Klei Aê Diê Blŭ: Y-Yôhan 14:27-29
Êlan kliăng:
“Leh anăn klei êđăp ênang Aê Diê êgao hĭn kơ jih jang klei thâo săng, srăng kiă kriê ai tiê leh anăn klei mĭn diih hlăm Krist Yêsu” (Philip 4:7).
Klei êmuh ksiêm mĭn: Ya mta gru knăl klei êđăp ênang Khua Yang Yêsu ƀuăn brei kơ phung ƀĭng kna? Ya klei Khua Yang lač hŏng diñu? Si ngă klei phung ƀĭng kna Khua Yang mphŭn dô leh anăn phung anak Aê Diê ênuk anei bi knal klei êđăp ênang hlăm Khua Yang?
Boh blŭ “êđăp ênang” hlăm klei Hêbrơ jing “Shalom”. Anăn jing klei kkuh čhưn tui si kdruêh grua phung Israel, mblang jing hơêč hmưi mâo klei mdrŏng sah, jăk mơak, klei dưi leh anăn klei êđăp ênang hŏng mah jiăng, găp djuê mbĭt hŏng klei bi mguôp hŏng phung knŭk kna. Ƀiădah, klei mblang klă kơ boh blŭ “Shalom” jing “bi leh ênŭm” amâodah “hrông hruêh”. Y- Giđêôn mdơ̆ng sa boh knưl kơ Yêhôwa leh anăn pia anôk anăn “Yahweh Shalom” mblang jing “Yêhôwa jing klei êđăp ênang” (Phung Khua Phat Kđi 6:24). Khua ƀĭng kna Y-Pôl mñă klei anei hlăm hră Êphêsô 2:14-15, leh anăn ñu mblang Aê Diê “bi klưh leh mnư̆ klei bi roh kah mbha” plah wah drei hŏng Aê Diê kyua hŏng klei djiê Khua Yang Yêsu, leh anăn hŏng klei anăn yơh drei dưi lŏ mâo klei êđăp ênang Ñu. Anăn yơh jing klei êđăp ênang hlăm Khua Yang.
Êlâo kơ đĭ wĭt ti adiê, Khua Yang Yêsu ƀuăn leh brei klei êđăp ênang kơ phung ƀĭng kna. Ñu kñăm sĭt: “kâo brei kơ diih klei êđăp ênang kâo pô. Kâo brei kơ diih amâo djŏ msĕ si lăn ala brei ôh” (êlan 27). Klei êđăp ênang Khua Yang brei amâo djŏ msĕ si klei êđăp ênang mơ̆ng lăn ala ôh. Lăn ala êđăp ênang tơdah amâo mâo ôh klei mtŭk mtŭl, klei bi blah; ƀiădah klei êđăp ênang Khua Yang jing klei êđăp ênang hlăm djăp mta klei truh, êđăp ênang tơdah dôk hlăm Khua Yang. Khua Yang ăt lač mơh kơ phung ƀĭng kna: “Đăm brei ai tiê diih rŭng răng ôh, kăn huĭ rei.” Tơdah mă tŭ leh klei êđăp ênang Khua Yang brei, drei mâo klei rơ̆ng dôk hlăm klei bi mguôp êđăp ênang hŏng Khua Yang leh anăn djă păn kjăp klei ƀuăn, Khua Yang Yêsu đuĕ nao, leh anăn srăng lŏ hriê drông drei (êlan 28). Hdĭp hlăm klei bi mguôp hŏng Khua Yang, mâo klei êđăp ênang Khua Yang gĭt gai ai tiê, drei mâo klei čang hmăng leh anăn ai tiê đăo kjăp khut khat kơ klei Khua Yang ƀuăn “lŏ hriê”. Kyuanăn yơh, wăt tơdah ya klei truh dưn, wăt tơdah klei hdĭp dleh dlan dưn, drei ăt thâo kral klei êđăp ênang hlăm Khua Yang.
Khua ƀĭng kna Y-Pôl brei thâo: “Leh anăn klei êđăp ênang Aê Diê êgao hĭn kơ jih jang klei thâo săng, srăng kiă kriê ai tiê leh anăn klei mĭn diih hlăm Krist Yêsu” (Philip 4:7). Klei êđăp ênang hlăm Khua Yang amâo djŏ msĕ si klei bi mĭn mnuih ôh leh anăn ăt kăn hriê tui si klei truh mơ̆ng êngao rei. Klei êđăp ênang anăn yơh srăng “kiă kriê ai tiê leh anăn klei mĭn” drei tlaih mơ̆ng djăp mta klei ênguôt hnĭng, rŭng răng leh anăn huĭ hyưt.
Tơdah tlă anăp hŏng djăp mta klei rŭng răng, mtŭk mtŭl hlăm klei hdĭp ară anei ti krah lăn ala bŏ hŏng klei bi mlih prŏng, brei bĕ klei êđăp ênang Khua Yang gĭt gai ai tiê drei. Dôk bĕ nanao hlăm Khua Yang, hlăm klei bi mguôp hŏng Khua Yang Yêsu leh anăn hlăm klei Yang Mngăt Jăk Aê Diê atăt gai, kiă kriê čiăng kơ grăp mnĭt mmông hlăm klei hdĭp drei srăng bi knal klei êđăp ênang êgao hĭn kơ jih jang klei thâo săng phung mnuih.
Si ngă drei mâo klei bi knal klei êđăp ênang hlăm Khua Yang leh amâodah ka?
Ơ Khua Yang, akâo kơ Ih brei kâo thâo bi knal nanao klei êđăp ênang hlăm Khua Yang čiăng kơ kâo đăm huĭ hyưt, rŭng răng ôh ti krah klei hdĭp anei. Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
