Klei Aê Diê Blŭ: I Y-Pêtrôs 3:18-22
Êlan kliăng: “Kyuadah Krist msĕ mơh djiê leh kyua klei soh knŏng sa bliư̆ kơ jih jang, Pô kpă bi ala kơ phung amâo kpă ôh, čiăng kơ Ñu dưi atăt drei kơ Aê Diê.” (I Y-Pêtrôs 3:18a)
Klei êmuh ksiêm mĭn: Ya ênoh yuôm kơ klei Khua Yang Yêsu djiê ti kyâo bi kal? Si jing ênoh yuôm anăn? Ya ngă brei drei thâo ƀuh ênoh yuôm kyâo bi kal?
Lu phung đăo kơ Krist amâo dưi tŭ ôh klei dleh dlan tơdah tŭ klei knap mñai kyua Krist kyua anăn lui klei đăo. Tinei Khua ƀĭng kna Y-Pêtrôs hưn leh klă mngač kơ ênoh yuôm Khua Yang Yêsu săn asei ti kyâo bi kal čiăng mđĭ ai phung đăo kơ Khua Yang kjăp ai tiê êbat hŏng Ñu. Tal sa, “Kyuadah Krist msĕ mơh djiê leh kyua klei soh knŏng sa blư̆” ti kyâo bi kal, djăp ênŭm kơ klei soh jih jang anak mnuih. Tal dua, knŏng Khua Yang Yêsu Krist jing Pô kpă ênô, amâo mâo klei soh ôh djiê hrô kơ anak mnuih amâo kpă ênô, čiăng atăt anak mnuih nao giăm Aê Diê (êlan 18a). Tal tlâo, Khua Yang Yêsu găn leh klei djiê msĕ si anak mnuih leh anăn Ñu kbiă lŏ hdĭp leh (êlan 18b). Tal pă, klei bi mtlaih knŏng brei kơ hlei pô gưt asăp msĕ si gŏ sang Y-Nuê, knŏng sa păn čô hlăm gŏ sang ñu dưi mŭt hlăm kŭm păn, ñĕ kơ klei êa lip (êlan 20).
Pă klei Khua ƀĭng kna Y-Pêtrôs lač leh dưi mblang snei: Tal sa, kơ klei Khua Yang Yêsu tŭ klei djiê sa blư̆ jing ênŭm leh pioh kơ jih jang mnuih, leh anăn kơ jih jang klei soh. Jing klei Ñu djiê mâo ênoh yuôm pap brei klei soh drei hlăm ênuk leh êgao, ară anei Khua Yang Yêsu kbiă lŏ hdĭp leh, đĭ wĭt kơ adiê leh anăn dôk gŭ tĭng hnuă kơ Aê Diê, ƀiădah Ñu brei leh Yang Mngăt Jăk čiăng đru drei bi kdơ̆ng hŏng klei soh ară anei. Khua Yang Yêsu srăng lŏ hriê ba drei mŭt hlăm sa lăn ala amâo mâo klei soh. Tal dua, knŏng hjăn Khua Yang Yêsu jing Pô dôk ti krah Aê Diê leh anăn anak mnuih, klei Ñu djiê jing mnơ̆ng ngă yang sa anăn mâo ênoh yuôm čiăng bi mrâo klei bi mguôp drei hŏng Aê Diê, drei dưi êngiê nao hŏng Khua Yang hlăm klei wah lač. Tal tlâo, Khua Yang Yêsu dưi leh hŏng klei djiê, kyua anăn phung ƀuôn sang Aê Diê mâo klei čang hmăng hdĭp. Tal pă, klei bi mtlaih brei kơ jih jang mnuih, ƀiădah knŏng kơ hlei pô đăo leh anăn mă tŭ Khua Yang Yêsu kơh srăng dưi bi mtlaih (Y-Yôhan 1:12).
Khua Yang Yêsu Krist tŭ leh klei djiê leh anăn kbiă lŏ hdĭp leh čiăng kơ klei soh drei dưi mâo klei pap brei kluôm dhuôm, mâo klei wah lač hŏng Khua Yang, leh anăn mâo klei čang hmăng hdĭp. Ñu jing Pô sa anăn brei klei bi mtlaih kơ drei, Ñu “đĭ leh kơ adiê leh anăn dôk tĭng hnuă kơ Aê Diê. Phung dĭng buăl jăk, phung khua kiă kriê, leh anăn phung khua prŏng myang mŭt đup gưt leh kơ Ñu sơăi” (êlan 22). Akâo kơ Khua Yang đru kơ drei wăt tơdah dôk hlăm ya boh klei ăt ƀuh ênoh yuôm bhăn kyâo bi kal čiăng mjing mđĭ ai drei srăng tŭ klei knap mñai kyua Krist truh knhal tuč.
Si drei tŭ mă kluôm ênŭm ênoh yuôm mơ̆ng kyâo bi kal?
Wah lač: Ơ Khua Yang khăp hơiêng, akâo kơ Ih đru kâo thâo săng leh anăn dưm klei đăo kjăp hlăm klei Ih djiê leh anăn kbiă lŏ hdĭp leh čiăng kơ kâo amâo lĕ buh, kdŭn hlăm klei đăo, brei dôk kjăp tui hlue Khua Yang truh hruê Ih lŏ hriê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Kôrantô 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
