Klei Aê Diê Blŭ: Y‑Markôs 13:9-13
Êlan kliăng: “…Ƀiădah hlei pô gĭr tơl knhal tuč srăng tlaih” (Y‑Markôs 13:13)
Klei êmuh ksiêm mĭn: Ya ngă phung ƀĭng kna Khua Yang srăng tŭ klei arăng ngă jhat? Si ngă čiăng dưi găn gao klei lông dlăng tơdah tŭ klei arăng ngă jhat?
Khua Yang Yêsu dôk mtô phung ƀĭng kna kơ klei ƀuôn Yêrusalem srăng rai leh anăn kơ hruê Khua Yang lŏ hriê. Mơ̆ng êlan 9, brei thâo mnuih đăo leh anăn tui hlue Khua Yang srăng mâo klei bi mtlaih mơ̆ng klei soh, leh anăn sĭt nik amâo tlaih ôh klei arăng ngă jhat! Khua ƀĭng kna Y‑Pôl ăt brei thâo msĕ mơh, “Sĭt nik jih jang hlei pô čiăng hdĭp doh jăk hlăm Krist Yêsu srăng tŭ klei arăng ngă jhat.” (II Y‑Timôthê 3:12). Hruê phung đăo ăt dôk sĭt suôr hŏng Khua Yang, hruê ăt adôk klei arăng srăng ngă jhat mơh. Khua Yang mtô phung ƀĭng kna snei, klei arăng ngă jhat jing mmông myun čiăng hưn bi sĭt kơ phung, hruê yang đar dleh dưi bi tuôm (êlan 9). Klei ngă jhat ăt jing klei lông dlăng klei đăo leh anăn klei sĭt suôr phung ƀĭng kna hŏng Khua Yang mơh (êlan 13; Klei Bi Êdah 2:10). Khua Yang mprăp brei leh kơ phung ƀĭng kna hlăk mphŭn dô leh anăn wăt kơ drei hruê anei msĕ mơh, si êlan čiăng dưi găn gao klei lông dlăng mâo klei tŭ jing, amâo djŏ ôh knŏng wah lač čiăng đăm arăng ngă jhat.
Êlâo hĭn, tơdah arăng ngă jhat đăm mĭn kơ klei bi tăng mgăl ôh (êlan 11) kyuadah Yang Mngăt Jăk srăng ngă bruă anăn jăk hĭn kơ drei lu. Khua sang yang Y‑Êtiên jing sa klei bi knăl, “Ƀiădah diñu amâo dưi bi mgăl ôh hŏng klei thâo mĭn Y‑Êtiên, Yang Mngăt Jăk, Pô brei gơ̆ blŭ.” (Bruă Phung Khua Ƀĭng Kna 6:10). Kyuanăn, brei drei yua bi jăk mmông găl hưn bi sĭt kơ diñu, kyuadah Klei Mrâo Mrang Jăk brei hưn lar kơ jih jang mnuih (êlan 9-10). Êdei kơnăn, klei arăng ngă jhat amâo djŏ ôh knŏng kbiă hriê mơ̆ng tač êngao, ƀiădah năng ai mơ̆ng găp djuê pô, tăp năng jhat ktang hĭn mơ̆ng êngao mơh (êlan 12). Drei amâo bi kngăr ôh tơdah tlă anăp hŏng klei lông dlăng anei. Klei arăng ngă jhat djhul hĭn jing, “jih jang mnuih srăng bi êmut kơ diih kyua Anăn Kâo” (êlan 13). Khua Yang Yêsu Pô yơh brei thâo, “kyuadah diih amâo jing ôh phung lăn ala, Kâo ruah leh diih mơ̆ng lăn ala, kyuanăn lăn ala bi êmut kơ diih.” (Y‑Yôhan 15:19). Knhal tuč, tơdah tlă anăp hŏng klei arăng bi êmut leh anăn ngă roh msĕ snăn, Khua Yang čiăng drei ăt djă pioh kjăp klei đăo, dôk kjăp gĭr tui hlue Khua Yang tơl tuč klei hdĭp drei. “Hlei pô ăt dôk gĭr tơl knhal tuč, pô anăn srăng mâo klei bi mtlaih”, amâo djŏ mâo klei bi mtlaih kyua bruă ngă ôh, ăt kăn djŏ jing sa klei čoh čuăn čiăng dưi mâo klei bi mtlaih rei. Dôk kjăp djă pioh klei đăo tơl knhal tuč, jing sa klei bi knăl kơ sa čô mnuih mâo klei đăo sĭt, snăn pô anăn mâo klei bi mtlaih (II Y‑Yôhan 1:9). Mnuih amâo mâo klei đăo sĭt, amâo dưi dôk kjăp tui hlue Khua Yang ôh, boh nik nak tơdah tlă anăp hŏng klei lông dlăng ti krah lăn ala, diñu ênưih snăk hngah kơ klei đăo.
Drei thâo snei, jih jang klei lông dlăng tơdah phung lăn ala đuĕ kbưi, bi êmut, ngă jhat, amâo djŏ jing klei mrâo anei, bi kngăr kơ phung đăo sĭt ôh. Tơdah ăt djă pioh kjăp klei đăo kơ Khua Yang, drei srăng amâo djŏ ôh knŏng dưi găn gao, ƀiădah wăt mbliư̆ klei anăn jing mmông găl hưn kơ Khua Yang čiăng kơ hruê Khua Yang lŏ hriê djăl truh.
Si drei ngă čiăng dưi hĭn hŏng klei arăng ngă jhat leh anăn bi êmut hlăm lăn ala anei?
Wah lač: Ơ Ama kâo khăp! Brei kâo klei ktang čiăng dưi dôk kjăp, djă pioh klei đăo tơl knhal tuč, wăt tơdah dôk ti anăp phung khua lăn ala amâodah klei bi kdơ̆ng mơ̆ng phung găp djuê pô. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôhan 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
