Klei Aê Diê Blŭ: I Têsalônik 5:23-24
Êlan kliăng: “Akâo kơ Aê Diê pô jing akŏ kơ klei êđăp ênang bi doh jăk diih kluôm ênŭm; leh anăn akâo kơ Ñu mgang pioh mngăt, ai mĭn, leh anăn asei mlei diih amâo mâo klei ƀuah ôh ti hruê Khua Yang drei Yêsu Krist srăng lŏ hriê.” (I Têsalônik 5:23)
Klei êmuh ksiêm mĭn: Ya klei Khua ƀĭng kna Y-Pôl wah lač kơ phung đăo ti Têsalônik? Ya ngă doh jăk kluôm ênŭm jing klei grăp čô đăo mđing truh? Ya klei mđĭ ai drei jing doh jăk?
Akŏ hdră, Khua ƀĭng kna Y-Pôl lač kơ klei đăo, klei khăp leh anăn klei đăo knang mơ̆ng phung đăo Têsalônik (I Têsalônik 1:3), leh anăn knhal tuč hdră, ñu mñă kơ bruă Aê Diê đru kơ ayŏng adei jing doh jăk kluôm ênŭm (êlan 23). Čiăng dưi hdĭp knuih hdĭp doh jăk msĕ si klei mtô hlăm kdrêč 4 leh anăn 5, Khua ƀĭng kna Y-Pôl wah lač kơ phung đăo tinei dưi jing doh jăk. Klei đăo hlăm Khua Yang Yêsu Pô Bi Mtlaih đru jing doh jăk, ƀiădah jih klei hdĭp tui hlue Khua Yang, phung đăo brei jing doh jăk hlăm grăp hruê. Anei jing sa hdră Aê Diê đru kơ phung đăo kơ Ñu hriê kơ prŏng ƀrư̆ msĕ Khua Yang hĭn, čiăng dưi mâo hnơ̆ng kluôm ênŭm mơ̆ng Krist. Khua ƀĭng kna Y-Pôl “Akâo kơ Aê Diê pô jing akŏ kơ klei êđăp ênang bi doh jăk diih kluôm ênŭm”, wăt “mngăt, ai mĭn, leh anăn asei mlei” kluôm ênŭm, amâo mâo ya klei năng ƀuah ôh hlăm hruê Khua Yang Yêsu lŏ hriê. Êlan 24 jing sa klei ƀuăn kơ klei jing doh jăk kluôm ênŭm mơ̆ng phung ƀuôn sang Khua Yang. . “Pô iêu diih leh jing sĭt suôr, leh anăn Ñu srăng ngă klei anăn”. Doh jăk kluôm ênŭm jing klei grăp čô phung đăo brei mđing truh, anei jing hdră kñăm, bruă klam grăp čô phung đăo hlue ngă klei Pô doh jăk iêô mthưr “Brei diih jing doh jăk, kyuadah kâo pô jing doh jăk” (I Y-Pêtrôs 1:16). Khua Yang amâo iêô phung drei jing doh jăk ti êngao kyua klei pô gĭr ôh, ƀiădah Ñu bi mlih anak mnuih hlăm lam. Klei soh dôk nanao jŭm dar drei ƀiădah knuih hdĭp doh jăk suôt klei soh đuĕ kbưi leh anăn atăt drei bi êdah ti êngao hŏng bruă ngă. Kyua anăn, grăp hruê drei ƀrư̆ kjăp hĭn ti anăp klei soh mplư. Phung đăo hdĭp ti krah klei soh jhat anei, bruă mđing kơ klei hdĭp doh jăk klă sĭt srăng tŭ lu klei kpĭ kyua lu klei mplư jŭm dar, khădah snăn Aê Diê êđăp ênang srăng brei klei êđăp ênang Ñu kơ drei čiăng lŏ dơ̆ng bruă jing doh jăk.
Klei Khua ƀĭng kna Y-Pôl wah lač kơ phung đăo Têsalônik brei ƀuh jih jang phung đăo brei mđing kơ hdră kñăm jing doh jăk. Jih jang drei brei kñăm kơ klei kñăm jing knang kơ klei pap Khua Yang, bi mguôp hŏng Khua Yang leh anăn Klei Aê Diê Blŭ čiăng grăp hruê jing msĕ si Khua Yang Yêsu msĕ si klei Khua ƀĭng kna Y-Yôhan mtô leh : “hlei pô lač ñu dôk hlăm Yêsu, brei ñu êbat msĕ si Yêsu pô êbat leh” (I Y-Yôhan 2:6). Hdĭp hlăm ai tiê dôk čang guôn hruê Khua Yang Yêsu lŏ hriê, anăn jing klei mđĭ ai đru drei hdĭp doh jăk kluôm ênŭm hlăm hruê mmông adôk hdĭp ti lăn ala.
Ya klei hlăm klei hdĭp drei bi êdah klei pô êpa hmao kơ klei hdĭp doh jăk?
Wah lač: Ơ Aê Diê Sĭt Suôr! Kâo mơak kyua thâo hdră kñăm Ih čiăng klei hdĭp kâo jing doh jăk kluôm ênŭm. Kâo dôk čang guôn hruê jăk mơak tơdah Khua Yang Yêsu lŏ hriê bi leh hdră Ih kñăm hlăm klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Lêwi 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
