Malakaus 13:9-13
Nqe cim:
“…tus uas ua siab ntev mus txog hnub kawg tus ntawd yuav dim.” (Malakaus 13:13)
Lus nug rau sawvdaws xav:
– Vim li cas Tswv Yexus cov thwjtim yuav raug tsimtxom?
– Yuav ua li cas kom tiv taus dhau kev sim siab thaum raug tsimtxom?
Tswv Yexus tabtom qhia cov thwjtim hais txog lub nroog Yeluxalees yuav raug puastsuaj thiab yuav txog hnub tus Tswv los. Txij nqe 9 mus, Tswv Yexus qhia rau cov ntseeg thiab cov uas nrog Nws mus yuav dim tej kev txhaum, thiab yeej yuav khiav tsis dhau tej kev tsimtxom! Timthawj Paulus qhia paub, “cov ntseeg Yexus Khetos txhua tus uas xav ua lub neej kom Vajtswv tau ntsejmuag, lawv yeej raug kev tsimtxom.” (II Timautes 3:12). Hnub uas cov ntseeg tseem nrog tus Tswv mus, hnub ntawd tseem muaj kev tsimtxom. Tus Tswv qhia rau cov thwjtim hais tias, txojkev tsimtxom yog lub zoo sijhawm ua timkhawv rau cov neeg uas lawv tsis yoojyim ntsib (nqe 9). Tsimtxom tseem yog kev sim txojkev ntseeg thiab lub siab ncaj ncees ntawm cov thwjtim rau tus Tswv (nqe 13; Tshwmsim 2:10). Tus Tswv twb npaj rau cov thwjtim hnub thaud thiab peb cov ntseeg tamsim no yuav ua li cas kom tiv dhau kev sim siab los ntawm txoj kev muaj yeej tsis yog thov Vajtswv pab kom tsis txhob raug tsimtxom.
Thawj qhov, thaum raug tsimtxom tsis txhob xav hais tias yuav hais li cas (nqe 11) rau qhov Vaj Ntsujplig yog tus ua tes haujlwm ntawd zoo dua rau peb. Xatefanaus yog ib qhov timkhawv, “lawv cav tsis yeej Xatefanaus, rau qhov Vajtswv pub tswvyim rau Xatefanaus.” (Tes Haujlwm 6:10). Yog li ntawd, cia li siv sijhawm qhia, vim Txojmoo Zoo yuav tsum qhia rau txhua haivneeg (nqe 9-10). Txuas ntxiv, kev tsimtxom tsis yog thaum twg los muaj sab nraud tuaj xwb, nws tseem tuaj hauv tsevneeg, tseem heev dua lub tebchaws thiab (nqe 12). Thaum ntsib tej kev tsimtxom no tsis ua rau peb xav tsis thoob. Kev tsimtxom sib tshaj plaws raws li tswv Yexus qhia yog“txhua tus yuav ntxub nej vim nej yog cov uas ntseeg kuv…” (nqe 13). Tswv Yexus qhia paub, “nej tsis nyiam ua raws li neeg ntiajteb ua, rau qhov kuv twb xaiv nej tawm hauv lub ntiajteb no lawm; yog li ntawd, neeg ntiajteb thiaj li ntxub nej.” (Yauhas 15:19). Qhov kawg, thaum ntsib tej kev sib ntxub thiab ua yeebncuab li ntawd, tus Tswv xav kom peb tuav rawv kev ntseeg, ua siab ntev nrog tus Tswv mus txog thaum kawg lub neej. “tus uas ua siab ntev mus txog hnub kawg tus ntawd yuav dim” tsis yog dim vim ua haujlwm zoo, kuj tsis yog ib qhov uas kev cawm dim yuav kom ua. Ua siab ntev tuav kev ntseeg mus txog thaum kawg yog lub cim ntawm tus neeg muaj kev ntseeg nws thiaj li dim (II Yauhas 1:9). Tus neeg tsis muaj kev ntseeg tiag nws tsis muaj kev ua siab ntev nrog tus Tswv mus, tshwjxeeb yog thaum ntsib tej kev sim siab hauv lub neej, lawv yoojyim tso kev ntseeg tseg.
Peb paub hais tias txhua yam kev sim siab uas raug neeg ntiajteb txav deb, ntxub ntxaug, tsimtxom tsis yog qhov tshiab, lossis txawv txawv rau cov ntseeg Yexus. Thaum ua siab ntev ntseeg tus Tswv, tsis yog peb tiv taus dhau xwb, qhov ntawd tseem yog lub zoo sijhawm rau peb ua timkhawv qhia txog tus Tswv kom hnub tus Tswv los ze.
Thov Vajtswv,
Peb Leej Txiv! Txawm yuav sawv tabmeeg tej nomtswv lossis tsevneeg tawmtsam, los thov Koj pub kom nyuam yaus muaj lub zog sawv tau ruaj khov, ua siab ntev tuav kev ntseeg mus txog thaum kawg. Nyuam yaus tuav Tswv Yexus lub npe thov, Amees.
Peb yuav ua li cas thiaj kovyeej kev tsimtxom thiab lub ntiajteb kev ntxub?
Nyeem Vajluskub hauv peb lub xyoo: Yauhas 11
Kênh Youtube BHKTHN:
