1 Kauleethaus 4:6-13
Nqe cim:
“Twb yog vim peb ua Yexus Khetos tes haujlwm, sawvdaws thiaj hais tias peb yog neeg ruam, tiamsis nej yog neeg ntse, nej thiaj ntseeg Yexus Khetos. Peb qaug zog, tiamsis nej muaj zog kawg li. Luag hwm nej, tiamsis luag thuam peb kawg li” (1 Kauleethaus 4:10)
Lus nug xav:
– Txij nqe 6-13, timthawj Paulus hais txog tej kev yuam kev twg hauv cov ntseeg Kauleethaus txoj kev ua neej?
– Nws ua li cas kho lawv tus cwjpwm yuam kev?
– Nplooj siab ntawm tus neeg nrog Tswv Yexus mus tseeb tseeb yog dabtsi?
– Muaj yam dabtsi ntuas peb dhau zaj kawm no?
Qhov teebmeem sib cav thiab faib ua pab ua pawg ntawm Pawg ntseeg Kauleethaus twb tau timthawj Paulus hais dhau tshaj peb tshooj ntawv lawd. Tamsis no, nyob rau feem xubthawj (nqe 6-7), ib zaug ntxiv Paulus ua tib zoo ntuas Pawg ntseeg los ntawm nws txoj kev paub thiab ntawm Apaulaus hais tias, “Tsis tsimnyog nej qhuas tus no thiab thuam tus tod” (nqe 6). Paulus ntuas lawv hais tias txhua yam nej muaj puavleej yog Vajtswv pub, yog tau Vajtswv pub xwb ces muaj dabtsi los khav thiab?
Hauv feem tim 2 (nqe 8-13), Paulus nthuav pom meej cov ntseeg Kauleethaus txoj kev ua neej khavtheeb. Cov neeg no qhia pom lawv txaus siab heev txog lawv txoj kev txawj, kev ntse, kev npluanuj (nqe 8) tsis txawv nkaus Pawg ntseeg Laudikeyas hnub thaud, lawv xav hais tias “Peb npluanuj, peb tsis pluag ib yam dabtsi li” tiamsis tseeb tiag ntawm Vajtswv qhovmuag mas “Nej pluag, nej liabqab thiab nej digmuag” (Tshwmsim 3:17). Muaj qee tus ntseeg hauv Kauleethaus ua zoo li yus yog vajntxwv (nqe 8), thaum lawv ntaus nqis rau tus timthawj no mus rau tus timthawj tod saib tus twg tsimnyog ua haujlwm rau yus dua!
Timthawj Paulus kho lawv tus cwjpwm yuam kev los ntawm qhov uas qhia hais tias, nplooj siab ntawm Tswv Yexus ib tus thwjtim tseeb mas yog tiv kev txomnyem, txaus siab cia ua yeebyam rau neeg ntiajteb luag (nqe 9). Ntawd yog tus duab uas ib txwm muaj nyob hauv tebchaws Loos, thaum cov nomtswv xav dag cov pejxeem los ntawm kev tso lawv ua ntau yam kev lomzem, thiab tej kev lomzem uas phem kawg nkaus. Tibneeg tuaj ua ke saib tej kev lomzem sib tw peevxwm, sib tw ntawm cov neeg raug txim thiab cov tsiaj nyaum. Tswv Yexus cov thwjtim tiam Paulus nyob raug muab coj los ua yeeb yam li ntawd. Txawm li ntawd los lawv txaus siab cia raug luag saib “ yog neeg ruam” yog neeg “tsis muaj zog” txaus siab tshaib nqhis, tsis muaj ris tsho hnav, tsis muaj vajtse nyob “…zoo li tej khoom liamsim uas neeg ntiajteb muab povtseg,…zoo li tej yam qias qias rau neeg ntiajteb…” (nqe 11-13). Tus uas nrog Tswv Yexus mus tiag tiag lub siab tsis yog txoj kev ua neej khav yus npluanuj, txawj ntse li cas, leejtwg yog tus uas yus yuav xaiv ua “thawjcoj”, tiamsis yog tus uas muaj lub siab txaus siab ncaj ncees rau tus Tswv, ua neej txomnyem kom sawv ruaj, ncajncees rau tus Tswv lub suab hu, rau lwm tus “txawj ntse hauv Tswv Yexus” tau “muaj zog” thiab tau “luag hwm” (nqe 10).
Yam uas tsimnyog tu siab ntawm cov ntseeg Kauleethaus txoj kev ua neej yuam kev, ntau tsawg tseem muaj nyob hauv Pawg ntseeg niaj hnub nim no. Thov Vajtswv ceebtoom peb txhua tus dhau zaj kawm no.
Thov Vajtswv,
Tus Tswv, thov pab nyuam yaus nco tias nyuam yaus tau txais txoj kev cawmdim vim muaj neeg coob leej tau fij lawv lub neej lawd, ntawd tsis yog cia rau nyuam yaus faib pab pawg thiab khav theeb txog tej yam uas cov tsis ntseeg pheej txaus siab. Tiamsis thov pab nyuam yaus ua neej paub ua Koj tsaug thiab ua neej muaj nqis rau coob leej. Nyuam yaus tuav Tswv Yexus Khetos lub npe thov, Amees.
Yam twg hauv peb tus cwjpwm thiab kev ua neej yuav tsum hloov thiaj li pab tau pawg ntseeg?
Nyeem Vajluskub hauv peb lub xyoos: Daniyees 4
Kênh Youtube BHKTHN:
