tej duab yees, suab nkauj, kev xav, kev kawm… Thiab txhua hnub peb tseem tabtom ua neej nyob rau lub cev ua txhaum no nrog ntiajteb, txawm yog peb tsis raug kev txhaum kav los peb lub cev no tseem muaj tej kev nyiam, ntshaw tsis zoo thiab khavtheeb.
Cia kom qaij tau tej kev “yws” thiab “sib cav” peb yuav tsum “ua tau Vajtswv cov menyuam” (nqe 15). Qhov uas tau txais kev cawm dim, peb yuav tau zeem paub qhov zoo, Vajtswv txojkev hlub, Nws lub hwjchim loj, peb muaj nrim, thiab Vajtswv lub homphiaj hauv peb lub neej (Yakaunpaus 1:2-4). Yog li, peb rhais tau kauj ruam nrog tus Tswv mus kaj siab lug, ntseeg siab, muab tas txhua yam rau tus Tswv kav, txaus siab hlo tiv dhau txhua yam kev sim siab thaum ntsib tej neeg ntiajteb tawmtsam.
Thov Vajtswv,
Tus Tswv, nyuam yaus paub tias Koj muaj homphiaj zoo rau nyuam yaus thaum koj cia nyuam yaus nyob hauv lub ntiajteb no. Thov Koj pub kom nyuam yaus ua neeg zoo, txaus siab, thiab mloog Koj lus kom tiv dhau kev sim siab ntawm txojkev ntseeg. Nyuam yaus tuav Tswv Yexus lub npe thov, Amees.
Peb pheej ua dabtsi thaum ntsib kev tawmtsam ntawm txojkev ntseeg?
Nyeem Vajluskub hauv peb lub xyoo: Yauhas 7
Kênh Youtube BHKTHN:
