Klei Aê Diê Blŭ: Galati 5:1
Êlan kliăng: “Krist bi mtlaih drei leh, čiăng kơ drei mâo klei êngiê. Snăn dôk kjăp bĕ, đăm lŏ mjing ih pô hlŭn klei bhiăn ôh.” (Galati 5:1)
Klei êmuh ksiêm mĭn: Mơ̆ng ya klei phung đăo mâo klei êngiê kơ klei khăt klĭt leh anăn bruă ngă mơ̆ng klei bhiăn? Ya mta phŭn ngă kơ drei khăng lŏ wĭt jing hlŭn kơ klei bruă jăk? Si ngă čiăng drei dôk kjăp hlăm Khua Yang?
Khua ƀĭng kna Y-Pôl mphŭn kdrêč 5 hŏng sa klei bi mklă, mâo mbĭt klei mtă “brei” leh anăn “đăm”. Tur knơ̆ng mơ̆ng klei “dôk kjăp” jing “Yang Krist phưi drei mâo klei êngiê” hlăm boh klei Phung Sang Aê Diê Galati jing êngiê tlaih mơ̆ng klei khăt klĭt leh anăn klei bhiăn. Bruă Phung Khua Ƀĭng Kna 16:1-5 čih Khua ƀĭng kna Y-Pôl yơh jing pô “ngă klei khăt klĭt” kơ Y-Timôthê tơdah ñu čiăng atăt gơ̆ tui hlue ñu. Mta phŭn jing “kyua jih jang thâo sơăi ama Y-Timôthê jing mnuih Grĕk”, kyua anăn tơdah Y-Timôthê tŭ klei khăt klĭt snăn ya bruă ñu ngă ti krah phung Yuđa srăng ênưih hĭn, amâo djŏ jing khăt klĭt čiăng mâo klei bi mtlaih ôh. Boh tŭ jing “lu Sang Aê Diê dôk kjăp hlăm klei đăo, leh anăn ênoh mnuih ƀrư̆ hruê ƀrư̆ mâo lu”. Kyua anăn, khăt klĭt leh anăn hlue ngă klei bhiăn, amâodah hlăm ênuk drei jing klei mă bruă, gưt hlue si klei bhiăn leh anăn mă bruă jăk,..srăng soh sơăi tơdah drei dlăng anăn jing mta mnơ̆ng ba klei bi mtlaih. Krist phưi leh drei čiăng kơ drei mâo klei êngiê mơ̆ng klei anăn.
Khădah snăn, phung mâo leh klei êngiê mơ̆ng Krist ăt dôk ti anăp dua klei čuăn ruah: Tal sa, jing “dôk kjăp”. Êlan Klei Aê Diê Blŭ anei brei ƀuh drei dưi “dôk kjăp”hlăm klei êngiê pô mâo leh. Năng ai drei bi mĭn, grăp čô čiăng sơăi klei êngiê, kyua anăn klei “dôk kjăp” amâo dleh dlan ôh! Khădah snăn phung đăo ti Galati amâo lŏ dôk kjăp ôh. Kyua anăn, dôk kjăp hlăm klei êngiê tlaih mơ̆ng klei gĭr ngă hŏng bruă jăk, hŏng bruă drei bi mklă leh anăn bi êdah, brei mâo klei jhŏng dôk kjăp čiăng đăo kơ klei Aê Diê mtă, leh anăn lui hĕ klei blŭ bi kdơ̆ng mă anăn kyua mtă mtăn, mtô bi hriăm mơ̆ng phung khua pô mtô soh, jing phung “bi rŭng klei mĭn diih leh anăn čiăng bi msoh klei mrâo mrang jăk Krist” (Galati 1:7).
Tal dua, jing “lŏ mjing ih pô hlŭn klei bhiăn ôh”. Jing leh “hlŭn” snăn amâo jăk ôh, ƀiădah phung đăo ti Galati, leh anăn wăt phung drei, ăt ênưih tŭ klei arăng mplư leh anăn čŏng lŏ wĭt jing hlŭn. Khua Yang čiăng kơ drei klam kyâo bi kal amâo djŏ jing hlŭn ôh.
Hruê anei, lu phung drei đăo sơăi drei mâo leh klei bi mtlaih kyua klei pap. Khădah snăn, leh tŭ mă klei bi mtlaih, lu mnuih hlăm phung drei khăng lŏ wĭt hŏng bruă ngă “brei ngă”,”đăm ngă ôh” hŏng klei bhiăn msĕ si mta mnơ̆ng djă pioh klei bi mtlaih pô. Brei ngă snei amâodah snăn kơh năng dưi mŭt hlăm Sang Aê Diê! Đăm ngă ôh klei anei, klei anăn huĭ Aê Diê bi kmhal hlăm war pui!… Khua ƀĭng kna Y-Pôl mtô: “Tơdah drei dôk hdĭp kyua Yang Mngăt Jăk, brei drei dôk dơ̆ng ƀơ̆ng huă tui si Yang Mngăt Jăk mơh.” (Galati 5:25).
Hŏng ya klei čuăn ruah drei dôk hdĭp?
Wah lač: Ơ Khua Yang, tơdah kâo tuôm hŏng klei mplư lŏ wĭt hŏng bruă jăk hlăm klei bhiăn čiăng ƀuh hơĭt ai tiê kơ klei bi mtlaih pô, akâo kơ Yang Mngăt Jăk ƀuah mkra hlăm kâo čiăng kơ kâo thâo klei mơak leh anăn klei êngiê hlăm klei pap Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 53
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
