Klei Aê Diê Blŭ: Galati 2:1‑10
Êlan kliăng: “Mâo sa Khua Yang, sa klei đăo, sa klei ƀaptem” (Êphêsô 4:5)
Klei êmuh ksiêm mĭn: Kơ ya klei Khua ƀĭng kna Y‑Pôl lŏ yăl dliê? Phung knơ̆ng gĭt gai Phung Sang Aê Diê yap Klei Mrâo Mrang Jăk Ñu mtô si ngă yuôm hŏng phung Galati? Ya drei srăng ngă êlâo kơ mă tŭ klei bi hriăm mrâo?
Leh bi klă kơ Klei Mrâo Mrang Jăk ñu mtô jing klei bi êdah mơ̆ng Aê Diê pô, Khua ƀĭng kna Y‑Pôl lŏ blŭ kơ sa nah tĭng mkăn yuôm bhăn snăk mơ̆ng Klei Mrâo Mrang Jăk anăn. Ñu lŏ yăl dliê kơ klei ñu lŏ đĭ nao kơ ƀuônYêrusalem tloh pluh pă thŭn, klei truh hlăm klei yăl dliê anăn snei:“Hlăk anăn mâo đa đa phung trŭn hriê mơ̆ng čar Yuđa dôk mtô kơ phung ayŏng adei, “Tơdah diih amâo tŭ klei khăt klĭt tui si klei bhiăn Y‑Môis mtă leh, diih amâo dưi tlaih ôh” (Bruă Phung Khua Ƀĭng Kna 15:1). Anei jing klei mtô soh, bi klăk hŏng Klei Mrâo Mrang Jăk Khua ƀĭng kna Y‑Pôl mtô. Kyuanăn, mâo klei bi tăng mgăl ktang plah wah ñu leh anăn Y‑Ƀarnabas hŏng phung anăn. Galati 2:1‑10 lŏ čih yăl dliê kơ klei diñu dua mbĭt hŏng Y‑Tit đĭ nao kơ ƀuôn Yêrusalem bi tuôm hŏng phung jing kmeh gơ̆ng kơ Phung Sang Aê Diê čiăng mgaih mkra hĕ klei jing phŭn kơ Klei Mrâo Mrang Jăk. Hlăm klei bi kƀĭn anăn, êngao ti Y‑Yakơ, Y‑Yôhan leh anăn Y‑Pêtrôs, mâo wăt “đa đa phung tĭng kơ phung Pharisi đăo leh” bi kƀĭn mbĭt, diñu tŭ ư kơ klei brei phung tue đăo kơ Krist tŭ klei khăt klĭt (Bruă Phung Khua Ƀĭng Kna 15:5). Ti knhal tuč, Khua ƀĭng kna Y‑Pêtrôs klah čŭn, “Ƀiădah drei đăo drei srăng tlaih hŏng klei Khua Yang Yêsu pap, msĕ si digơ̆ mơh” (Bruă Phung Khua Ƀĭng Kna 15:11). Leh anăn phung jing kmeh gơ̆ng kơ Phung Sang Aê Diê “êyuh kngan hnuă klei bi mguôp” hŏng diñu (êlan 9), tŭ ư hŏng bruă Khua ƀĭng kna Y‑Pôl leh anăn Y‑Ƀarnaƀas ngă, čiăng brei digơ̆ nao hưn Klei Mrâo Mrang Jăk kơ phung tue.
Drei khăng dôk tĭng kơ sa hlăm dua nah tĭng: Tăp năng drei jing msĕ si phung Yuđa đăo leh kơ Krist, mgô̆ jih jang mnuih tui hlue “klei bhiăn” hđăp. Drei lŏ bi mđua thiăm knông kơ phung ayŏng adei drei yơh tơdah drei lač snei amâodah snăn phung đăo srăng ngă. Sa nah mkăn, tăp năng drei jing phung amâo thâo răng ôh, djăl snăk hmư̆ klei mrâo, drei ƀuh kơ drei msĕ si mâo klei đăo hĭn tơdah lač “Yang Mngăt Jăk lač kơ kâo”, amâodah “khua pô mtô anei mtô jăk snăk, mâo klei mrâo”…ƀiădah amâo mâo ksiêm ôh kơ klei anăn mâo klei “tŭ ư”, “êyuh kngan hnuă klei bi mguôp” mơ̆ng jih jang klei čih leh hlăm Klei Aê Diê Blŭ mơ̆.
Wăt tơdah Khua ƀĭng kna Y‑Pôl lač Klei Mrâo Mrang Jăk ñu mtô jing Klei Mrâo Mrang Jăk Aê Diê pô bi êdah leh kơ ñu, amâo djŏ kyua klei bi hriăm mơ̆ng phung khua ƀĭng kna ôh, ƀiădah ñu thâo jing yuôm bhăn snăk mâo klei bi mguôp jing sa plah Klei Mrâo Mrang Jăk ñu mtô hŏng Klei Mrâo Mrang Jăk mơ̆ng phung hưn bi sĭt mkăn hlăm Phung Sang Aê Diê, bi phung đăo ti Galati, diñu ruăt lui hĕ Klei Mrâo Mrang Jăk diñu mă tŭ leh mơ̆ng sa čô jing khua ƀĭng kna sĭt čiăng tui hlue “klei mrâo mrang jăk mkăn”, amâo mâo klei tŭ ư mơ̆ng phung khua ƀĭng kna ôh.
Hlei phung drei msĕ? Drei jing msĕ si phung Yuđa đăo leh kơ Krist krư̆ diñu pô leh anăn pô mkăn hlăm klei bhiăn hđăp hĕ amâodah jing msĕ si phung đăo ti Galati, kƀah klei thâo ksiêm tơdah mă tŭ klei mtô mrâo.
Klei hriăm hruê anei bi mdih drei kơ ya klei?
Wah lač: Ơ Khua Yang, kâo lač jăk kơ Ih kyuadah hruê anei Ih brei kơ kâo mâo Klei Ih Blŭ phung khua bĭng kna čih leh hlăm hdruôm hră Klei Aê Diê Blŭ, đru kâo thâo ksiêm bi nik tơdah hmư̆ klei arăng mtô leh anăn knŏng mă tŭ klei mtô mơ̆ng Klei Ih Blŭ sĭt. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Luk 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
