Klei Aê Diê Blŭ: Y-Yakơ 4:7-10
Êlan kliăng: “Snăn đup gưt bĕ kơ Aê Diê. Bi kdơ̆ng bĕ hŏng yang jhat, leh anăn ñu srăng đuĕ kbưi mơ̆ng diih” (Y-Yakơ 4:7)
Klei êmuh ksiêm mĭn: Si mblang klei đup gưt kơ Aê Diê? Si knuih hdĭp bi êdah phung hdĭp đup gưt kơ Aê Diê? Ya klei brei drei ngă čiăng hdĭp đup gưt kơ Aê Diê?
Tơdah êmuh ruah Aê Diê amâodah lăn ala, klă sĭt grăp čô drei srăng wĭt lač drei pô ruah Aê Diê. Ƀiădah čiăng dôk tĭng Aê Diê, amâo mâo klei mkăn ôh jing brei đup gưt kơ Ñu, Boh blŭ “ đup gưt” mblang ktang hĭn lu snăk mkă hŏng “gưt asăp”. Hlăm boh blŭ phŭn Grĕk, boh blŭ anei jing dưm pô ti gŭ klei dưi. “Đup gưt” dưi săng jing đup gưt kơ klei dưi ti dlông pô leh anăn gưt ngă hlue si asăp mtrŭn. Đup Gưt kơ Aê Diê jing thâo kral klei Aê Diê kiă kriê hlăm klei hdĭp pô, mdưm jih klei čang hmăng, klei êpa mhao, hdră kčah pô ti gŭ klei Aê Diê čiăng, jih ai tiê gưt hlue si klei Ñu mtă, klei bhiăn Ñu.
Hlăm dŭm êlan Klei Aê Diê Blŭ anei, Y-Yakơ lač kơ knuih hdĭp phung đup gưt kơ Ñu. Êlâo hĭn, brei bi kdơ̆ng hŏng yang jhat (êlan 7). Yang jhat ngă djăp êlan ktŭng anak mnuih kbưi hŏng Khua Yang. Ƀiădah drei dưi knang kơ klei myang Khua Yang čiăng bi kdơ̆ng hŏng klei diñu ktŭng leh anăn Khua Yang rơ̆ng, yang jhat srăng đuĕ kbưi hŏng drei. Hlăm êlan 8, Y-Yakơ lač kơ bruă “bi doh bĕ kngan” leh anăn “bi doh bĕ ai tiê”. “Bi doh kngan” lač kơ bruă ngă, knuih hdĭp doh jăk hlăm klei hdĭp bi êdah ti êngao. Bi klei “Bi doh bĕ ai tiê” lač kơ klei doh jăk hlăm lam anak mnuih. Snăn, phung đup gưt kơ Aê Diê brei khut khat lui klei soh, bi mlih mơ̆ng lam truh ti êngao. Snăn kơh dưi nao giăm Aê Diê.
“Brei diih ênguôt, kơŭ kyăm leh anăn hia. Brei klei diih tlao bliư̆ jing klei kơŭ kyăm, leh anăn klei diih hơ̆k bliư̆ jing klei ênguôt hnĭng” (êlan 9), anei jing asăp iêô kmhal klei soh. Hrô kơ khăp tluh čiăng, dưn klei mơak ti lăn ala, phung gưt kơ Khua Yang thâo kral knuih hdĭp msĕ snăn amâo bi mơak kơ Aê Diê ôh, amâo dôk tĭng Aê Diê ôh, brei lui hĕ. Jih jang klei čuăn ai tiê bi kdơ̆ng hŏng yang jhat, lui klei soh, kmhal leh anăn bi mlih knuih hdĭp knŏng dưi ngă tơdah drei thâo “bi ti gŭ pô ti anăp Aê Diê”. Yang Mngăt Jăk jing Pô brei drei gưt, srăng ktrâo jih klei soh hlăm klei hdĭp drei. Tơdah drei luă gŭ ti anăp Aê Diê, drei srăng brei Yang Mngăt Jăk êngiê ngă bruă, atăt drei kơ klei kmhal sĭt kơ klei soh, mơ̆ng anăn srăng dưi thâo kral klei bi mlih.
Phung đăo kơ Krist jing phung hdĭp ti krah dua anôk: Ƀuôn Ala Mtao leh anăn lăn ala. Êlan nao mơ̆ng leh drei bi tuôm hŏng Khua Yang jing êlan nao ƀrư̆ kbưi hĭn hŏng lăn ala leh anăn nao giăm ƀuôn ala mtao. Gưt kơ Aê Diê amâo djŏ jing sa klei čuăn ngă bhiâo êjai ôh, kơ sa wưng ôh, ƀiădah jing sa hdră ngă nanao amâo mdei ôh, lŏ čuê, grăp hruê leh anăn grăp mnĭt grăp mmông hlăm klei hdĭp.
Drei dôk hdĭp klei hdĭp đup gưt kơ Aê Diê grăp hruê mơ̆?
Wah lač: Ơ Khua Yang, akâo kơ Ih đru kâo đup gưt kơ Ih kluôm dhuôm leh anăn nanao grăp hruê. Akâo kơ Ih ktŭng kâo giăm Ih hĭn, čiăng kơ kâo mâo ai ktang mrâo bi kdơ̆ng hŏng yang jhat, dưi hŏng klei mplư, thâo kral sa klei hdĭp dưi bi mlih mơ̆ng lam truh ti êngao. Akâo kơ Yang Mngăt Jăk ƀuah mkra kâo, ktrâo atăt kâo, leh anăn brei klei ktang čiăng kơ kâo êbat hlăm klei Ih čiăng leh anăn hdĭp bi guh kơang Anăn Ih. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
