I Kôrintô 4:6-13
“Đe lăng nhôn jang tơdrong Yêsu Krist thoi bơngai kơtul, đe lăng iĕm thoi lĕ bơngai hơgei tôm tơdrong Yêsu Krist. Nhôn bơngai tơrăn, iĕm bơngai pran. Đe pơjĭp pơjăm nhôn, gah iĕm đe ư-ang.”
(I Kôrintô 4:10)
Nơ̆r jet tơchĕng pơwao:
- Đơ̆ng trong 6-13 ‘Bok Pôl tơ’blŏk gah dôm tơdrong glăi ayơ lăm trong tơdrong arih lu bơngai lui tơ pơlei Kôrintô?
- Sư hơmet ming tơdrong glăi lu sư thoi yơ?
- Jơ-hngơ̆m bơngai kiơ̆ Kră Yang tơpă noh kiơ?
- Bơ̆n athei tơ’blŏk tơdrong kiơ đơ̆ng ‘bai pơhrăm ‘nâu?
Tơdrong pơjah păng tơklah băl lăm khŭl bơngai lui tơ pơlei Kôrintô ‘Bok Pôl đei chih roi loi kơ pêng chăl, jơ ‘nâu, ‘bơ̆t pơih blŭng a (trong 6-7), minh wơ̆t dơ̆ng, sư bơ tho pơlung khul bơngai lui adrar adeh hăm tơdrong arih sư kơdih sư hlôi bơih păng ‘bok Apôlê na khan, ‘nĕ “pơ ư bơngai âu pơchê bơngai to” (trong 6). Sư tơblŏk ăn kơ lu sư ‘blŏk đĭ dôm tơdrong kiơ lu sư đei noh đơ̆ng Kră Yang ‘Bok Kei-Dei asong ăn. Na mưh đơ̆ng ‘Bok Kei-Dei asong ăn lei ưh kơ đei kiơ wă pơ ang? Lăm mă ‘bar (trong 8-13), Sư pơma tơ’bôh hơđăl trong tơdrong arih pơ ang akâu kơdih lăm lu bơngai lui tơ pơlei Kôrintô hăm nơ̆r pơma chrih biơ̆. Lu bơngai ‘nâu tơ’bôh tơdrong hlôh wao, gơh hơgei, đei mơdrŏng lu sư (trong 8). Ưh kơ đei phara kiơ kơ khul bơngai lui tơ pơlei Laodisê adrol sơ̆, lu sư tơchĕng khan: “păng iĕm pơang kơ đe khan iĕm mơdrŏng kơ nơ̆r ‘Bok Kei-Dei bơih, huay pă kăl kơ tơdrong kiơ dơ̆ng” mă tơpă, Kră Yang lăng lu sư “iĕm ưh kơ băt kơdih, iĕm bơngai pơmat tat, bơngai răm ‘băm, bơngai dơnuh hin, bơngai măt tol, ưh kơ mah hơbĕn ao hrŭk” (Tơdrong Tơ’bôh 3:17). ‘Bok Pôl hơmet ming tơdrong glăi lu sư hăm nơ̆r bơtho khan, jơhngơ̆m bơngai kiơ̆ Kră Yang tơpă ‘noh chu iŏk “Tơdrong đe che bơle, hiĕk achơ̆” (trong 9). ‘Nâu bơih tơdrong juăt kơ pơm lăm dêh char Rôm, lu bơngai pơgơ̆r wă kơ kon pơlei lăng chơt đei lơ tơdrong, lăm noh đei tơdrong kơnê̆. Đei lơ bơngai năm lăng dôm tơdrong pơjei băl, truh tơdrong pơjei băl bơngai bơnă păng sem bri. Bơngai pơhrăm păng Yêsu lăm chăl ‘bok Pôl kư̆m đei pơm pơchơt ngôi thoi noh, mălei lu sư chu iŏk đe lăng thoi “bơngai kơtul”, thoi “bơngai tơrăn”, chu iŏk rơwĕt kơ por ol kơ đak, iŏk ao hiah dônh hrŭk hrăi, chă năm jơ̆p jang năr ‘nâu tơ âu, năr dơning tơ nai, chu iŏk “đe chă pơchê nhôn, tơdrong lu nhôn thoi lĕ kơ ‘bruih đe bơngai ala teh” (trong 11-13). Jơhngơ̆m bơngai kiơ̆ Kră Yang tơpă ưh kơ trŏ kơ trong tơdrong arih pơang tơdrong mơdrŏng, tơdrong hơgei thoi yơ bu jơ̆ bơngai mă gơh rơih pơm “bơngai pơgơ̆r”, ‘noh jơ̆ jơhngơ̆m chu iŏk tơnăp hăm Kră Yang, arih chu iŏk pơmat wă kơ oei tơnăp kơjăp lăm tơdrong Kră Yang krao pơjao tơdrong jang wă tơgŭm đe “hơgei tôm tơdrong Yêsu Krist” gơh “pran kơtang”, “đe ưang” (trong 10). Tơdrong mă sơ’ngon dêh noh jơ̆ trong tơdrong arih sa bơngai lui mơ’nah lăm pơlei Kôrintô lơ tŏ sĕt kư̆m oei ‘bơm lăm Khul Bơngai Lui dang ei. Krao apinh nơ̆r Kră Yang tơ’blŏk kơ rim ‘nu lu bơ̆n đơ̆ng ‘bai pơhrăm ‘nâu.
Ơ Kră Yang, apinh Ih tơgŭm inh ‘blŏk kơ lơ bơngai chu pơmat đĭ chăl arih wă kơ inh băt kơ Kră Yang, ‘noh ưh kơ trŏ wă kơ inh tơklah păng pơang gah dôm tơdrong mă lu bơngai tam mă lui oei lăp đon. Apinh Ih tơgŭm inh arih băt bơnê păng wang hơdai lăm trong tơdrong arih tơnăp hăm Kră Yang ba tơdrong đei yua kơ lơ bơngai. Krao khan yua anăn Kră Yang Yêsu Krist, Amen.
Tơdrong arih bơ̆n tơdrong kiơ kăl kơ tơplih wă tơgŭm tơiung Khul Bơngai Lui?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Đaniel 4
Kênh Youtube BHKTHN:
