Klei Aê Diê Blŭ: I Kôrantô 3:1-9
Êlan kliăng: “Kyuadah hmei jing phung mă bruă mbĭt kơ Aê Diê. Diih jing hma Aê Diê; diih jing sang Aê Diê.” (I Kôrantô 3:9)
Klei êmuh ksiêm mĭn: Khua ƀĭng kna Y‑Pôl brei thâo si bruă pô pla, pô krih êa jing? Boh mơ̆ng jih jang bruă anăn pioh kơ hlei pô? Ya drei jing kơ Aê Diê? Ya jing bruă jao kơ drei hlăm Phung Sang Aê Diê?
Kčưm mŭt hlăm hră čih mơĭt Kôrantô tal sa kdrêč 3, khua ƀĭng kna Y‑Pôl mñă kơ phung đăo tinei snei, kyua mơ̆ng klei di ñu bi nač, bi kuan bi miă leh anăn mneh msao yơh atăt truh kơ klei bi kah phung hlăm Phung Sang Aê Diê. Diñu dôk bi tăng mgăl bi mkă bi mđơr hdơ̆ng pô ksiêm hlei bĕ êpul mâo bruă yuôm hĭn, êpul Y‑Pôl amâodah êpul Y‑Apôlôs? Khua ƀĭng kna Y‑Pôl bi klhak mblang brei diñu ƀuh klei diñu jing hđeh điêt kyua ngă klei bi kah phung msĕ snăn (êlan 1-6). Ñu klah čŭn: “Snăn amâo djŏ ôh pô pla, kăn pô krih êa rei jing yuôm, ƀiădah knŏng Aê Diê Pô brei čăt hriê kơ prŏng jing yuôm. Pô pla leh anăn pô krih êa jing msĕ, leh anăn grăp čô srăng mă tŭ klei mưn tui si bruă ñu ngă leh.” (êlan 7-8). Grăp čô phung đăo kơ Krist jing msĕ si pô ngă hma, jih jang klei suăi dleh pô pla, pô krih êa jing msĕ sơăi, amâo mâo pô anei jing yuôm hĭn kơ pô dih ôh. Aê Diê yơh jing Pô brei mâo boh jing.
Klă mngač bruă Sang Aê Diê čiăng mâo klei bi mguôp ai mơ̆ng lu mnuih leh anăn grăp čô jing yuôm sơăi ti anăp Aê Diê. Aê Diê brei kơ grăp čô klei pap, klei dưi mdê mdê čiăng mđrăm mbĭt mă bruă kơ Aê Diê. Tĭng kơ klei hdĭp mngăt, pô mtô mblang Klei Aê Diê Blŭ ăt msĕ hŏng pô mă bruă hlăm Sang Aê Diê mơh jih jang jing dĭng buăl Aê Diê sơăi, Aê Diê jing pô čuăn. Khua ƀĭng kna Y‑Pôl brei thâo: “Kyuadah hmei jing phung mă bruă mbĭt kơ Aê Diê. Diih jing hma Aê Diê; diih jing sang Aê Diê.” (êlan 9). Grăp čô anak ƀuôn sang Aê Diê jing sa kdrêč hlăm asei mlei Ñu (I Kôrantô 12:27).
Grăp čô srăng mă tŭ klei mưn tui si ai ktang ñu pioh mă bruă kơ Sang Aê Diê (êlan 8). Grăp čô phung đăo brei thâo săng klă bruă jao kơ pô hlăm Phung Sang Aê Diê leh anăn sĭt suôr djă pioh klei pap Aê Diê brei kơ pô. Klei kiă kriê tui si Aê Diê čiăng jing klei gưt asăp Ñu leh anăn sĭt suôr ngă bruă Ñu jao. Brei drei thâo săng nanao Khua Yang yơh jing Khua, bi drei jing dĭng buăl kiă kriê jih jang mta klei tui si klei Khua Yang atăt gai leh anăn ksiêm dlăng. Klei kiă kriê sĭt suôr čiăng lač, drei tŭ ư kluôm dhuôm kơ drei amâo jing dŏ drei pô ôh leh anăn kăn mâo klei dưi ksiêm dlăng asei drei pô, klei pap, klei brei amâodah ngăn drăp drei rei. Knŏng hjăn Khua Yang pô yơh mâo klei dưi ksiêm dlăng, leh anăn drei jing dŏ Khua Yang, Pô bi tui leh drei hŏng êrah Ñu pô. Kyuanăn klei kiă kriê hlăm Phung Sang Aê Diê bi êdah hŏng klei phung anak ƀuôn sang Aê Diê gưt asăp kluôm dhuôm kơ Khua Yang Yêsu, jing Khua leh anăn Kŏ kơ Phung Sang Aê Diê. Grăp čô drei mâo bruă jao hlăm bruă rŭ mdơ̆ng Asei Mlei Yang Krist.
Si ngă drei thâo săng mơ̆ bruă jao kơ drei pô hlăm Phung Sang Aê Diê? Ya bruă drei ngă leh tui si klei thâo anăn?
Wah lač: Ơ Khua Yang, bi mni kơ Ih brei kơ kâo klei pap dưi mă bruă kơ Ih. Akâo Khua Yang brei kâo thâo săng bruă jao kơ kâo pô hlăm Phung Sang Aê Diê čiăng kơ kâo sĭt suôr kiă kriê leh anăn bi mguôp hlăm klei rŭ mdơ̆ng Sang Aê Diê. Kâo wah lač hlăm anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 1:1-2:5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
