Klei Aê Diê Blŭ: I Y‑Timôthê 6:6-10
Êlan kliăng: “Ƀiădah tơdah drei mâo mnơ̆ng ƀơ̆ng huă leh anăn čhiăm ao, hŏng mnơ̆ng anăn drei srăng dôk mơak” (I Y‑Timôthê 6:8).
Klei êmuh ksiêm mĭn: Ya klei khua ƀĭng kna Y‑Pôl mtô kơ klei djăp mnơ̆ng ƀơ̆ng huă leh anăn djăp čhiăm ao? Si klei sĭt nik ñu hưn mdah? Klei tluh čiăng atăt truh kơ ya mta klei? Si drei ngă čiăng ƀuh mâo djăp ?
Hlăm trăn Klei Aê Diê Blŭ anei, khua ƀĭng kna Y‑Pôl mtô kơ êlan dưi mâo klei hdĭp mơak tơdah dôk hlăm Khua Yang. Ñu lač klă čiăng mâo klei tŭ dưn prŏng, brei drei mâo wăt “klei mpŭ kơ Aê Diê mbĭt hŏng ai tiê mơak”. Amâo dưi kƀah sa hlăm dua mta klei anăn ôh. Boh blŭ “mơak” khua ƀĭng kna Y‑Pôl yua tinei mâo klei mblang jăk êlam snăk. Amâo djŏ knŏng mơak hrăp ai tiê hŏng mnơ̆ng drei dôk mâo ôh, ƀiădah ăt hdĭp mơak wăt amâo djăp dưn mta mnơ̆ng drei čiăng. Ñu hưn klă sa klei sĭt nik snei “kyuadah drei amâo tuôm djă ba sa mta mnơ̆ng ôh kơ lăn ala, leh anăn kăn drei dưi mă ba sa mta mnơ̆ng rei mơ̆ng lăn ala” (êlan 7) čiăng mñă kơ drei, mơ̆ng phŭn kčưm dơ̆ng klei hdĭp drei jing pliê mang snăk. Mrâo kkiêng drei amâo mâo sa mta mnơ̆ng ôh êngao kơ Khua Yang. Lui lăn ala anei, tơdah drei huĭ mpŭ, hdĭp kơ Khua Yang, drei srăng wĭt dôk hŏng Khua Yang. Snăn ya yuôm drei gĭr ktĭr suăi êmăn mkăm pioh ngăn drăp yuôm ti lăn ala anei? Hdĭp êkoh leh anăn mơak đru drei mđing mĭn kơ Khua Yang leh anăn jih ai tiê tui duah Ñu hrô kơ tui duah mnơ̆ng mnuă ti lăn ala anei.
Khua ƀĭng kna Y‑Pôl klah čŭn: “Ƀiădah tơdah drei mâo mnơ̆ng ƀơ̆ng huă leh anăn čhiăm ao, hŏng mnơ̆ng anăn drei srăng dôk mơak” (êlan 8). Klei mĭn “djăp” hŏng grăp čô jing mdê mdê. Mâo pô ƀuh djăp leh mâo mnơ̆ng ƀơ̆ng huă, čhiăm ao čŭt hơô grăp hruê. Ƀiădah mâo pô knŏng ƀuh djăp tơdah mâo msĕ hŏng ya mta mnơ̆ng arăng mâo, amâodah mâo lu hĭn kơ arăng. Tơdah arăng ƀuh ka thâo djăp ôh, klei tluh čiăng srăng kgŭ, leh anăn “klei khăp kơ prăk jing agha kơ jih jang klei jhat” (êlan 10a). Prăk kăk bi mjing klei mtrŭt ktang tĭt hlăm klei hdĭp, mâo klei dưi đru arăng, ba hriê lu klei tŭ dưn, ƀiădah tơdah amâo thâo răng, prăk kăk srăng ba klei jhat prŏng snăk mơh. Tơdah sa čô mnuih mâo klei khăp kơ prăk, pô anăn srăng duah djăp êlan čiăng bi mâo. Diñu srăng “lĕ hlăm klei mplư, djŏ kđông, leh anăn mâo lu klei čiăng mluk leh anăn bi knap” (êlan 9). Diñu mmăt ală mta leh anăn bi luč hĕ klei mơak kyua hmăng kơ tui tiŏ klei tluh čiăng. Diñu ngă jhat kơ arăng kyua čiăng bi mâo klei diñu tluh. Leh anăn boh diñu srăng tŭ “klah đuĕ mơ̆ng klei đăo leh anăn bi truh kơ ai tiê diñu lu klei rŭng ênguôt” (êlan 10b).
Khua Yang Yêsu mtô leh: “Snăn đăm uêñ hnĭng ôh kơ hruê mgi, kyuadah hruê mgi diih srăng uêñ kơ hruê mgi. Grăp hruê mâo klei dleh kơ grăp hruê ” (Y‑Mathiơ 6:34). Grăp hruê Aê Diê brei kơ drei “djăp mnơ̆ng ƀơ̆ng huă leh anăn djăp čhiăm ao” snăn brei drei dôk mơak yơh. Đăm rŭng răng mkăm pioh kơ hruê mgi ôh, kyua srăng atăt kơ klei tluh leh anăn tui tiŏ ñu. Pô čih hră Hêbrơ 13:5 ăt mtă mơh: “Đăm khăp kơ prăk ôh; leh anăn dôk mơak bĕ hŏng mnơ̆ng diih mâo leh; kyuadah Aê Diê lač leh, ‘Kâo amâo srăng lui ih amâodah hngah kơ ih ôh’ ”. Brei drei đăo knang kơ Khua Yang leh anăn djă păn kjăp kơ klei Ñu ƀuăn čiăng dôk hdĭp mơak leh anăn ƀuh mâo djăp leh kyua mâo Khua Yang dôk mbĭt.
Si ngă drei ƀuh djăp leh anăn mơak hŏng ya mta mnơ̆ng drei dôk mâo mơ̆?
Wah lač: Ơ Khua Yang, akâo Ih brei kâo bi knal nanao “klei hdĭp kâo mâo klei mơak kyua mâo Khua Yang atăt êlan”. Akâo Khua Yang đru kâo hdĭp mpŭ kơ Aê Diê leh anăn mơak ai tiê hŏng ya mta mnơ̆ng Aê Diê brei grăp hruê.
Dlăng Klei Aê Diê Blŭ hlăm tlâo thŭn: Klei Bi Hriêng 9:1‑18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
