Klei Aê Diê Blŭ: II Klei Yăl Dliê 7:17-22
Êlan kliăng: “Tơdah diih čiăng gưt asăp, diih srăng ƀơ̆ng boh jăk hĭn hlăm čar.Ƀiădah tơdah diih hngah leh anăn bi kdơ̆ng, đao gưm srăng bi rai diih, kyuadah ƀăng êgei Yêhôwa blŭ leh.” (Y‑Êsai 1:19‑20).
Klei êmuh ksiêm mĭn: Ya klei Aê Diê lač leh anăn kơ hlei Ñu lač hlăm trăn Klei Aê Diê Blŭ anei? Klei Aê Diê lač brei ƀuh ya klei ñu mñă? Dŭm blư̆ amâo gưt asăp Aê Diê si klei ƀuah mkra drei mâo?
Leh lač hŏng Mtao Y‑Salômôn kơ bruă ruah Sang Yang ti Yêrusalem čiăng Anăn Aê Diê dôk tinăn lă lar snăn Aê Diê brei leh Klei bi hriăm êlâo hĭn kơ Mtao Y‑Salômôn, leh anăn kơ phung ƀuôn sang. Aê Diê brei kơ Mtao Y‑Salômôn sa klei găl: tơdah gưt asăp leh anăn sĭt suôr hŏng Aê Diê snăn jhưng mtao leh anăn djuê ana ñu srăng hơĭt kjăp. Êdei anăn Aê Diê ăt lač hŏng phung ƀuôn sang sa mta klei” tơdah diñu amâo gưt kơ hdră bhiăn Aê Diê leh anăn ngă soh kkuh kơ rup yang snăn diñu amâo srăng dưi lŏ dôk ôh ti Lăn Aê Diê brei leh kơ diñu leh anăn Aê Diê ăt srăng lui Sang Yang dưi pioh hjăn kơ Anăn Ñu. Aê Diê hơêč hmưi leh anăn ngă kơ Sang Yang ti Yêrusalem bŏ hŏng klei guh kơang Ñu, ƀiădah Ñu amâo ƀuăn ôh srăng brei nanao djăp klei găl kơ Sang Yang, kơ jhưng mtao Y‑Salômôn leh anăn kơ phung ƀuôn sang. Aê Diê knŏng brei tơdah di thâo gưt asăp Aê Diê.
Lŏ dlăng wĭt hƀuê ênuk phung ƀuôn Israel snăn klă sĭt dŭm klei Aê Diê bi hriăm tinei knŏng mñă wĭt mñă nao klei Aê Diê yua leh Y‑Môis lač hŏng diñu mơ̆ng êlâo dih hlăm Klei Mtô Mñă Klei Bhiăn kdrêč 28, “Tơdah diih gưt asăp kơ Yêhôwa Aê Diê ih êjai răng ngă jih jang klei ñu mtă kâo brei kơ ih hruê anei,… Jih jang klei jăk jĭn anei srăng truh kơ diih leh anăn jing dŏ diih tơdah diih gưt asăp Yêhôwa Aê Diê diih” (êlan 1‑2). Êngao anăn, Aê Diê ăt lač, “Ƀiădah tơdah diih amâo gưt ôh… amâo răng ngă jih jang klei ñu mtă leh anăn jih klei bhiăn…snăn jih jang klei tăm pah anei srăng truh kơ diih leh anăn hmao diih” (êlan 15).
Mơ̆ng dŭm klei bi hriăm anei, drei ƀuh Aê Diê mñă nanao kơ klei gưt asăp. Khădah mâo lu blư̆ phung ƀuôn sang Aê Diê ngă soh hŏng Ñu, boh jhat jing diñu jing hlŭn leh anăn arăng bi rai Sang Yang Yêrusalem. Năng ai dưi lač kdrêč Klei Aê Diê Blŭ hlăm II Klei Yăl Dliê anei ăt jing klei mblang mta phŭn êdei anei phung ƀuôn sang Israel kbiă đuê̆ mơ̆ng ƀuôn sang diñu leh anăn Sang Yang ti Yêrusalem amâo lŏ bi êdah ôh klei guh kơang Aê Diê ƀiădah arăng bi rai hlăm thŭn 586 Êlâo kơ klei kkiêng kơ Khua Yang Yêsu (êlan 20).
Mnuih thâo gưt asăp dưi mâo klei tŭ dưn jăk mơak. Bi klei lăng asăp ăt srăng ba boh jhat snăk. Khădah mơ̆ng đưm truh ară anei lu mnuih ăt khăng ruah klei lăng asăp. Y‑Ađam leh anăn H’Êwơ ăt kyua lăng asăp anăn tŭ mă klei djiê kơ pô (Klei Mphŭn Dơ̆ng 2:17). Kyua klei amâo gưt asăp, diñu ba leh klei djiê hlăm mngăt ai tiê kơ anak mnuih, ngă kơ anak mnuih bi kbưi hŏng Aê Diê. Akâo kơ Aê Diê đru drei hdĭp gưt nanao asăp Aê Diê bi hriăm čiăng dưi mâo klei jăk mơak Aê Diê brei.
Ya klei drei dôk hrŏng ruah? Gưt asăp Aê Diê amâodah amâo gưt asăp?
Wah lač: Ơ Khua yang, akâo kơ Ih đru kâo thâo knang kơ Aê Diê čiăng ruah gưt asăp Klei Aê Blŭ čiăng kơ klei hdĭp kâo êbeh dlai klei jăk mơak Aê Diê brei.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Y‑Samuel 18:28-19:23
Kênh Youtube BHKTHN:
