Klei Aê Diê Blŭ: I Kôrantô 10:1-13
Êlan kliăng: “Aê Diê jing sĭt suôr, leh anăn Ñu amâo brei ôh klei mplư truh kơ diih êgao hĭn kơ ai ktang diih, ƀiădah mbĭt hŏng klei mplư anăn Ñu srăng mkra mơh êlan diih dưi tlaih, čiăng kơ diih dưi gĭr tŭ klei anăn” (I Kôrantô 10:13b)
Klei êmuh ksiêm mĭn: Ya klei kñăm čiăng Y-Pôl mñă kơ hƀuê ênuk phung ƀuôn sang Israel? Ya klei ñu mtô kơ klei mplư leh anăn êlan hdră čiăng dưi găn klei mplư anăn? Si klei bi mđĭ ai drei tơdah dôk tlă anăp hŏng klei mplư?
Khua ƀĭng kna Y-Pôl mñă wĭt kơ klei yuôm bhăn prŏng Aê Diê ngă leh kơ phung ƀuôn sang Israel hlăk mphŭn dô (êlan 1-4). Wăt tơdah ƀuh leh dưn klei Aê Diê răng kriê, ƀiădah lu hlăm phung diñu “Ƀiădah Aê Diê amâo mơak ôh hŏng lu hĭn hlăm phung diñu; kyuanăn Aê Diê bi mdjiê diñu hlăm kdrăn tač” (êlan 5). Ñu lŏ yăl dliê wĭt hƀuê ênuk ruă ênguôt phung ƀuôn sang Israel găn leh čiăng kơ phung đăo ti ƀuôn Kôrantô wăt kơ drei msĕ mơh hriăm mđrăm mbĭt klei hriăm yuôm anei. Anei ăt jing klei hưn êlâo brei răng, čiăng kơ phung anak ƀuôn sang Aê Diê dôk kăp răng nanao ti anăp klei mplư. Brei drei thâo krơ̆ng kriê drei pô, amâo tŭ ư hlue klei tluh čiăng jhat ƀai msĕ si phung aê đưm, čiăng đăm dluh lĕ ôh.
Mđrĭng mbĭt hŏng klei hưn êlâo brei răng, khua ƀĭng kna Y-Pôl ăt mtă mtăn brei drei răng, đăm knang kơ klei ktang drei pô ôh huĭdah srăng lĕ buh amâo hmao thâo (êlan 12). Leh anăn ñu lŏ brei drei thâo mơh kơ klei mplư amâodah klei lông dlăng khăng truh kơ drei “Ñu amâo brei ôh klei mplư truh kơ diih êgao hĭn kơ ai ktang diih”. Ñu lač klă Aê Diê jing Pô Sĭt Suôr, Ñu amâo brei drei tŭ êgao kơ hnơ̆ng drei dưi tŭ ôh. Leh anăn hlăm klei mplư, tơdah drei đăo knang kjăp kơ Khua Yang, Ñu srăng pŏk êlan kơ drei dưi tlaih (êlan 13). Hlăm klei ƀuăn anei, drei thâo kơ Aê Diê ăt dôk mbĭt hŏng drei hlăm jih jang klei mplư drei dôk tlă anăp. Ñu brei kơ drei ai ktang čiăng dưi bi kdơ̆ng hŏng klei mplư leh anăn Ñu rơ̆ng snei, jih jang klei mplư leh anăn klei lông dlăng truh kơ drei amâo tuôm prŏng đei tơl drei amâo dưi tŭ ôh.
Phung khua mtao lăn ala mmăt tĭt mâo nanao hlăm klei hdĭp anei, kyuanăn amâo mâo hlei pô dưi tlaih ôh kơ klei mplư. Drei tlă anăp nanao hŏng klei mplư hlăm lam wăt mơ̆ng êngao. Ƀiădah lĕ, Klei Aê Diê Blŭ ƀuăn srăng mâo nanao êlan dưi tlaih mơ̆ng klei mplư tơdah drei kăp đup gưt tui si klei Aê Diê čiăng. Wăt tơdah êlan anăn amâo jing ênưih ôh, năng ai bŏ hŏng ƀrŏng êruê, dleh dlan, ƀiădah Khua Yang dôk mbĭt nanao leh anăn srăng pŏk êlan kơ drei dưi tlaih mơ̆ng klei mplư. Klei kñăm jing “čiăng kơ diih dưi gĭr tŭ klei anăn”. Hlăm klei mplư, mta yuôm jing drei “dưi gĭr tŭ” leh anăn dưi găn, mơ̆ng anăn drei dưi đĭ hriê kơ prŏng hlăm klei đăo. Đăm mâo ôh hlei pô lač snei, kâo amâo lŏ adôk ai ktang dưi găn klei mplư ôh, amâodah kâo awăt đei amâo dưi dôk kjăp ôh ti anăp klei lông dlăng prŏng đei anei. Brei drei hdơr Aê Diê ƀuăn brei kơ drei klei ktang čiăng dưi găn klei lông dlăng mơ̆ng klei mplư. Amâo mâo ôh klei mplư amâo dưi găn, Aê Diê brei nanao kơ drei êlan dưi tlaih. Hrô kơ klei kdŭn, lui brei amâodah êbuh lĕ ti anăp klei mplư, brei drei dlăng kơ klei sĭt suôr Khua Yang čiăng thâo ƀuh êlan Ñu pŏk brei kơ drei dưi tlaih.
Ti anăp klei mplư, drei kdŭn lui brei amâodah knang kơ klei ktang Khua Yang čiăng dưi găn?
Wah lač: Ơ Khua Yang, akâo Ih thiăm ai ktang kơ kâo tơdah kâo tlă anăp hŏng klei mplư. Akâo Ih đru kâo dôk kjăp leh anăn djă păn klei Ih ƀuăn, jih ai tiê tui duah êlan Ih pŏk čiăng dưi hĭn hŏng klei mplư. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Yap 26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
