Kalatias 2:1-10
Nqe cim.
“Peb koom tib tug Tswv, muaj tib txojkev ntseeg, thiab muaj tib txoj kevcai raus dej xwb” (Efexus 4:5)
Lus nug rau sawvdaws xav.
– Timthawj Paulus tabtom hais txog zaj twg?
– Txojmoo Zoo uas nws qhia tau cov thawjcoj ntawm cov Pawg Ntseeg lees paub tseemceeb licas rau cov neeg Kalatias?
– Peb yuav tsum ua dabtsi ua ntej txais yuav tej lus qhia txawv txawv?
Tomqab hais tawv qhawv hais tias Txojmoo Zoo uas nws qhia yog txais ncaj nraim ntawm Vajtswv los, Timthawj Paulus hais ntxiv txog lwm seem tseemceeb heev ntawm Txojmoo Zoo. Nws piav txog zaj xwm rov los hauv nroog Yeluxalees tomqab kaum plaub lub xyoos, lub sijhawm ntawd muaj ib zaj xwm hais txog “muaj ob peb tug txivneej tuaj nram lub xeev Yudas tuaj txog hauv lub nroog Ati-aukias. Lawv qhia cov ntseeg hais tias: Nej yuav tsum ua kevcai txiav raws li Mauxes txoj Kevcai nej thiaj yuav dim nej lub txim” (Tes Haujlwm 15:1). Ntawd yog tej lus qhia cuav, tsis yog Txojmoo Zoo uas Timthawj Paulus tabtom qhia. Vim li ntawd, thiaj muaj kev sibcav loj heev ntawm Timthawj Paulus thiab Npananpas nrog pab neeg no. Kalatias 2:1-10 sau txog zaj uas nkawd coj Titus mus nram Yeluxalees ntsib Pawg Ntseeg cov thawjcoj, sibtham txog tej yam tseemceeb ntawm Txojmoo Zoo. Suav leej Yakaunpaus, Yauhas thiab Petus, rooj sibtham zaug no tseem muaj cov neeg “cov ntseeg uas yog cov Falixais pab” tuaj koom, thiab lawv pom zoo qhov uas lwm haivneeg los ntseeg yuav tsum ua kevcai txiav (Tes Haujlwm 15:5). Thaum kawg, Timthawj Petus thiaj xaus lus hais tias, “qhov uas peb dim peb lub txim twb yog vim tus Tswv Yexus hlub peb xwb. Lawv los kuj ib yam nkaus li peb thiab” (Tes Haujlwm 15:11). Tomqab ntawd Pawg Ntseeg cov thawjcoj tau “tuav” Timthawj Paulus thiab “Npananpas sab tes xis” (nqe 9), pom zoo tej uas nkawd ua thiab cia nkawd mus qhia Txojmoo Zoo rau lwm haivneeg.
Peb pheej tuaj ib pab ntawm ob pab neeg tog: Qee zaug peb zoo li cov ntseeg uas yog neeg Yudas, quab yuam lwm tus ua raws tej qub “kevcai”. Peb muab quab los dai rau lwm tus caj dab thaum xav hais tias tus ntseeg yuav tsum zoo li no, li tod. Qee zaug, peb ho tsis ceevfaj, qhib siab txais yuav txhua yam tshiab. Peb pom hais tias tus kheej kev ntseeg loj dua thaum hais tias “Vaj Ntsujplig hais li no rau kuv”, lossis hais tias “tus xibhwb no qhia zoo dua, tshiab dua”… tiamsis ho tsis ua tibzoo ntsuamxyuas saib tej lus qhia ntawd puas tau kev “pom zoo” lossis kev “tuav tes xis” ntawm Vajluskub.
Txawm tias Timthawj Paulus hais tawv qhawv hais tias, Txojmoo Zoo uas nws tshajtawm yog tus Tswv qhia ncaj nraim rau nws, tsis yog nws kawm ntawm cov timthawj, los nws yeej zeem paub qhov tseemceeb ntawm kev sib koom lossis qhov zoo sib thooj ntawm Txojmoo Zoo uas nws qhia thiab Txojmoo Zoo uas lwm tus timkhawv tseeb hauv Pawg Ntseeg qhia, tshuav cov ntseeg hauv Kalatias ho maj tso Txojmoo Zoo ntawm ib tug timthawj tseeb tseg, mus raws lwm “Txojmoo Zoo” uas tsis tau cov timthawj pom zoo.
Peb zoo thooj leejtwg? Zoo li cov ntseeg uas yog neeg Yudais muab tus kheej thiab lwm tus kaw rau hauv txoj qub kevcai, lossis zoo li cov ntseeg hauv Kalatias uas tsis ua tibzoo sojntsuam thaum txais tej lus qhia tshiab?
Thov Vajtswv,
Tus Tswv, thov ua Koj tsaug vim niaj hnub nimno nyuam yaus tau Koj pub muaj tej lus ua timkhawv sau tseg hauv Vajluskub. Thov pab nyuam yaus xyuamxim txais yuav txhua yam raws li Koj Txojlus qhia. Nyuam yaus tuav Yexus Khetos lub npe thov, Amees.
Zaj kawm hnub no qhuab ntuas peb ras txog yam dabtsi?
Nyeem Vajluskub hauv peb lub xyoos: Lukas 15
Kênh Youtube BHKTHN:
