Galati 3:1-14
“Lơliơ iĕm ưh kơ hlôh tơdrong âu? Iĕm pơtơm lui kơ Yêsu sơ̆, iĕm gơnang kơ Yang Bơhngol ‘Lơ̆ng tơpă, na Sư gơh ăn kơ iĕm đei jơhngơ̆m pran pơm kiơ̆ tôm tơdrong thoi Sư wă. Kơlih kơ kiơ iĕm ưh pă gơnang kơ Sư dơ̆ng, na dang ei iĕm khan wă gơnang kơ akâu iĕm kơdih đĕch păng iĕm khan oei lui kơjăp ră, liơ gơh trŏ thoi noh?” (Galati 3:3)
Nơ̆r jet tơchĕng pơwao:
– ‘Bok Pôl đei yua iŏk nơ̆r ayơ tơ’bôh gah bơngai Galati?
– Yua kơ kiơ sư pơma trăp hăm lu sư thoi noh?
– Sư yua iŏk lu tơdrong tơpăt ayơ wă pơma hăm lu sư?
– Tơ’blŏk kơ bơ̆n tơdrong kiơ đơ̆ng ‘bai pơhrăm ‘nâu?
Blŭng a lăm kơthơ, ‘bok Pôl chrih kơ lu bơngai Galati ‘bônh kơ achăng Tơdrong ‘Nao ‘Lơ̆ng Kră Yang Yêsu Krist wă kiơ̆ Tơdrong ‘Nao ‘Lơ̆ng nai, păng lăm âu sư đei pơma hơđăl ‘bar wơ̆t khan lu sư “ưh kơ hlôh” (trong 1, 3). Sư tơlĕch ‘bar tơdrong tơpăt. Khan đơ̆ng lu sư kơdih (trong 1-5) păng lu sư đơ̆ng adrĕch adrung Abraham (trong 6-14).
Lăm tơdrong kơdih, ‘bok Pôl đei tơlĕch lơ nơ̆r jet wă kơ lu sư ‘bôh hơđăl gah tơdrong kơdih: Lu sư kư̆m băt hơđăl bơih gah tơdrong Kră Yang Yêsu Krist chu lôch, lu sư đei Yang Bơhngol ‘Lơ̆ng đơ̆ng lu sư mơ̆ng kơtơ̆ng păng lui, lu sư mơn đei Yang Bơhngol ‘Lơ̆ng ăn, tơdrong lu sư noh “iĕm pơtơm lui kơ Yêsu sơ̆, iĕm gơnang kơ Yang Bơhngol ‘Lơ̆ng tơpă, na sư gơh ăn kơ iĕm đei jơhngơ̆m pran pơm kiơ̆ tôm tơdrong thoi sư wă. Kơlih kơ iĕm ưh pă gơnang kơ Sư dơ̆ng, na dang ei iĕm khan wă gơnang kơ akâu iĕm kơdih đĕch păng iĕm khan oei lui kơjăp ră, liơ gơh trŏ thoi noh?” (trong 3). Lăm tơdrong pơma mă ‘bar, ‘bok Pôl tơ’bôh adrĕch adrung Abraham ưh kơsĭ ‘nguaih kơ lu bơngai gơh klaih tă kơ đei đon lui, na “’Bok Kei-Dei băt hơdrol đơ̆ng sơ̆ bơih gah tơdrong lu bơngai mă lui kơ Sư, mă bơngai Juđê mă bơngai khul nai, Sư jô̆ ‘lơ̆ng tơpăt ngăl.” (trong 8).
Tơdrong hiôk iĕ dơ̆ng đơ̆ng ‘bar tơdrong ‘nâu, ‘bok Pôl ưh pă pơma lơ gah nơ̆r “Jô̆ ‘lơ̆ng tơpăt yua kơ đon lui”, na sư khan “Đơ̆ng Yang Bơhngol ‘Lơ̆ng ăn” (trong 2, 3, 5 păng 14), kư̆m thoi nơ̆r “đei pŭn hiôk” dah “ưh pă phak bơih” (trong 8, 9, 10, 13, 14). Pơtrơp dơ̆ng đơ̆ng noh, ‘bok Pôl tơbăt gơh jô̆ ‘lơ̆ng tơpăt yua kơ đon lui noh tơdrong noh pơm kơ lu bơngai lui kơ Kră Yang đei tơdrong pran đơ̆ng gah lăm gơh arih lăm tơdrong pŭn hiôk ưh kơsĭ lăm tơdrong pơmat đơ̆ng tơdrong athei chu kiơ̆ tơdrong juăt dơ̆ng ôh. Yua kơ thoi noh, lu đe bu đei Yang Bơhngol ‘Lơ̆ng yua kơ đon lui lei na athei gơnang kơ Yang Bơhngol ‘Lơ̆ng, ‘nĕ gơnang kơ sĕch akar kơdih, pơm mă ‘blep trŏ tôm tơdrong.
Lơ bơngai lăm bơ̆n chơt hiôk sơng iŏk păng jing minh ‘nu bơngai đei đon lui ngeh yua kơ băt hơđăl noh bơih, “tơdrong ăn đĕch” đơ̆ng Kră Yang ưh kơsĭ đơ̆ng bơ̆n gleh lap kơdih ôh. Mălei, hlĭch chrơp dêh đơ̆ng rŏng kơ iŏk tơdrong mơnat ăn noh, bơ̆n gơh pơm lu tơdrong “mơsêh” wă kơ băt hơđăl bơ̆n gơh klaih bơih. Bơ̆n “athei năm tơhnam akŭm, athei đŏk nơ̆r ‘Bok Kei-Dei, “athei” bơ̆jang “athei” pơm kiơ̆ khôi juăt, dah ưh, bơ̆n “hli” kơ hiap pơtê̆, Kră Yang phak. Trŏ tơpă lu bơngai mă lui tơpă gô pơm dôm tơdrong thoi noh, mălei bơ̆n gơh pơm yua kơ Yang Bơhngol ‘Lơ̆ng pơgơ̆r lăm jơhngơ̆m bơ̆n, yua kơ noh bơih tơdrong pŭn hiôk ưh kơsĭ hiap pơtê̆ tơdah ưh kơ pơm. Apinh Kră Yang ăn kơ bơ̆n jơhngơ̆m pran đơ̆ng Yang Bơhngol ‘Lơ̆ng wă kơ yak năm hloi kiơ̆ kơ Yang Bơhngol ‘Lơ̆ng chông anhăk.
Kơkuh kơ Kră Yang, inh bơnê kơ Ih yua kơ ưh kơsĭ inh gơh klaih yua kơ đơ̆ng Ih mơnat ăn đĕch na inh gơh arih jing bơngai lui, yua kơ Ih mơnat ăn đĕch. Apinh Ih ăn kơ inh băt gơnang kơ Yang Bơhngol ‘Lơ̆ng wă yak năm hăm Kră Yang rim năr. Yua anăn Kră Yang Yêsu Krist, Amen!
Bơ̆n đei iŏk kiơ đơ̆ng Kră Yang? Bơ̆n oei yak năm hăm Kră Yang thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 15
Kênh Youtube BHKTHN:
