1 Kauleethaus 10:1-13
Nqe cim:
“Vajtswv yog tus ncaj ncees, nws yeej tsis cia nej raug kev sim siab dhau qhov uas nej yuav nyiaj tsis taus, tiamsis thaum nej raug kev sim siab Vajtswv yuav pab kom nej ua taus lub siab ntev” (1Kauleethaus 10:13b)
Lus nug rau sawvdaws xav:
– Timthawj Paulus rov hais txog yam Vajtswv ua rau cov Yixalayees ua dabtsi?
– Paulus qhia li cas txog kev dag ntxias thiab qhov uas hla dhau kev dag ntxias?
– Peb tau txhawb zog li cas thaum uas ntsib kev dag ntxias?
Timthawj Paulus rov hais txog tej yam txujci loj uas Vajtswv tau pab cov Yixalayees yav dhau los (1-4). Txawm yog twb tau saj Vajtswv kev pab tu thiab saib xyuas lawm los cov Yixalayees “muaj ntau leej ua tsis haum Vajtswv siab, Vajtswv thiaj ua rau lawv tuag pawglug tom tiaj suabpuam” (nqe 5). Paulus hais txog tej uas Vajtswv ua rau cov Yixalayees dhau los lawd cia kom cov ntseeg hauv Kauleethaus thiab peb txhua tus kawm tau zaj kawm muaj nqis rau nyias. Tej ntawd kuj yog lus ceebtoom Vajtswv cov menyuam txhua tus nco ntsoov ceevfaj kev dag ntxias. Peb yuavtsum paub tswj yus, tsis ua raws li tej kev ntshaw ntawm lub siab phem qias li cov yawgkoob hnub thaud ua, peb thiaj yuav tsis raug puastsuaj.
Tsis tas li ntawd xwb, tim thawj Paulus tseem ntuas kom peb yuavtsum xyuamxim, txhob tso siab hais tias yus sawv khov tsam ntog thaum twg tsis paub (nqe 12). Thiab timthawj Paulus kuj qhia hais tias tej kev sim siab uas tuaj raug peb, Vajtswv “Nws yeej tsis cia nej raug kev sim siab dhau qhov uas nej yuav nyiaj tsis taus”. Paulus qhia meej hais tias, Vajtswv yog tus uas ncaj ncees Nws yeej tsis cia peb tiv tej uas dhau peb lub zog. Thiab thaum peb ntsib kev sim siab dag ntxias, yog peb tso siab rau Vajtswv ces Nws yuav qhib kev rau peb tawm (nqe 13). Yog li ntawd, tej lus cogtseg no ua rau peb paub hais tias, Vajtswv yeej nrog nraim peb nyob thaum uas peb ntsib txhua yam kev sim siab dag ntxias. Vajtswv pub peevxwm rau peb muaj zog nyiaj taus, thiab hais tias txhua yam kev sim siab, kev dag ntxias yeej tsis hnyav dhau peb lub zog.
Tus vajntxwv uas kav lub tebchaws tsaus ntuj, yeej tshwm muaj rau txhua tus hauv kev ua neej tiam nimno, yeej tsis muaj leejtwg yuav qaij tau kom tsis ntsib kev sim siab dag ntxias li. Peb txhua tus pheej ntsib kev sim siab dag ntxias sab nqaij tawv thiab sab ntsujplig huv tibsi. Tiamsis Vajtswv Txojlus cog tseg tias yeej yuav muaj kev rau peb tawm, thaum peb ua li Vajtswv lub siab nyiam. Txawm hais tias txoj kev ntawd yuav tsis yoojyim, txawm yuav nyuaj thiab khwv li cas xij, Vajtswv yeej yuav nrog peb nyob thiab qhib kev rau peb tawm taus ntawm kev sim siab uas tuaj dag ntxias. Qhov tseemceeb yog “pab kom nej ua taus lub siab ntev”. Thaum ntsib kev sim siab, kev dag ntxias, qhov tseemceeb peb yuavtsum “ua siab ntev nyiaj” thiab tiv kom hla dhau, ua tau li ntawd peb thiaj loj hlob rau hauv sab kev ntseeg. Tsis xav kom muaj leejtwg hais tias, kuv tsis muaj zog txaus hla dhau kev dag ntxias, lossis tsis muaj zog sawv ruaj khov rau hauv txoj kev sim siab uas loj kawg nkaus no. Cia li nco ntsoov hais tias, Vajtswv coglus yuav pab kom peb muaj txaus dag zog hla dhau kev sim siab ntawm tej kev dag ntxias. Yeej tsis muaj ib txoj kev sim siab thiab dag ntxias twg uas peb yuav hla tsis tau dhau li, tiamsis Vajtswv yuav qhib ncauj kev rau peb khiav tau tawm. Txhob cia peb swb lossis puastsuaj rau kev sim siab tuaj dag ntxias, tiamsis cia li tig saib Vajtswv txoj kev ncaj ncees, kom pom ncauj ke uas Vajtswv qhib rau peb khiav taus tawm hauv kev dag ntxias.
Thov Vajtswv:
Vajtswv, thov ntxiv dag zog rau nyuam yaus, thaum uas nyuam yaus ntsib tej kev dag ntxias. Thov pab nyuam yaus sawv khov rau hauv Koj Txojlus cogtseg thiab tas siab nrhiav kom tau txoj ncauj ke uas Vajtswv Koj yuav qhib rau nyuam yaus tawm kom kovyeej kev dag ntxias. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Thaum ntsib kev sim siab, kev dag ntxias, peb yuav cia li swb lossis vamkhom Vajtswv pab kom peb hla dhau?
Nyeem Vajluskub hauv peb lub xyoos: Teev Npe 26
Kênh Youtube BHKTHN:
