Klei Aê Diê Blŭ: II Klei Yăl Dliê 20:31-32
Êlan kliăng:“Ñu êbat tui êlan Y‑Asa ama ñu, leh anăn amâo weh mơ̆ng êlan anăn ôh; ñu ngă klei djŏ ti anăp ală Yêhôwa”(II Klei Yăl Dliê 20:32)
Klei êmuh ksiêm mĭn: Si trăn Klei Aê Diê Blŭ hruê anei lač kơ Mtao Y‑Jôsaphat? Hlei pô Mtao Y‑Asa, ama Mtao Y‑Jôsaphat tui hlue leh? Si klei hdĭp drei hmăi leh kơ anak čô pô leh anăn phung mkăn?
Mtao Y‑Jôsaphat jing mtao tal pă ti ala mtao Yuđa, ñu đĭ jing mtao hlăk tlâo pluh êma thŭn leh anăn kiă kriê dua pluh êma thŭn ti Yêrusalem. Klah čŭn kơ klei hdĭp Mtao Y‑Jôsaphat mâo dua kdrêč, kdrêč tal sa jing mâo klei bi mklă jăk (êlan 31-32), leh anăn tal dua lač kơ dŭm bruă mtao ngă amâo jăk (êlan 33-37).
Klei hdĭp mtao dưi lač jăk kyua ngă leh “ñu ngă klei djŏ ti anăp ală Yêhôwa” leh anăn êbat hlue si êlan ama pô jing Mtao Y‑Asa (êlan 32). Drei thâo Mtao Y‑Asa “êbat tui hlue êlan ama ñu êbat leh hlăm ênuk mphŭn êlâo”(II Klei Yăl Dliê 17:3), ngă klei jăk leh anăn kpă ti anăp Aê Diê, ñu mtă kơ Yuđa brei tui duah Yêhôwa Aê Diê hlue ngă klei bhiăn leh anăn klei Aê Diê mtă (II Klei Yăl Dliê 14:3-4). Kyua anăn Mtao Y‑Jôsaphat, anak êkei ñu, ăt dưi hmăi mơ̆ng knuih hdĭp mtao ama, “duah Aê Diê ama ñu leh anăn êbat tui hlue klei gơ̆ mtă, leh anăn amâo ngă ôh tui si phung Israel ngă” (II Klei Yăl Dliê 17:4) hlue si êlan ama pô. Mtao Y‑Jôsaphat ăt tiŏ mnuih nao mtô klei bhiăn Aê Diê hlăm dŭm ƀuôn Yuđa (II Klei Yăl Dliê 17:7-9) leh anăn mtao ăt nao kơ phung ƀuôn sang atăt digơ̆ wĭt hŏng Yêhôwa Aê Diê (II Klei Yăl Dliê 19:4).
Mtao Y‑Asa, ama Mtao Y‑Jôsaphat, tui hriăm leh klei bi hmô jăk mơ̆ng Mtao Y‑Đawit, leh anăn ñu pô ăt jing sa čô bi hmô jăk ba klei mđĭ ai kơ anak êkei mtao jing Mtao Y‑Jôsaphat. Klei hdĭp mtao Y‑Asa ƀiă lu ăt đru kơ anak pô jing sa čô mtao thâo khăp, huĭ mpŭ kơ Aê Diê. Bi Mtao Y‑Jôsaphat, wăt tơdah amâo jing kluôm ênŭm ôh ƀiădah mtao ăt jing pô atăt êlan phung ƀuôn sang Aê Diê hlăm klei đăo, dưi hŏng phung roh jhŏng ktang hĭn (II Klei Yăl Dliê 20:1-30).
Klei hdĭp drei msĕ mơh, ƀiădah lu ăt hmăi jăk amâodah jhat kơ anak čô leh anăn phung mkăn kyua drei hlue ngă Klei Aê Diê Blŭ amâodah hơăi. Năng ai drei jing phung amĭ ama, phung ktrâo lač, phung êbat hlăm klei đăo ba klei mđĭ ai kơ anak čô pô leh anăn phung mrâo đăo dưi hriê kơ prŏng, đru kơ diñu dưi hĭn hŏng klei mplư hlăm lăn ala, yang jhat, boh nik dưi đru digơ̆ jing phung mâo Aê Diê yua. Khădah snăn, drei ăt dưi jing boh tâo bi têč hnêč kơ phung mkăn ngă kơ digơ̆ êbuh, jing êdu awăt, êwiên êwu hlăm klei đăo amâodah luč klei đăo. Klei hdĭp drei amâo djŏ knŏng hmăi kơ drei đuč ôh, ƀiădah lŏ hmăi kơ anak čô leh anăn phung mkăn. Kyua anăn, brei thâo răng kơ klei hdĭp pô.
Klei hdĭp drei jing gru mngač jăk hĕ amâodah jing hĕ boh tâo bi têč hnêč kơ phung mkăn?
Wah lač: Ơ Khua Yang, akâo kơ Ih đru kâo thâo hdĭp hlue si Klei Aê Diê Blŭ mtô, hdĭp kyua Khua Yang leh anăn kyua phung mkăn čiăng kơ klei hdĭp kâo jing nanao gru mngač jăk ba klei đru, mđĭ ai klei đăo kơ phung mkăn.
Dlăng Klei Aê Diê Blŭ hlăm tlâo thŭn: Y‑Yôhan 5:31-6:24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
