Klei Aê Diê Blŭ: I Kôrantô 4:6-13
Êlan kliăng: “Hmei jing phung khŏ kyua Krist, ƀiădah diih jing phung thâo mĭn hlăm Krist. Hmei jing awăt, ƀiădah diih jing ktang. Arăng mpŭ kơ diih, ƀiădah hmei arăng bi êmut. ” (I Kôrantô 4:10)
Klei êmuh ksiêm mĭn: Mơ̆ng êlan 6-13, ya klei soh Khua ƀĭng kna Y-Pôl mñă hlăm knuih hdĭp phung đăo Kôrantô? Si hdră ñu lŏ mkra knuih hdĭp soh čhuai digơ̆? Si ai tiê phung tui hlue Khua Yang klă sĭt? Ya klei mñă kơ drei mơ̆ng klei hriăm anei?
Klei bi mmiă leh anăn bi kah mbha hlăm Phung Sang Aê Diê Kôrantô mâo Khua ƀĭng kna Y-Pôl čih hlăm êbeh tlâo kdrêč hră. Ară anei, ti kdrêč tal êlâo (êlan 6-7), sa blư̆ dơ̆ng, ñu êdu êun mtă kơ Phung Sang Aê Diê hŏng klei thâo pô leh anăn mơ̆ng Y-Apôlôs snei, đăm “hlue pô anei bi kdơ̆ng hŏng pô mkăn” (êlan 6). Ñu mñă kơ digơ̆ hdơr kơ ya klei diñu mâo jing kyua Aê Diê brei sơăi. Bi mă tŭ leh ya dŏ arăng brei si ngă lŏ bi mni kơ pô?
Hlăm kdrêč tal dua (êlan 8-13), ñu bi mklă knuih hdĭp hưn kơ pô mơ̆ng phung đăo Kôrantô hlue si klei blŭ mâo klei mưč. Phung anei bi êdah klei ktưn hưn snăk kơ klei thâo mĭn, mbruă, mdrŏng sah pô (êlan 8) amâo mdê ôh hŏng Phung Sang Aê Diê Laôdisê hlăk đưm, diñu bi mĭn “Kâo jing mdrŏng, kâo čăt đĭ lu, leh anăn kâo amâo kƀah mnơ̆ng ôh”, ƀiădah boh sĭt, hlăm ală Aê Diê diñu jing “ƀun ƀin, hin tap, knap mñai, bum ală, leh anăn lưng mlŭn” (Klei Bi Êdah 3:17). Đa đa phung đăo mkăn ngă msĕ si pô jing khua kiă kriê (êlan 8), tơdah diñu ksiêm dlăng Khua ƀĭng kna anei hŏng Khua ƀĭng kna adih dlăng hlei pô năng mă bruă kơ pô hĭn!
Khua ƀĭng kna Y-Pôl lŏ mkra wĭt knuih soh čhuai diñu hŏng klei mtô snei, ai tiê sa čô ƀĭng kna klă sĭt mơ̆ng Aê Diê jing tŭ klei knap mñai, tŭ jing “mnơ̆ng bi êdah kơ lăn ala” (êlan 9). Anei jing rup mưng ƀuh hlăm ênuk mtao Rôm kiă kriê čiăng mplư phung ƀuôn sang hŏng klei brei digơ̆ bi hrăp klei hlăp lêñ lu mta, mâo wăt klei măk ƀai. Arăng bi kƀĭn dlăng klei bi lông klei thâo, boh nik klei bi lông plah wah phung mnă leh anăn hlô mnơ̆ng jhŏng. Phung khua ƀĭng kna Khua Yang Yêsu hlăm ênuk Khua ƀĭng kna Y-Pôl arăng mă mjing mnơ̆ng hlăp lêñ msĕ snăn. Khădah snăn, diñu tŭ klei arăng dlăng kơ diñu jing “khŏ”, jing mnuih “awăt”, tŭ klei ư̆ êpa, lưng mlŭn, hiu rưng anôk anei anôk mkăn, tŭ ư jing “mnơ̆ng arăng bi êmut, msĕ si djah lăn ala!” (êlan 11-13). Ai tiê phung tui hlue Khua Yang klă sĭt amâo jing knuih hdĭp hưn pô jing mdrŏng sah, thâo mĭn snăk, hlei pô dưi ruah ngă “khua kiă kriê” ôh, ƀiădah jing ai tiê tŭ ư sĭt suôr hŏng Khua Yang, hdĭp dleh dlan čiăng sĭt suôr hŏng asăp iêô, hŏng bruă čiăng kơ pô mkăn “jing phung thâo mĭn hlăm Krist”, dưi jing “ktang”, “arăng mpŭ” (êlan 10).
Klei năng ênguôt jing klei hdĭp soh čhuai mơ̆ng đa đa mnuih Kôrantô ƀiă lu ăt adôk hlăm Phung Sang Aê Diê drei hruê anei. Akâo kơ Klei Aê Diê Blŭ bi mdih grăp čô drei hlăm klei hriăm anei.
Knuih hdĭp drei mâo ya klei brei bi mlih čiăng đru mkŏ mjing Phung Sang Aê Diê?
Wah lač: Ơ Khua Yang, akâo kơ Ih đru kâo hdơr kơ lu mnuih săn leh jih klei hdĭp čiăng kơ kâo thâo kral Ih, anăn amâo djŏ jing čiăng kâo bi kah leh anăn hiu hưn kơ klei phung ka đăo ăt ktưn hưn. Akâo kơ Ih đru kâo thâo hdơr knga leh anăn hrăm mbĭt hlăm knuih hdĭp sĭt suôr hŏng Khua Yang, ba klei tŭ dưn kơ lu mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Đaniêl 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
