Klei Aê Diê Blŭ: Klei Kbiă 27:20-21.
Êlan kliăng: “Snei klei mtô hmei hmư̆ leh mơ̆ng Ñu leh anăn hưn kơ diih, Aê Diê jing klei mngač leh anăn hlăm Ñu amâo mâo klei mmăt ôh hơăi.” (I Y‑Yôhan 1:5).
Klei êmuh ksiêm mĭn: Si hnơ̆ng čuăn êa boh ôliwơ arăng yua čuh hlăm Sang Yang? Ya bruă phung ƀuôn sang leh anăn phung khua ngă yang ngă čiăng krơ̆ng pui hlăm Sang čhăm trơ̆ng nanao? Ya ngă lă lar phung ƀuôn sang Aê Diê ruah brei krơ̆ng pui trơ̆ng nanao ti anăp Aê Diê mơ̆ng mmăt truh aguah? Aê Diê čiăng drei čuh pui ngač si ngă leh anăn ti anôk?
Aê Diê kčah klei čuh pui hlăm Sang Aê Diê jing êa boh ôliwơ doh bi lik ƀhĭ. Anei jing mta êa pui mdê hjăn dưi mkra mơ̆ng boh ôliwơ ka ksă; tlê bi li, kar lu tal mnal, kar lu bliư̆ čiăng dưi mâo êa boh ôliwơ doh bi lik. Mkra êa boh ôliwơ anei sĭt čuh srăng amâo mâo asăp ôh amâodah mâo ƀiă snăk asăp. Aê Diê jing Pô doh jăk, djăp mta mnơ̆ng dưi yua hlăm Sang Aê Diê mâo jih jang mnơ̆ng čuh jăk doh. Mta êa pui Ôliwơ anei kyua phung ƀuôn sang mkăp, Y‑Arôn leh anăn phung anak êkei ñu mâo bruă klam răng kriê, trôč nanao êa pui hlăm jơ̆ng diăn čiăng kjuh boh pui trơ̆ng nanao ti anăp Aê Diê, mơ̆ng adiê tlam truh adiê aguah snăn dưi mdjiê (dlăng thiăm hlăm I Y‑Samuel 3:1‑3). Kyua Aê Diê jing klei mngač, ti anăp anôk Aê Diê dôk brei mâo nanao klei mngač.
Čiăng kơ pui kđen hlăm Sang čhiăm trơ̆ng nanao ti anăp Aê Diê, brei phung ƀuôn sang Ñu mkăp djăp ênŭm êa boh ôliwơ doh, bi Y‑Arôn hŏng djuê ana ñu brei kriăng trôč êa pui. Aê Diê čiăng phung ƀuôn sang Ñu gưt asăp, leh anăn jih jang mnuih đru hlăm klei kkuh mpŭ kơ Ñu. Bruă Aê Diê brei phung ƀuôn sang krơ̆ng pui kđen trơ̆ng nanao jing sa klei bhiăn lă lar mñă kơ diñu kơ sa Aê Diê doh jăk, čiăng kơ diñu huĭ mpŭ kơ Aê Diê êbat hlăm klei mngač Ñu.
Hruê anei, grăp čô phung đăo kơ Krist jing sa boh Sang anôk Aê Diê, “Diih amâo thâo hĕ kơ asei mlei diih jing sang kkuh mpŭ kơ Yang Mngăt Jăk dôk leh hlăm diih, Pô diih mă tŭ leh mơ̆ng Aê Diê? Diih amâo lŏ jing dŏ diih pô ôh? (I Kôrantô 6:19). Khua Yang Yêsu bi hmô leh phung ƀĭng kna Ñu jing klei mngač kơ lăn ala leh anăn Ñu čang hmăng klei mngač drei mtrang kơ grăp čô mnuih ƀuh bruă jăk drei ngă leh anăn bi mni kơ Aê Diê (Y‑Mathiơ 5:14‑16). Phung đaŏ kơ Krist mâo bruă klam bi lar klei mngač Aê Diê ti krah lăn ala mmăt tĭt, ti krah êpul êya pô dôk hdĭp mda, Sang Aê Diê, anôk mă bruă, sang hră, gŏ sang leh anăn wăt anôk hjăn pô kyua êa doh leh anăn jăk jing Yang Mngăt Aê Diê brei kơ drei leh drei mă tŭ Khua Yang Yêsu.
Ya klei gun kpăk ngă kơ pui kđen drei dưi mtrang mngač nanao ti anăp Aê Diê? Si drei srăng mgaih msir?
Wah lač: Ơ Khua Yang pô doh jăk leh anăn myang hĭn. Akâo kơ Ih kiă kriê ai tiê leh anăn klei mĭn kâo čiăng klei blŭ, bruă ngă leh anăn klei mĭn kâo dưi jing doh jăk, mtrang klei mngač Aê Diê hlăm klei hdĭp kâo, mơ̆ng anăn lu mnuih srăng nao giăm Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Y‑Samuel 21:15-22:24
Kênh Youtube BHKTHN:
