I Pêtrôs 3:18-22
“Yua kơ Yêsu Krist sơ̆ Sư kư̆m lôch pơmat yua kơ tơdrong yoch bơ̆n thoi noh mơ̆n wă kơ bơ̆n klaih đơ̆ng tơdrong yoch gơh oei hăm ‘Bok Kei-Dei.” (I Pêtrôs 3:18a)
Nơ̆r jet tơchĕng pơwao:
- Tơdrong Kră Yang Yêsu lôch tang tơ ‘long pơglang đei tơdrong gĭt kăl thoi yơ?
- Dôm tơdrong gĭt kăl ‘noh tơdrong kiơ?
- Yua kơ kiơ lu bơ̆n kăl kơ ‘bôh tơdrong gĭt kăl đơ̆ng ‘long pơglang?
Lơ bơngai lui ưh kơ kĕ lăp tơdrong mă đe pơm kê̆ kơplah chu pơmat yua kơ Kră Yang Yêsu Krist na jing kơ dŭn tơrŏng lăm tơdrong lui. ‘Bơ̆t âu Pêtrôs đei pơma hơđăl gah tơdrong gĭt kăl kơ ‘long pơglang Kră Yang Yêsu Krist mă sư đei chu lôch wă tơgŭm lu kon ‘Bok Kei-Dei đei jơhngơ̆m chơ̆n hơđơ̆ng dơ̆ng kơjăp lăm trong yak kiơ̆ Kră Yang. Mă mônh, “’Bok Krist yua kơ tơdrong yoch bơ̆n na chu lôch minh ‘măng” tơ ‘long pơglang, tôm mah kơ dôm tơdrong yoch đĭ đăng kon bơngai lăm teh đak. Mă ‘bar, minh Kră Yang Yêsu Krist ‘lơ̆ng tơpăt, ưh kơ đei tơdrong yoch gơh lôch tang kơ kon bơngai mă ưh kơ ‘lơ̆ng tơpăt, wă ba kon bơngai năm jê̆ Kră Yang ‘Bok Kei-Dei (trong 18a). Mă pêng, Kră Yang Yêsu đei mơn kơ tơdrong lôch thoi kon bơngai lôch păng iung arih (trong 18b). Mă Puŏn, tơdrong dŏng pơklaih ‘măn kơ bơngai bu mă chu mơ̆ng pơm kiơ̆ nhen thoi hnam dơnŏ ‘bok Nôê, lăp tơhngam ‘nu lu sư đĕch klaih yua kơ mơ̆t lăm duk wă hlôi đơ̆ng đak lip (trong 20).
Puăn tơdrong Pê-trôs đei roi pơdah đei tơblang thoi âu: Mă Mônh, gah tơdrong Kră Yang Yêsu chu lôch minh ‘măng tôm mah ăn kơ đĭ đăng kon bơngai, păng đĭ đăng tơdrong yoch. Wă khan tơdrong Kră Yang lôch noh jơ̆ gĭt kăl pơklaih đĭ dôm tơdrong yoch đei pơm bơih, dang ei Kră Yang iung arih bơih, tŏk tơ plei ‘lơ̆ng păng oei gah ‘ma kơ Kră Yang ‘Bok Kei-Dei, mă lei Sư đei ăn Yang Bơhngol ‘Lơ̆ng wă tơgŭm bơ̆n wă kơ kĕ jei đơ̆ng tơdrong yoch dang ei. Kră Yang Yêsu wă jur iŏk bơ̆n lăm dêh char mă ưh kơ đei tơdrong yoch. Mă ‘bar, minh Kră Yang Yêsu đĕch jơ̆ pơm ‘long sơlam kơ ‘Bok Kei-Dei hăm kon bơngai bơ̆n, tơdrong Sư lôch noh jơ̆ minh tơmam soi đei gĭt yua wă ba ăn tơdrong bơ̆n gơh năm ‘bơ̆t anăp Kră Yang ‘Bok Kei-Dei lăm tơdrong krao khan. Mă pêng, Kră Yang Yêsu kĕ jei đơ̆ng tơdrong lôch, thoi noh ba ăn kơ đĭ đăng lu kon ‘Bok Kei-Dei đei chang sơmĕng kơ tơdrong arih. Mă puŏn, tơdrong dŏng pơklaih noh jơ̆ ba ăn kơ đĭ đăng kon bơngai, mă lei lu bơngai bu mă sơng iŏk Kră Yang Yêsu đĕch gơh klaih đơ̆ng tơdrong yoch (Yôhan 1:12).
Kră Yang Yêsu Krist đei chu lôch păng iung arih wă kơ tơdrong yoch bơ̆n đei mơnat đĭ bơih, gơh krao khan ‘bơ̆t anăp Kră Yang, păng đei tơdrong chang sơmĕng tơdrong arih. Sư jơ̆ Kră Yang mă ăn tơdrong dŏng pơklaih kơ lu bơ̆n lăp minh ‘nu Sư đĕch, Kră Yang đei “tŏk tơplĕnh, oei gah ‘ma kơ Kră Yang ‘Bok Kei-Dei, đei lu linh jang ‘lơ̆ng, păng dôm tơdrong lu mă đei pơgơ̆r chu yom kơ Sư” (trong 22). Apinh Kră Yang ăn kơ lu bơ̆n mă đei tơ’bơ̆p tơdrong thoi yơ kăl kơ băt gĭt kăl kơ ‘long pơglang wă pơm ăn kơ bơ̆n tơdrong pơchŭt wă kơ lu bơ̆n kư̆m chu pơmat yua kơ Kră Yang Yêsu Krist ding truh tôch.
Kơkuh kơ Kră Yang mă ‘mêm, apinh Ih tơgŭm inh hlôh păng dan đon lui inh dơ̆ng kơjăp lăm tơdrong mă Ih đei lôch păng iung arih wă kơ inh hoei kơ pơ̆k huŏng, dah kơdŭn lăm đon lui, dơ̆ng kơjăp kiơ̆ Ih truh kơ năr Ih jur iŏk lu nhôn. Yua anăn Kră Yang Yêsu Krist, Amen.
Lu bơ̆n sơng iŏk tơdrong mă tôm mah gĭt kăl kơ ‘long pơglang thoi yơ bơih?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: I Kôrintô 14.
Kênh Youtube BHKTHN:
