I Petus 3:18-22
Nqe cim:
“Rau qhov Yexus Khetos tuag tib zaug xwb txhiv tau sawvdaws lub txim lawm, nws yog tus ncaj ncees, nws tuag txhiv cov uas tsis ncaj ncees, nws ua li ntawd nws thiaj coj tau nej mus cuag Vajtswv.” (I Petus 3:18a)
Lus nug xav:
– Yog ua cas Tswv Yexus txojkev tuag saum ntoo khaublig thiaj tsimtxiaj?
– Qhov tsimtxiaj ntawd muaj lub ntsiab lus li cas?
– Vim licas peb thiaj yuav tsum saib pom qhov tsimtxiaj ntawm tus ntoo khaublig?
Muaj ntau tus ntseeg thev tsis taus thaum tiv kev txomnyem vim Yexus Khetos, ces thiaj tso txojkev ntseeg tseg. Nyob ntawm no, Timthawj Petus tau qhia tseeb meej txog qhov tsimtxiaj ntawm Tswv Yexus txojkev tuag txhiv saum tus ntoo khaub lig, los txhawb Vajtswv cov menyuam lub zog kom muaj lub siab khov kho raws tus Tswv qab.
Qhov thib ib, “Yexus Khetos tuag tib zaug xwb txhiv tau sawvdaws lub txim lawm”. Qhov thib ob, tsuas yog Tswv Yexus Khetos thiaj yog tus uas ncaj ncees, tsis muaj kev txhaum thiaj tuag txhiv tau cov neeg tsis ncaj ncees, thiaj coj tibneeg mus cuag tau Vajtswv (nqe 18a). Qhov thib peb, Tswv Yexus tau tuag ib yam li tibneeg tiamsis Nws tau sawv rov qab los lawm (nqe 18b). Qhov thib plaub, txojkev cawm dim tsuas muaj rau cov uas mloog lus li Nau-es tsev neeg xwb, tsuas muaj yim leej hauv nws tsev neeg tau mus nyob hauv lub nkoj, lawv thiaj dim dej nyab (nqe 20).
Plaub yam uas Timthawj Petus qhia saum no tau piav txhais li no: Qhov xubthawj, qhov uas Tswv Yexus tuag ib zaug xwb twb txaus lawm, muaj qabhau rau txhua tus tibneeg thiab txhua yam kev txhaum. Txhais tau hais tias Nws txojkev tuag muaj nqis zam tau peb tej kev txhaum yav dhau los; niaj hnub nimno Tswv Yexus twb sawv rov los, rov qab mus saum ntuj thiab tabtom zaum ntawm Vajtswv sab xis, tiamsis Nws tau pub Vaj Ntsujplig los pab peb tawmtsam tej kev txhaum tamsim no. Tswv Yexus yuav rov qab los coj peb mus rau hauv ib lub ntuj tshiab uas tsis muaj kev txhaum ntxiv lawm. Qhov thib ob, tsuas yog Tswv Yexus thiaj yog tus nyob nruab nrab ntawm Vajtswv thiab tibneeg, Nws tibleeg txojkev tuag thiaj yog yam khoom fij uas muaj nqis ua rau peb thiab Vajtswv rov sib haum xeeb, peb thiaj muaj kev ywjpheej mus cuag tau Vajtswv los ntawm kev taij thov. Qhov thib peb, Tswv Yexus tau kovyeej kev tuag lawm, yog li ntawd Vajtswv cov menyuam thiaj muaj kev cia siab hais tias yuav tau txojsia mus ib txhis. Qhov thib plaub, txojkev cawm dim pub rau txhua tus tibneeg, tiamsis tsuas yog tus uas ntseeg thiab txais yuav Tswv Yexus xwb thiaj li tau cawmdim (Yauhas 1:12).
Tswv Yexus Khetos tau tuag thiab sawv rov qab los lawm, peb tej kev txhaum thiaj tau zam huv tibsi, peb thiaj tau taij thov ncaj qha nrog Vajtswv, thiab peb thiaj muaj kev cia siab tau txojsia. Nws tibleeg xwb thiaj yog tus uas pub txojkev cawmdim rau peb, Nws “mus rau saum ntuj ceebtsheej thiab nws zaum ntawm Vajtswv sab xis, nws kav tagnrho cov timtswv saum ntuj thiab cov uas muaj hwjchim huv tibsi” (nqe 22). Thov Vajtswv pab peb tsis hais thaum nyob lub tsamthawj twg los xij, peb yuav tsum saib pom qhov tsimtxiaj kawg nkaus ntawm tus ntoo khaublig, muab qhov ntawd los txhawb peb lub zog kom txaus siab tiv kev txomnyem vim tus Tswv mus txog hnub kawg.
Thov Vajtswv,
Tus Tswv uas muaj kev hlub, thov pab nyuam yaus nkag siab thiab muaj kev ntseeg khov kho rau Koj txojkev tuag thiab txojkev sawv rov los, kom nyuam yaus tsis txhob poob siab lossis tso txojkev ntseeg tseg, tiamsis tuav ruaj txojkev ntseeg caum Koj qab mus txog hnub Koj rov qab los. Nyuam yaus tuav Yexus Khetos lub npe thov, Amees
Peb txais yuav qhov tsimtxiaj ntawm tus ntoo khaublig zoo licas?
Nyeem Vajluskub hauv peb xyoos: I Kauleethaus 14
Kênh Youtube BHKTHN:
