Yakaunpaus 4:7-10
Nqe cim:
“Yog li ntawd, nej cia li mloog Vajtswv lus. Nej yuav tsum tawmtsam dab Ntxwgnyoog, dab thiaj yuav khiav ntawm nej mus” (Yakaunpaus 4:7)
Phau Txhais Tshiab HMOWSV:
“Vim li no nej cia li nyob hauv Vajtswv qab kev tswjhwm. Cia li tawm tsam Ntxwg Nyoog, Ntxwg Nyoog thiaj li khiav ntawm nej mus.”
Lus nug rau sawvdaws xav:
- Nyob hauv Vajtswv qab kev tswjhwm txhais li cas?
- Cov uas nyob hauv Vajtswv qab kev tswjhwm yuav qhia tshwm lub neej zoo li cas?
- Peb yuav tsum ua li cas thiaj muaj lub neej nyob hauv Vajtswv qab kev tswjhwm?
Yog nug hais tias yuav xaiv Vajtswv los yog ntiajteb, ces paub tseeb tias peb txhua tus yeej yuav teb hais tias peb xaiv Vajtswv. Tiamsis yog xav tuaj Vajtswv tog, peb yuav tsum nyob hauv Vajtswv qab kev tswjhwm. Lo lus “nyob hauv qab kev tswjhwm” muaj lub ntsiab muaj zog dua lo lus “mloog lus”. Nyob hauv lus Kilis, lo lus no txhais hais tias cia yus nyob hauv qab ntawm ib lub hwjchim. “Nyob hauv qab kev tswjhwm” totaub hais tias yog hwm lub hwjchim uas siab dua yus thiab ua raws lub hwjchim ntawd tej lus hais. Nyob hauv Vajtswv qab kev tswjhwm yog zeem paub Vajtswv kev tswjkav yus lubneej, muab tus kheej tej kev ntshaw, kev npaj tseg tso hauv qab tus Tswv lub siabnyiam, txiav txim siab ua raws li Nws tej lus samhwm thiab tej kevcai.
Nyob hauv cov nqe Vajluskub no, Yakaunpaus qhia peb txog cov uas nyob hauv Vajtswv qab kev tswjhwm yuav tsum muaj lub neej zoo li cas tiag. Qhov xubthawj, yuav tsum tiv thaiv dab Ntxwgnyoog (nqe 7). Dab Ntxwgnyoog sim ua txhua yam kom neeg txav deb ntawm Vajtswv. Tiamsis peb muaj cuabkav siv Vajtswv lub hwjchim los tiv thaiv dab kev dagntxias, thiab Vajtswv coglus tias dab Ntxwgnyoog yuav khiav ntawm peb mus. Nyob hauv nqe 8, Yakaunpaus hais txog kev ntxuav tes thiab ntxuav lub siab (nqe 8). “Ntxuav tes” hais txog tes haujlwm, lubneej dawbhuv sab nraud. “Ntxuav lub siab” hais txog kev dawbhuv sab hauv. Yog li ntawd, tus uas mloog Vajtswv lus yuav tsum txiav txim siab tso tseg tej kev txhaum thiab hloov txij sab hauv mus rau sab nraud. Ua li ntawd thiaj yuav tau los nyob ze Vajtswv.
“Nej yuav tsum nyuaj siab thiab quaj ntsuag. Nej cov uas luag luag, nej cia li quaj. Nej cov uas zoo siab, nej cia li ntxhov siab” (nqe 9), ntawm no yog ib lo lus nqua hu hloov dua siab tshiab. Tus uas nyob hauv Vajtswv qab kev tswjhwm yuav tsis nyiam lossis ntshaw tej kev lom zem hauv ntiajteb, tiamsis zeem paub hais tias lubneej zoo li ntawd “tsis haum tus Tswv siab”, tsis tuaj tus Tswv tog, thiab yuav tsum tso lubneej zoo li ntawd povtseg. Tagnrho tej kev txiav txim siab tawmtsam dab Ntxwsnyoog, tso kev txhaum tseg thiab hloov lubneej dua tshiab tsuas tshwm muaj thaum“txo nej lub hwjchim tabmeeg Vajtswv”. Vaj Ntsujplig yuav yog tus uas ntes tau peb lub siab, qhia tej yam yuamkev hauv lubneej rau peb. Thaum peb txo hwjchim tabmeeg tus Tswv, peb yuav cia Vaj Ntsujplig ywjpheej ua haujlwm, coj peb mus rau kev hloov siab tseeb, thaum ntawd peb thiaj yuav ua tau lubneej uas twb pauv hloov lawm.
Cov ntseeg Tswv Yexus yog cov uas nyob ob qhov chaw: Saum Ntuj Ceeb Tsheej thiab hauv ntiajteb. Ncua kev txij thaum ntsib tus Tswv yog ncua kev txav deb ntiajteb zuj mus thiab txav ze Ceeb Tsheej zuj zus. Kev nyob hauv qab Vajtswv kev tswjhwm tsis yog ib qho kev txiav txim siab tamsid xwb, tiamsis yog ib txoj kev uas peb yuav tsum coj mus tas ib sim neej, ua txhua hnub thiab txhua lub sijhawm hauv peb lub neej.
Thov Vajtswv,
Tus Tswv, thov pab kom nyuam yaus mloog Koj lus tas siab txhua hnub. Thov rub nyuam yaus los ze Koj, pub lub zog tshiab kom nyuam yaus tawmtsam dab Ntxwgnyoog, kov yeej kev dagntxias, thiab muaj lub neej tshiab uas tau pauv hloov sab hauv sab nraud. Thov Vaj Ntsujplig qhia nyuam yaus, coj nyuam yaus, thiab pub hwjchim rau nyuam yaus taug Koj txojkev thiab ua lubneej rau Koj tau koobmeej. Nyuam yaus tuav Yexus Khetos lub npe thov, Amees.
Peb puas muaj lub neej nyob hauv Vajtswv qab kev tswjhwm txhua hnub?
Nyeem Vajluskub hauv peb lub xyoos: Yaxayas 26
Kênh Youtube BHKTHN:
