Klei Aê Diê Blŭ: Klei Mtô Mñă Klei Bhiăn 8:3-10
Êlan kliăng: “Ñu bi luă gŭ diih leh anăn brei diih êpa leh anăn čiêm diih hŏng mana diih amâo tuôm thâo kral ôh, kăn phung aê đưm diih thâo kral rei; čiăng kơ ñu dưi brei ih thâo mnuih amâo dôk hdĭp knŏng kyua ƀơ̆ng kpŭng ôh, ƀiădah mnuih dôk hdĭp kyua jih jang klei blŭ kbiă mơ̆ng ƀăng êgei Yêhôwa.” (Klei Mtô Mñă Klei Bhiăn 8:3).
Klei êmuh ksiêm mĭn: Si Y-Môis hưn mdah kơ ala čar Aê Diê Ƀuăn? Ya klei mplư phung ƀuôn sang Aê Diê srăng tlă anăp hlăm anôk ala mdrŏng sah anăn? Ya klei tŭ dưn mơ̆ng Klei Aê Diê Blŭ đru phung ƀuôn sang Ñu êjai dôk hdĭp hlăm mnơ̆ng mnuă êbeh dlai? Ya mta klei đru drei hdĭp bi djŏ hŏng anôk bruă jing phung ƀuôn sang doh jăk Aê Diê?
Hlăm trăn Klei Aê Diê Blŭ anei, Y-Môis hưn mdah kơ Kanaan jing ala čar jăk siam, mâo lu hnoh êa, mdiê kuê leh anăn lu mta boh kroh. Kyua mơ̆ng anôk mâo klei hdĭp bŏ ênŭm, mdrŏng sah hlăm ala čar Aê Diê Ƀuăn anăn yơh, ênưih snăk ngă kơ phung ƀuôn sang Aê Diê kram hlăm mnơ̆ng mnuă êbeh dlai, snăn wơr bĭt hĕ mâo sa mta klei jing yuôm hĭn kơ mnơ̆ng mnuă jing jai anăn, anăn yơh jing Klei Aê Diê Blŭ. Kyuanăn hlăm êlan 3, Y-Môis lŏ mñă kơ phung ƀuôn sang Aê Diê brei hdơr, mnuih amâo dôk hdĭp knŏng kyua ƀơ̆ng kpŭng ôh, ƀiădah mnuih dôk hdĭp kyua jih jang Klei Blŭ kbiă mơ̆ng ƀăng êgei Yêhôwa.
Phung ƀuôn sang Israel jing sa djuê ana ruah jing dŏ pioh hjăn kơ Aê Diê, diñu dôk hdĭp amâo djŏ knŏng kyua ƀơ̆ng kpŭng grăp hruê ôh, ƀiădah wăt kyua Klei Aê Diê Blŭ mơh. Knŏng tơdah phung ƀuôn sang Aê Diê čiêm rông klei hdĭp myang diñu hŏng Klei Aê Diê Blŭ grăp hruê, kơh dôk “hdĭp” sĭt. Klei Aê Diê Blŭ đru phung ƀuôn sang Ñu amâo kram hngăp êyăng hlăm klei hdĭp bŏ dlai hŏng mnơ̆ng mnuă hlăm čar Kanaan ôh, mđrĭng mbĭt, đru diñu dôk hdĭp bi djŏ tui si klei Aê Diê čiăng, ti krah phung djuê ana tue amâo mâo kkuh mpŭ kơ Aê Diê ôh. Y-Môis čiăng kơ phung ƀuôn sang Aê Diê thâo săng klei yuôm kơ bruă čiêm rông klei hdĭp myang hŏng Klei Aê Diê Blŭ. Tơdah thâo djă pioh gưt ngă hlue Klei Aê Diê Blŭ, sĭt nik phung ƀuôn sang Aê Diê srăng dưi dưn kluôm ênŭm klei hdĭp anôk ala čar Aê Diê Ƀuăn, leh anăn knŏng tơdah dôk hdĭp kyua Klei Aê Diê Blŭ kơh, đru phung ƀuôn sang Aê Diê dưi dưn sui êđăp ênang anôk ala čar mdrŏng sah anăn.
Sa hlăm klei lông dlăng prŏng kơ klei hdĭp phung đăo ară anei anăn jing, ênưih bi kŭl mơ̆ng ênoh mnơ̆ng mnuă hlăm lăn ala anei, snăn wơr bĭt hĕ yơh hnơ̆ng yuôm mơ̆ng ênoh klei hdĭp myang. Wăt tơdah ăt mâo mơh mnuih thâo săng kơ hnơ̆ng yuôm Klei Aê Diê Blŭ ƀiădah diñu amâo dôk hdĭp hlue msĕ si klei thâo săng anăn ôh. Kyuanăn yơh lu hlăm phung drei êran tui tiŏ amâo thâo êmăn, ênoh dôk mă knŏng bhiâo rit ti lăn ala anei, lui hĕ amâo mâo uêñ ôh kơ klei hdĭp myang pô giăm djiê grăp hruê, kyua kƀah Klei Aê Diê Blŭ kjham kjhuê̆. Boh mă tŭ mơ̆ng klei jing anăn, lu mnuih mĭndah ñu dôk “hdĭp”, ƀiădah boh sĭt gơ̆ diñu knŏng adôk đuč. Hŏng anôk bruă jing phung ƀuôn sang doh jăk, jing mnuih ƀuôn sang myang Ƀuôn Jăk Aê Diê, drei dôk “hdĭp” knŏng tơdah čiêm rông drei pô hŏng Klei Aê Diê Blŭ grăp hruê. Knŏng mâo Klei Aê Diê Blŭ kơh, dưi đru drei weh đuê̆ mơ̆ng kwĭl klei tluh kơ mnơ̆ng mnuă, leh anăn dưi dôk hdĭp djŏ tui si klei Aê Diê čiăng kơ klei hdĭp drei.
Si ngă drei dôk “hdĭp” djŏ hŏng anôk bruă jing ƀuôn sang doh jăk pioh kơ Aê Diê mơ̆?
Ơ Khua Yang, akâo kơ Ih brei kâo thâo čiêm rông klei hdĭp myang kâo hŏng Klei Aê Diê Blŭ grăp hruê, hrô kơ klei êran tui tiŏ ênoh mnơ̆ng mnuă bhiâo rit ti lăn ala anei.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 31:25-54
Kênh Youtube BHKTHN:
