I Kauleethaus 3:1-9
Nqe cim zaj kawm:
“Rau qhov wb yog Vajtswv ob tug tubtxib thiab ua haujlwm ua ke; nej yog Vajtswv thaj teb. Thiab nej yog Vajtswv lub tsev.” (I Kauleethaus 3:9).
Lus nug rau sawvdaws xav:
– Timthawj Paulus qhia paub tes haujlwm ntawm tus cog thiab tus ywg zoo li cas?
– Leejtwg yog tus ua kom hlob thiab tawg paj txi txiv?
– Peb yog dabtsi ntawm tus Tswv?
– Koj feem xyuam hauv Pawg Ntseeg yog dabtsi?
Cov lus qhib thawj hauv I Kauleethaus tshooj 3, timthawj Paulus ntuas cov ntseeg hauv Kauleethaus hais tias, vim yog lawv txoj kev khib, sib txeeb meejmom, sib cav sib ceg thiaj ua rau lawv faib ua pab ua pawg hauv Pawg Ntseeg. Lawv sib cav kom muaj yeej swb saib pab twg tes haujlwm tseem ceeb dua, Paulus pab lossis Apaulaus pab? Paulus thiaj qhia rau lawv paub txog lawv txoj kev ruam uas muab Pawg Ntseeg faib ua pab ua pawg li ntawd (nqe 1-6). Paulus xaus lus hais tias: “Tus uas cog thiab tus uas ywg dej yeej tsis tseemceeb dabtsi, tiamsis Vajtswv yog tus uas tseemceeb, rau qhov nws yog tus uas ua kom loj hlob. Tus uas cog thiab tus uas ywg dej, nkawd tes haujlwm zoo ib yam nkaus; Vajtswv yuav muab nqi zog rau nkawd raws li tes haujlwm uas nkawd ua” (nqe 7-8). Txhua tus ntseeg puavleej zoo li ib tus tub zog, tus cog thiab tus ywg puavleej tau nqi zog ib yam xwb, tsis muaj leejtwg tseemceeb tshaj leejtwg. Vajtswv thiaj yog tus ua kom loj hlob thiab tawg paj txi txiv.
Hauv Pawg Ntseeg cheemtsum muaj coob tus los sib koom tes ua Vajtswv tes haujlwm thiab txhua tus nyias tes haujlwm puavleej tseemceeb rau Vajtswv. Vajtswv pub txhua tus nyias muaj nyias koob hmoov uas yog tswvyim, nyiaj txiag, khoom qhov txhia chaw los sib pab ua Vajtswv tes haujlwm. Los ntawm sab ntsujplig, tus uas qhia Vajtswv Txojlus thiab tus uas pab haujlwm rau hauv tuam tsev lawv puavleej yog Vajtswv cov tubtxib. Timthawj Paulus thiaj hais tias: “Rau qhov wb yog Vajtswv ob tug tubtxib thiab ua haujlwm ua ke; nej yog Vajtswv thaj teb. Thiab nej yog Vajtswv lub tsev” (nqe 9). Ib tus ntseeg yog ib txhais tes lossis ib txhais taw… ntawm tus Tswv lub cev (I Kauleethaus 12:27). Txhua tus nyias yuav tau txais nyias nqis zog raws li nyias tau nqis tes ua haujlwm pab Vajtswv Pawg Ntseeg lawm (nqe 8).
Yog ib tus ntseeg yuavtsum paub hais tias, yus feem xyuam hauv Pawg Ntseeg yog dabtsi thiab ncaj ncees rau siab ua tes haujlwm ntawd li ib tus paub tswj saib Vajtswv tej koob hmoov. Ua ib tus saib xyuas Vajtswv tej koob hmoov Vajtswv xav kom peb mloog lus thiab ncaj ncees rau tes haujlwm uas Vajtswv twb muab cob rau peb lawm. Peb yuavtsum paub hais tias Vajtswv yog peb tus Tswv, peb tsuas yog Nws tus qhev saib xyuas txhua yam uas Vajtswv pom zoo pub rau peb ua xwb. Tus uas tswj saib ncaj ncees yog tus uas lees paub hais tias, txhua yam tsis yog yus li, yus tus kheej, tej koob hmoov thiab tej cuabtam uas yus muaj puavleej yog Vajtswv li xwb. Rau qhov Tswv Yexus twb muab Nws cov ntshav los muas peb ua Nws tug lawm. Yog li ntawd, kev tswj saib xyuas Pawg Ntseeg yuavtsum yog mloog Tswv Yexus lus, vim Tswv Yexus yog Pawg Ntseeg lub taubhau thiab yog Pawg Ntseeg tus Tswv. Peb txhua tus puavleej muaj feem xyuam rau hauv tus Tswv lub cev thiab yuavtsum sib txhawb ua kom tus Tswv Yexus Khetos lub cev kheev loj hlob.
Thov Vajtswv
Vajtswv, nyuam yaus ua Koj tsaug uas Koj pub koob hmoov rau nyuam yaus tau ua Koj tes haujlwm. Thov Koj pab kom nyuam yaus zeem paub nyuam yaus feem xyuam hauv Pawg Ntseeg yog dabtsi kom nyuam yaus ncaj ncees tswj, saib xyuas txhawb kom Koj Pawg Ntseeg loj hlob. Nyuam yaus tuav Tswv Yexxus Khetos lub npe thov, Amees.
Ib tsoom mloog uas hlub tshua,
Peb puas zeem paub hais tias peb muaj feem xyuam rau hauv Pawg Ntseeg? Peb twb ua li cas rau peb feem xyuam ntawd lawm?
Nyeem Vajluskub hauv peb lub xyoos: 1Kauleethaus 1:1-2:5
Kênh Youtube BHKTHN:
