Klei Aê Diê Blŭ: Y‑Yêrêmi 41:4‑10
Êlan kliăng: “Đăm jao jơ̆ng kngan diih kơ klei soh jing mnơ̆ng klei wê yua ôh, ƀiădah jao bĕ diih pô kơ Aê Diê jing msĕ si phung mnuih kbiă lŏ hdĭp leh mơ̆ng phung djiê, leh anăn jao jơ̆ng kngan diih kơ Aê Diê jing mnơ̆ng klei kpă ênô yua” (Rôm 6:13)
Klei êmuh ksiêm mĭn: Si ngă Y‑Ismaêl lŏ dơ̆ng ngă soh? Si klei hdĭp leh anăn klei soh Y‑Ismaêl brei ƀuh ñu hdĭp soh hdră kñăm Aê Diê? Ya klei hriăm drei mâo mơ̆ng klei hriăm hruê anei?
Amâo mdei hŏng klei bi mdjiê Khua kahan mtao Y‑Gêdalia, Y‑Ismaêl lŏ dơ̆ng ngă soh mplư leh anăn bi mdjiê sa êpul mnuih ƀuôn sang sa păn pluh čô mơ̆ng ƀuôn Sičem, ƀuôn Silô, leh anăn ƀuôn Samari dôk hlăm ktuê êlan nao ba mnơ̆ng myơr kpŭng ƀhĭ leh anăn mnơ̆ng ƀâo mngưi pioh myơr ti sang yang Yêhôwa. Ti anăp klei bŏ hŏng pap mñai phung wĭt kơ ƀuôn sang (êlan 5), bi êdah ai tiê hlăm lam bŏ hŏng ênguôt hnĭng kơ ƀuôn Yêrusalem dlưh rai. Khădah snăn, klei pap mñai anăn amâo mgei ôh ai tiê Y‑Ismael, ñu lŏ ngă jhat mbĭt hŏng pluh čô kahan pô bi mdjiê kjuh pluh čô mnuih hlăm êpul anăn leh anăn hwiê asei atâo digơ̆ hlăm kbăng êa Mtao Y‑Asa klei leh êlâo anăn pioh yua kơ ala čar (êlan 7,9). Pluh čô adôk hlăm êpul dưi tlaih mơ̆ng klei djiê kyua diñu ƀuăn srăng mkăp kơ Y‑Ismaêl “hjiê mdiê ƀlê, mdiê ôrgơ, êa boh ôliwơ, leh anăn êa hnuê” (êlan 8). Klei Aê Diê Blŭ čih ngă kơ hlei pô dlăng thâo kơ klei măk ƀai snăk mơ̆ng Y‑Ismael: “Y‑Ismaêl anak êkei Y‑Nêthania bi bŏ kbăng êa anăn hŏng mnuih ñu bi mdjiê leh” (êlan 9). Leh anăn, Y‑Ismaêl lŏ mă phung ƀuôn sang adôk ti ƀuôn Mispa jing mnă, leh anăn atăt găn nao kơ čar Amôn (êlan 10).
Ya klei Y‑Ismaêl ngă leh brei ƀuh ñu hdĭp soh hdră kñăm Aê Diê. Jing sa găp djuê mtao, năng djŏ ñu jing mnuih mbĭt hŏng Khua kahan mtao Y‑Gêdalia klam bruă knuă, hrăm mbĭt mkra mđĭ leh anăn kriê dlăng djuê ana pô leh klei truh ênguôt hnĭng kơ ala čar. Ƀiădah ñu lŏ mdjiê khua kahan mtao leh anăn brei phung ƀuôn sang pô nao jing mnă kơ phung Amôn, jing djuê ana tŭ klei Aê Diê bi kmhal kyua hdĭp amâo huĭ mpŭ leh anăn ngă jhat kơ phung ƀuôn sang Aê Diê (Klei Mtô Mñă Klei Bhiăn 23:3‑6). Êngao anăn, dŭm bruă Y‑Ismaêl ngă bi mklă ñu mâo klei thâo gĭt gai ƀiădah ñu lŏ yua jih klei thâo leh anăn klei găl Aê Diê brei hlăm hdră kñăm soh, leh anăn ngă bruă kơ amâo djŏ mnuih jing phung Amôn.
Hruê anei, lu mnuih hlăm phung drei hrô kơ yua klei suaih pral, hruê mmông, klei thâo, prăk mah… hŏng klei êngiê hlăm Yang Krist čiăng mă bruă kơ Aê Diê leh anăn Sang Aê Diê, snăn drei lŏ yua klei Aê Diê brei čiăng ngă bruă soh hdră kñăm jing klei čiăng, klei knŏng mĭn kơ pô… Čang hmăng dŭm klei bi hmô amâo jăk mơ̆ng Y‑Ismaêl bi mdih grăp čô drei. Brei yua klei thâo leh anăn klei Aê Diê brei čiăng mă bruă kơ Ñu leh anăn kơ Sang Aê Diê.
Si drei dôk yua klei jăk Aê Diê brei ?
Wah lač: Ơ Aê Diê! Kâo bi mni lač jăk kơ Ih brei leh kơ kâo dưi êngiê hlăm Yang Krist hŏng klei thâo Ih brei čiăng mă bruă kơ Ih. Akâo kơ Khua Yang yua klei hdĭp kâo leh anăn đru kâo myơr nanao asei mlei pô kơ Aê Diê msĕ si mnơ̆ng yua kơ klei kpă ênô.
Dlăng Klei Aê Diê Blŭ hlăm tlâo thŭn: Y‑Yôel 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
